1 YAWEI, im brabli gudwan blanga gibit theingks langa yu,
2 Im brabli gudwan blanga sing ebri moning blanga yu filing blanga laigim pipul olataim,
3 garram myusik brom olkain gita.
4 YAWEI, ola ting weya yu dum garram yu pawa meigim mi gudbinji.
5 Trubala, im nomo lilwan ting weya yu dum, YAWEI.
6 Siliwan pipul kaan sabi blanga dijan na.
7 Wulijim bindiyai weya im gro isibalawei en spredat ebriweya, lagijat du nogudbala pipul nomo abum eni trabul en gajimbat detmatj ebrijing isibalawei tudei,
8 dumaji yu na YAWEI, jidan bos brabli olagijawan.
9 Wi sabi blanga yu enami olabat garra binij,
10 YAWEI, yubin meigim mi strongbala jis laik wailwan bul jidan strongbala.
11 Aibin luk yubin bidim main enami olabat, en aibin irrim olabat jingat.
12 Detlot pipul hu jidan raitwei garra jidan gudbalawei jis laik detlot tri weya oldei abum detmatj daga,
13 Jis laik ola tri weya gro langa det Serramoni Pleis blanga YAWEI,
14 en weya oldei kipgon abumbat detmatj daga raidap olabat brabli olwan,
15 “YAWEI im brabli trubalawan en im nomo garram enijing rong langa im,