1 “ⵉⴼⵔⴰⵢⵉⵎ ⵉⵜⵜⴻⵏⵏⴻⴹ ⴰⵢⵉ ⵙ ⵓⵅⴰⵔⵔⵉⵇ ⵓ ⵜⴰⴷⴷⴰⵔⵜ ⵏ ⵉⵙⵔⴰⵉⵍ ⵙ ⵍⵖⴻⵛⵛ, ⵎⴰⵛⴰ ⵢⴰⵀⵓⴷⴰ ⵉⵜⵜⴻⵜⵍⵉⵄ ⵄⴰⴷ ⴰⴽ-ⴷ ⴰⵔⴻⴱⴱⵉ ⵓ ⴰⴽ-ⴷ ⵓⵎⵇⴻⴷⴷⴰⵙ ⴰⵎⴻⵇⵇⵔⴰⵏ ⴷ ⴰⵎⵜⵉⵇⵇⵉ.
2 ⵉⴼⵔⴰⵢⵉⵎ ⴷ ⵉⵊⵊ ⵏ ⵓⵎⴻⴽⵙⴰⵡ ⵢⵓⵢⵓⵔ ⴰⵡⴰⵔⵏⵉ ⵉ ⵓⵙⴻⵎⵎⵉⴹ. ⴰⵙⵙ ⵎⴰⵔⵔⴰ ⵢⴰⵔⴻⵏⵏⵉ ⵉⵅⴰⵔⵔⵉⵇⴻⵏ ⴷ ⵓⵔⴻⴷⴷⴻⴵ. ⵏⵉⵜⵏⵉ ⴳⴳⵉⵏ ⵉⵊⵊ ⵏ ⵍⵄⴰⵀⴷ ⴰⴽ-ⴷ ⴰⵛⵛⵓⵔ ⵓⵛⴰ ⵜⵜⴰⵡⵢⴻⵏ ⵣⵣⴻⵛⵜ ⵖⴰⵔ ⵎⵉⵚⵔⴰ.”
3 “ⵙⵉⴷⵉ ⵖⴰⵔⴻⵙ ⵉⵊⵊ ⵏ ⵓⵎⵛⵓⴱⴱⴻⵛ ⴰⴽ-ⴷ ⵢⴰⵀⵓⴷⴰ ⵓ ⵏⴻⵜⵜⴰ ⴰⴷ ⵉⴳⴳ ⵙ ⵢⴰⵄⵇⵓⴱ ⵄⵍⴰⵃⵙⴰⴱ ⵉⴱⵔⵉⴷⴻⵏ ⵏⵏⴻⵙ, ⴰⴷ ⵜ ⵉⵅⴻⴵⴻⵚ ⴰⵎ ⵎⴰⵎⵎⴻⵛ ⵜⵉⵎⴻⴳⴳⴰ ⵏⵏⴻⵙ.
4 ⴷⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰⵙ ⵉⵟⵟⴻⴼ ⵓⵎⴰⵙ ⵖⴰⵔ ⵓⵏⵉⵔⵣ ⵓ ⵍⴰⵎⵉ ⵜⵓⵖⴰ ⴷ ⴰⵔⵢⴰⵣ ⵉⵊⵀⴻⴷ ⵉⵎⵎⵄⴰⵍⴰ ⴰⴽ-ⴷ ⴰⵔⴻⴱⴱⵉ.
5 ⵏⴻⵜⵜⴰ ⵜⵓⵖⴰ ⵉⵎⵎⵏⴻⵖ ⴰⴽ-ⴷ ⵍⵎⴰⵍⴰⴽ ⵓⵛⴰ ⵉⵖⵍⴻⴱ. ⵉⵔⵓ, ⵉⵃⴻⵛⵛⴻⵎ ⵉ-ⵜ. ⵢⵓⴼⴰ ⵉ-ⵜ ⴷⵉ ⴱⴰⵢⵜ-ⵉⵍ ⵓ ⴷⵉⵏⵏⵉ ⵉⵙⵙⵉⵡⴻⵍ ⵏⴻⵜⵜⴰ ⴰⴽⵉⴷⵏⴻⵖ,
6 ⵡⴰⵀ, ⵙⵉⴷⵉ, ⴰⵔⴻⴱⴱⵉ ⵏ ⵍⵄⴻⵙⴽⴰⵔⴰⵜ, ⵙⵉⴷⵉ ⴷ ⵉⵙⴻⵎ ⵏⵏⴻⵙ ⵉ ⵍⵉⴷⴰⵔⴻⵜ.
7 ⴷⵡⴻⵍ ⵖⴰⵔ ⴰⵔⴻⴱⴱⵉ ⵏⵏⴻⵛ, ⵃⴹⴰ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⵃⴻⵇⵇ, ⵓ ⵙⵉⵜⵉⵎ ⵍⴻⴱⴷⴰ ⵉ ⴰⵔⴻⴱⴱⵉ ⵏⵏⴻⵛ.”
8 “ⴽⴻⵏⵄⴰⵏ ⵖⴰⵔⴻⵙ ⵉⵊⵊ ⵏ ⵍⵎⵉⵣⴰⵏ ⵉⵖⴻⵛⵛ ⴷⴻⴳ ⵓⴼⵓⵙ ⵏⵏⴻⵙ, ⵉⵜⵜⴻⵄⵊⵉⴱ ⴰⵙ ⴰⴷ ⵉⴱⴻⵄⵄⴻⵊ.
9 ⵎⴰⵛⴰ ⵉⴼⵔⴰⵢⵉⵎ ⵉⵇⵇⴰⵔ: ‘ⵏⴻⵛⵛ ⴷⴻⵡⵍⴻⵖ ⴷ ⴱⵓ-ⵡⴰⴳⵍⴰ, ⵢⴰⵔⵡⴻⵖ ⵉⵛⵜ ⵏ ⵍⴻⴽⵙⵉⴱⴻⵜ ⴷ ⵜⴰⵎⴻⵇⵇⵔⴰⵏⵜ ⵉ ⵢⵉⵅⴻⴼ ⵉⵏⵓ. ⴷⵉ ⵎⴰⵔⵔⴰ ⵍⵅⴻⴷⵎⴻⵜ ⵉⵏⵓ ⵡⴰⵔ ⴷⴰⵢⵉ ⵜⵜⵉⴼⴻⵏ ⵛⴰ ⵍⵎⵓⵄⵚⵉⵢⵢⴻⵜ ⵏⵏⵉ ⵉⴵⴰⵏ ⴷ ⴷⴷⴻⵏⴱ.’”
10 “ⵏⴻⵛⵛ ⴷ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⵣⴻⴳ ⵡⴰⵎⵉ ⵜⴻⴼⴼⵖⴻⵎ ⴽⴻⵏⵏⵉⵡ ⵣⵉ ⵜⴻⵎⵎⵓⵔⵜ ⵏ ⵎⵉⵚⵔⴰ. ⵏⴻⵛⵛ ⴰⴷ ⵛⴻⴽ ⵊⵊⴻⵖ ⴰⴷ ⵜⵣⴻⴷⵖⴻⴷ ⴷⴻⴳ ⵉⵇⵉⴹⴰⵏ ⴰⵎ ⴷⴻⴳ ⵡⵓⵙⵙⴰⵏ ⵏ ⵜⵎⴻⵙⵎⵓⵏⵜ ⴷⵉ ⵍⴻⵅⵍⴰ.
11 ⵏⴻⵛⵛ ⴰⴷ ⵙⵙⵉⵡⵍⴻⵖ ⵖⴰⵔ ⵉⵏⴰⴱⵉⵢⵢⴻⵏ ⵓ ⵏⴻⵛⵛ ⴰⴷ ⴰⵔⵏⵉⵖ ⵍⴻⵡⵃⵉⵢ ⴰⵟⵟⴰⵙ ⵓ ⵙ ⵓⴼⵓⵙ ⵏ ⵉⵏⴰⴱⵉⵢⵢⴻⵏ ⴰⴷ ⵙⵙⵉⵡⵍⴻⵖ ⵙ ⵍⴻⵎⵜⵓⵍ.”
12 “ⵎⴰⵍⴰ ⵜⵓⵖⴰ ⵊⵉⵍⵄⴰⴷ ⴷ ⵍⵎⵓⵄⵚⵉⵢⵢⴻⵜ, ⵅⴻⵏⵏⵉ ⴷⴻⵡⵍⴻⵏ ⵏⵉⵜⵏⵉ ⵅⵡⴰⵏ ⵇⴰⵄ ⴷⵉ ⵊⵉⵍⵄⴰⴷ. ⴰⵇⴰ ⵇⴻⴷⴷⵎⴻⵏ ⴷⵉⵏ ⵉⴼⵓⵏⴰⵙⴻⵏ. ⵓⵍⴰ ⴷ ⵉⵄⴰⵍⵟⴰⵔⴻⵏ ⵏⵙⴻⵏ ⴷⴻⵡⵍⴻⵏ ⴷ ⵉⵄⵓⵔⵔⵉⵛⴻⵏ ⵏ ⵉⵥⵔⴰ ⴷⵉ ⵍⴻⵅⴹⵓⴹ ⵏ ⵉⵢⵢⴰⵔⴻⵏ.
13 ⵢⴰⵄⵇⵓⴱ ⵢⴰⵔⵡⴻⵍ ⵖⴰⵔ ⵊⵊⵡⴰⵢⴻⵀ ⵏ ⴰⵔⴰⵎ ⵓ ⵉⵙⵔⴰⵉⵍ ⵜⵓⵖⴰ ⵉⵜⵜⵙⴻⵅⵅⴰⵔ ⵅ ⵢⵉⵛⵜ ⵏ ⵜⴻⵎⵖⴰⵔⵜ, ⵓ ⵏⴻⵜⵜⴰ ⵢⴰⵔⵡⴻⵙ ⵜⴰⵃⵉⵎⴰⵔⵜ ⴷⵉ ⵟⵟⵡⴻⵄ ⵏ ⵢⵉⵛⵜ ⵏ ⵜⴻⵎⵖⴰⵔⵜ,
14 ⵎⴰⵛⴰ ⵙ ⵢⵉⵊⵊ ⵏ ⵓⵏⴰⴱⵉ ⵉⵙⵙⴳⴻⵄⵄⴻⴷ ⵙⵉⴷⵉ ⵉⵙⵔⴰⵉⵍ ⵣⵉ ⵎⵉⵚⵔⴰ ⵓ ⵙ ⵢⵉⵊⵊ ⵏ ⵓⵏⴰⴱⵉ ⵢⴰⵔⵡⴻⵙ ⵉ-ⵜ.
15 ⵉⴼⵔⴰⵢⵉⵎ ⵜⵓⵖⴰ ⵉⵙⵄⴰⵔ ⵉ-ⵜ ⴰⵟⵟⴰⵙ. ⵙ ⵓⵢⴰ ⴰⴷ ⵢⴻⵊⵊ ⵙⵉⴷⵉ ⵉⴷⴰⵎⵎⴻⵏ ⵏⵏⴻⵙ ⴰⴷ ⵅⴰⵙ ⴷⴷ-ⴰⵙⴻⵏ ⵓ ⵙⵉⴷⵉ ⵏⵏⴻⵙ ⴰⴷ ⴰⵙ ⵉⵅⴻⴵⴻⵚ ⵍⵃⴻⴳⵔⴰ ⵏⵏⴻⵙ.”