1 ⵅⴻⵏⵏⵉ ⵉⵙⵡⴻⴹ ⵢⴰⵙⵓⵄ ⵖⴰⵔ ⴰⵢⵜⴱⴰⴱ ⵏ ⵡⴰⴳⵍⴰ ⵙⵙⵔⵓⵙⴰⵏ ⵚⵚⴷⴰⵇⵉ ⵏⵙⴻⵏ ⴷⵉ ⵙⵙⴻⵏⴷⵓⵇ.
2 ⵉⵥⵔⴰ ⵄⴰⵡⴻⴷ ⵉⵛⵜ ⵏ ⵜⴰⵊⵊⴰⵍⵜ ⵜⴰⵎⴻⵣⵍⵓⴹⵜ ⵜⴻⵙⵙⴰⵔⵙ ⴷⴰⵢⴻⵙ ⵜⵏⴰⵢⴻⵏ ⵏ ⵓⵇⵉⵢⵢⴰⵜ, ⵙⴻⵎⵎⴰⵏ ⵜⴻⵏⵜ ‘ⵛⴰⵎⵓⵏⴰⵜ’.
3 ⵉⵏⵏⴰ ⴰⵙⴻⵏ: “ⵙ ⵜⵉⴷⴻⵜⵜ, ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⴰⵇⴰ ⵜⴰⵊⵊⴰⵍⵜ-ⴰ ⵍⵎⴻⵙⴽⵉⵏⴰ ⵜⴻⵏⴹⴰⵔ ⴷⴰⵢⴻⵙ ⴽⵜⴰⵔ ⵣⵣⴰⵢⵙⴻⵏ ⵎⴰⵔⵔⴰ.
4 ⵎⵉⵏⵣⵉ ⵎⴰⵔⵔⴰ ⵏⵉⵜⵏⵉ ⵏⴹⴰⵔⴻⵏ ⵣⵉ ⵣⵣⵉⵢⴰⴷⴰ ⵏ ⵡⴰⴳⵍⴰ ⵏⵙⴻⵏ ⵉⵛⵜ ⵏ ⵚⵚⴻⴷⵇⴻⵜ ⴷⴻⴳ ⵡⴻⵅⵅⴰⵎ ⵏ ⵚⵚⴷⴰⵇⵉ ⵏ ⴰⵔⴻⴱⴱⵉ, ⵎⴰⵛⴰ ⵏⴻⵜⵜⴰⵜ ⵣⵉ ⵍⴻⵅⵚⴻⵚ ⵏⵏⴻⵙ ⴰⵇⴰ ⵜⴻⵏⴹⴰⵔ ⴷⴰⵢⴻⵙ ⵎⴰⵔⵔⴰ ⵎⵉⵏ ⵖⴰⵔⴻⵙ.”
5 ⴰⵍⴰⵎⵉ ⵜⵓⵖⴰ ⵛⴰ ⵏ ⵉⵡⴷⴰⵏ ⵙⵙⴰⵡⴰⵍⴻⵏ ⵅ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵜⴻⵏⵏⵉ ⵜⵣⴻⵡⵡⴻⵇ ⵙ ⵉⵥⵔⴰ ⵉⵚⴻⴱⵃⴻⵏ ⴷ ⵚⵚⴷⴰⵇⵉ, ⵉⵏⵏⴰ ⴰⵙⴻⵏ ⵢⴰⵙⵓⵄ:
6 “ⵎⴰ ⵜᵉⵜⵜⵡⴰⵍⴰⵎ ⵜⵉⵎⴻⵙⵍⴰⵢⵉⵏ-ⴰ? ⴰⴷ ⴷⴷ-ⴰⵙⴻⵏ ⵡⵓⵙⵙⴰⵏ ⵡⴰⵔ ⵉⵜⵜⵖⵉⵎⵉ ⵓⵍⴰ ⴷ ⵉⵊⵊ ⵏ ⵡⴻⵥⵔⵓ ⵅ ⵡⴻⵥⵔⵓ ⵏⵏⴻⵖⵏⵉ ⵉ ⵡⴰⵔ ⵉⵜⵜⴰⵔⴻⴷⴷⴵⴻⵏ.”
7 ⵙⵙⴻⵇⵙⴰⵏ ⵜ, ⵏⵏⴰⵏ: “ⴰ ⴰⵎⵙⴻⵖⵖⴰⵔ, ⵎⴻⵍⵎⵉ ⵉ ⵖⴰ ⵢⵉⵍⵉ ⵓⵢⴰ ⴷ ⵎⴰⵏ ⵍⴻⵄⵍⴰⵎⴻⵜ ⴰⵇⴰ ⵜⵉⵎⴻⵙⵍⴰⵢⵉⵏ-ⴰ ⵓⴷⵙⴻⵏⵜ-ⵉ-ⴷⴷ?”
8 ⵉⵏⵏⴰ ⴰⵙⴻⵏ: “ⵄⴻⵙⵙⴻⵎ, ⵡⴰⵔ ⵜᵉⵜⵜⵡⴰⵖⴰⵔⵔⴻⵎ, ⵎⵉⵏⵣⵉ ⴰⵟⵟⴰⵙ ⴰⴷ ⴷⴷ-ⴰⵙⴻⵏ ⵙ ⵢⵉⵙⴻⵎ ⵉⵏⵓ, ⴰⴷ ⵉⵏⵉⵏ: ‘ⴰⵇⴰ ⵏⴻⵛⵛ ⴷ ⵍⵎⴰⵙⵉⵃ!’ ⵓ: ‘ⵍⵡⴻⵇⵜ ⴰⵇⴰ ⵜⵉⵡⴻⴹ-ⴷⴷ!’, ⵎⴰⵛⴰ ⵡⴰⵔ ⴳⴳⵓⵔⴻⵎ ⴰⵡⴰⵔⵏⵉ ⴰⵙⴻⵏ.
9 ⵎⴰⵍⴰ ⵜⴻⵙⵍⵉⵎ ⵅ ⵍⴱⴰⵔⵓⴹ ⴷ ⵉⵖⴻⵡⵡⵖⴻⵏ, ⵡⴰⵔ ⵜⵜⵏⴻⵅⵍⵉⵄⴻⵎ ⵛⴰ, ⵎⵉⵏⵣⵉ ⵙ ⵓⵖⵉⵍ ⴰⴷ ⵢⵉⵍⵉ ⵓⵢⴰ ⴷ ⴰⵎⴻⵣⵡⴰⵔ, ⵎⴰⵛⴰ ⵡⴰⵔ ⵉⵜⵜⵉⵍⵉ ⵄⴰⴷ ⴷⴻⵖⵢⴰ ⵓⵏⴻⴳⴳⴰⵔ.
10 ⵎⴰⵖⴰⵔ ⵉⵊⵊ ⵏ ⵍⴳⴻⵏⵙ ⴰⴷ ⴷⴷ-ⵉⴳⴻⵄⵄⴻⴷ ⴹⵉⴷⴷ ⵏ ⵉⵊⵊ ⵏ ⵍⴳⴻⵏⵙ ⵏⵏⴻⵖⵏⵉ ⵓ ⵉⵛⵜ ⵏ ⵜⴳⴻⵍⴷⵉⵜ ⴹⵉⴷⴷ ⵏ ⵉⵛⵜ ⵏ ⵜⴳⴻⵍⴷⵉⵜ ⵏⵏⴻⵖⵏⵉⵜ.
11 ⴰⴷ ⵉⵍⵉⵏ ⵉⵏⵀⴻⵣⵣⵉⵢⵢⴻⵏ ⵏ ⵜⴻⵎⵎⵓⵔⵜ ⵎⵖⴰⵔⴻⵏ ⴷⵉ ⵄⵍⴰⵎ ⴽⵓⵍ ⵉⵎⵓⵛⴰⵏ ⴷ ⵍⴰⵥ ⴷ ⵊⵊⵔⴰⵢⴻⵃ ⴷ ⵜⵉⴳⴳⵯⵓⴷⵉ ⴷ ⵓⵙⵏⴻⵅⵍⵉⵄ. ⵓⵛⴰ ⴰⴷ ⴷⴷ-ⴱⴰⵏⴻⵏⵜ ⵍⴻⵄⵍⴰⵎⴰⵜ ⵎⵖⴰⵔⴻⵏⵜ ⵣⴻⴳ ⵓⵊⴻⵏⵏⴰ ⵓ ⴰⴷ ⴷⵉⵏ ⵉⵍⵉⵏⵜ ⵜⵃⴰⵔⵢⴰⴹⵉⵏ ⵉⵊⴻⵀⴷⴻⵏ.
12 ⵎⴰⵛⴰ ⵇⴱⴻⵍ ⵎⴰⵏ ⴰⵢⴰ ⵎⴰⵔⵔⴰ ⴰⴷ ⵅⴰⵡⴻⵎ ⵙⵙⴰⵔⵙⴻⵏ ⵉⴼⴰⵙⵙⴻⵏ, ⴰⴷ ⴽⴻⵏⵏⵉⵡ ⵙⴻⵍⵍⵎⴻⵏ ⵖⴰⵔ ⵜⴻⵎⵣⵉⴷⴰⵡⵉⵏ ⴷ ⵍⴻⵃⴱⵓⵙⴰⵜ, ⵓⵛⴰ ⴰⴷ ⴽⴻⵏⵏⵉⵡ ⵏⴻⴷⵀⴻⵏ ⵣⵣⴰⵜ ⵉ ⵉⵊⴻⴵⵉⴷⴻⵏ ⴷ ⵍⵃⵓⴽⴽⴰⵎ ⵅ ⵙⵙⵉⴱⴱⴻⵜ ⵏ ⵢⵉⵙⴻⵎ ⵉⵏⵓ.
13 ⵎⴰⵛⴰ ⵎⴰⵏ ⴰⵢⴰ ⴰⴷ ⵢⴰⵔⵔⴰ ⴽⴻⵏⵏⵉⵡ ⴰⴷ ⵜⵛⴻⵀⴷⴻⵎ.
14 ⴳⴳⴻⵎ ⴷⴻⴳ ⵡⵓⵍⴰⵡⴻⵏ ⵏⵡⴻⵎ ⵎⴰⵃⴻⵏⴷ ⵡⴰⵔ ⵜⴰⵔⴻⵣⵣⵓⵎ ⴰⴷ ⵜⵍⴻⵎⴷⴻⵎ ⵎⴰⵎⵎⴻⵛ ⵉ ⴷⴷ ⵖⴰ ⵜⴰⵔⵔⴻⵎ.
15 ⵎⵉⵏⵣⵉ ⵏⴻⵛⵛ ⴰⴷ ⴰⵡⴻⵎ ⵡⵛⴻⵖ ⴰⵇⴻⵎⵎⵓⵎ ⴷ ⵜⵉⵖⵉⵜ ⵉ ⵡⴰⵔ ⵣⴻⵎⵎⴰⵔⴻⵏ ⴰⴷ ⵜⴻⵏ ⵙⵙⴱⴻⴷⴷⴻⵏ ⵎⴰⵔⵔⴰ ⵍⵄⴻⴷⵢⴰⵏ ⵏⵡⴻⵎ.
16 ⴰⴷ ⴽⴻⵏⵏⵉⵡ ⵙⴻⵍⵍⵎⴻⵎ ⵍⵡⴰⵍⵉⴷⵉⵏ ⵏⵡⴻⵎ ⴷ ⵜⴰⵡⵎⴰⵜ ⵏⵡⴻⵎ ⴷ ⵍⴰⴵ ⵏⵡⴻⵎ ⴷ ⵉⵎⴻⴷⴷⵓⴽⴽⴰⵍ ⵏⵡⴻⵎ ⵓⵛⴰ ⴰⴷ ⵏⵖⴻⵏ ⵛⴰ ⵣⵣⴰⵢⵡⴻⵎ,
17 ⵓ ⴽⴻⵏⵏⵉⵡ ⴰⴷ ⵜᵉⵜⵜⵡⴰⵛⴰⵔⵀⴻⵎ ⵣⵉ ⵎⴰⵔⵔⴰ ⵙ ⵙⵙⵉⴱⴱⴻⵜ ⵏ ⵢⵉⵙⴻⵎ ⵉⵏⵓ.
18 ⵡⴰⵅⵅⴰ ⴰⵎⴻⵏⵏⵉ ⵓⵍⴰ ⴷ ⵉⵊⵊ ⵏ ⵓⵥⴻⵟⵟⵓ ⵏ ⵓⵛⵓⵡⵡⴰⴼ ⵏ ⵓⵣⴻⴵⵉⴼ ⵏⵡⴻⵎ ⵡⴰⵔ ⵉⵜⵜⵡⴻⴷⴷⴰⵔⵉ ⵛⴰ,
19 ⵎⴰⵛⴰ ⵙ ⵚⵚⴱⴰⵔ ⵏⵡⴻⵎ ⴰⴷ ⵜⴰⵔⴻⴱⵃⴻⵎ ⵍⴻⵄⵎⵓⵔ ⵏⵡⴻⵎ.”
20 “ⵅⵎⵉ ⵖⴰ ⵜⵥⴰⵔⴻⵎ ⵓⵔⵛⴰⵍⵉⵎ ⴰⵇⴰ ⵉⵏⵏⴻⴹ ⴰⵙ-ⴷⴷ ⵍⵄⴻⵙⴽⴰⵔ, ⵅⴻⵏⵏⵉ ⵙⵏⴻⵎ ⴱⴻⵍⵍⵉ ⴰⵇⴰ ⵉⵇⴰⵔⵔⴻⴱ-ⴷⴷ ⵡⴰⵔⴻⴷⴷⴻⴵ ⵏⵏⴻⵙ.
21 ⵅⴻⵏⵏⵉ ⵉⵜⵜⵅⴻⵚⵚⴰ ⴰⴷ ⴰⵔⴻⵡⵍⴻⵏ ⵉⵏⵏⵉ ⵉⴵⴰⵏ ⴷⵉ ⵢⴰⵀⵓⴷⵉⵢⵢⴰ ⵖⴰⵔ ⵉⴷⵓⵔⴰⵔ, ⴻⵊⵊ ⵉⵏⵏⵉ ⵉⴵⴰⵏ ⴷⵉ ⵍⵡⴻⵙⵟ ⵏⵏⴻⵙ ⴰⴷ ⵣⵣⴰⵢⴻⵙ ⴼⴼⵖⴻⵏ, ⴰⴷ ⴰⵔⴻⵡⵍⴻⵏ, ⴷ ⵢⵉⵏⵏⵉ ⵉⴵⴰⵏ ⴷⵉ ⴷⵛⵓⵔⴰⵜ, ⵡⴰⵔ ⵜⵜ ⵜⵜⵉⴷⴼⴻⵏ,
22 ⵎⵉⵏⵣⵉ ⵉⵏⴰ ⴷ ⵓⵙⵙⴰⵏ ⵏ ⵏⵏⴻⵇⵎⴻⵜ ⵃⵉⵎⴰ ⴰⴷ ⵉⵜⵜⵡⴰⴽⴻⵎⵎⴻⵍ ⵎⴰⵔⵔⴰ ⵎⵉⵏ ⵢⵓⵔⵉⵏ.
23 ⵓⵛⵜ ⵅ ⵜⴻⵎⵖⴰⵔⵉⵏ ⵏⵏⵉ ⵙ ⴷⴷⴻⵢⵙⴻⵜ ⴷ ⵜⵉⵏⵏⵉ ⵉⵙⵙⵓⵟⵟⵓⴹⴻⵏ ⴷⴻⴳ ⵡⵓⵙⵙⴰⵏ ⵏⵏⵉ, ⵎⵉⵏⵣⵉ ⴰⴷ ⴷⵉⵏ ⵜⵉⵍⵉ ⵍⵎⴻⵃⵏⴻⵜ ⴷ ⵜⴰⵎⴻⵇⵇⵔⴰⵏⵜ ⵅ ⵜⴻⵎⵎⵓⵔⵜ ⴷ ⵡⴻⵖⴹⴰⴱ ⵅ ⵍⴳⴻⵏⵙ-ⴰ.
24 ⵏⵉⵜⵏⵉ ⴰⴷ ⵡⴹⴰⵏ ⵙ ⵍⴻⵇⴹⴻⵄ ⵏ ⵙⵙⵉⴼ, ⴰⴷ ⵜⵜⵡⴰⵃⴻⴱⴱⵙⴻⵏ ⴰⵎ ⵜⵜⵡⴰⵏⴻⴷⵀⴻⵏ ⵊⴰⵔ ⵎⴰⵔⵔⴰ ⵍⴻⴳⵏⵓⵙ, ⵓⵛⴰ ⵓⵔⵛⴰⵍⵉⵎ ⴰⴷ ⵅⴰⵙ ⵄⴻⴼⵙⴻⵏ ⵍⴻⴳⵏⵓⵙ ⴰⵍ ⵖⴰ ⴽⴻⵎⵎⵍⴻⵏⵜ ⵣⵣⵎⴰⵏⴰⵜ ⵏ ⵍⴻⴳⵏⵓⵙ.”
25 “ⴰⴷ ⴷⵉⵏ ⵉⵍⵉⵏⵜ ⵍⴻⵄⵍⴰⵎⴰⵜ ⴷⵉ ⵜⴼⵓⵛⵜ, ⴷⵉ ⵜⵣⵉⵔⵉ ⵓ ⴷⴻⴳ ⵉⵜⵔⴰⵏ, ⵓⵛⴰ ⵅ ⵜⴻⵎⵎⵓⵔⵜ ⴰⴷ ⴷⵉⵏ ⵜⵉⵍⵉ ⵍⵎⴻⵃⵏⴻⵜ ⴷⵉ ⵍⴻⴳⵏⵓⵙ, ⴰⵍ ⴷ ⴰⵙⴻⵏ ⵉⵡⴻⴷⴷⴰⵔ ⵎⵉⵏ ⵖⴰ ⴳⴳⴻⵏ ⵣⴻⴳ ⵓⵏⴻⵅⵍⵉⵄ ⵏ ⵣⵣⵀⵉⵔ ⴰⵎⴻⵇⵇⵔⴰⵏ ⵏ ⵍⴻⴱⵃⴰⵔ,
26 ⵓ ⵣⴻⴳ ⵡⴻⵏⵀⴻⵣⵣⵉ ⵏ ⵜⴻⵎⵎⵓⵔⵜ ⴷ ⴰⵎⴻⵇⵇⵔⴰⵏ ⴰⴷ ⵉⵙⵙⵏⴻⵅⵍⵉⵄ ⵍⴻⵄⵎⴰⵔ ⵏ ⵉⵡⴷⴰⵏ ⵣⵉ ⵜⵉⴳⴳⵯⵓⴷⵉ ⵣⵉ ⵎⵉⵏ ⵉ ⴷⴷ ⵖⴰ ⵢⴰⵙⴻⵏ ⵅ ⵜⴻⵎⵎⵓⵔⵜ, ⵓ ⵚⵚⵓⵍⴰⵟⴰⵜ ⵏ ⵉⵊⴻⵏⵡⴰⵏ ⴰⴷ ⵜⵜⵡⴰⵏⵀⴻⵣⵣⴻⵏⵜ.
27 ⵍⴻⵅⴷⴻⵏⵏⵉ ⴰⴷ ⵥⴰⵔⴻⵏ ⵎⵎⵉⵙ ⵏ ⴱⵏⴰⴷⴻⵎ, ⵅⵎⵉ ⴷⴷ ⵖⴰ ⵢⴰⵙ ⴷⴻⴳ ⵉⵙⴻⵢⵏⵓⵜⴻⵏ, ⵙ ⵊⵊⴻⵀⴷ ⴷ ⵓⵄⵓⴵⵉ ⴰⵟⵟⴰⵙ.
28 ⵅⵎⵉ ⵖⴰ ⴱⴷⴰⵏⵜ ⵜⵎⴻⵙⵍⴰⵢⵉⵏ-ⴰ, ⴳⴳⴻⵎ ⵜⴰⵔⵢⴰⵙⵜ, ⵙⴳⴻⵄⵄⴷⴻⵎ ⵉⵣⴻⴵⵉⴼⴻⵏ ⵏⵡⴻⵎ ⵎⵉⵏⵣⵉ ⴰⵙⴻⵏⵊⴻⵎ ⵏⵡⴻⵎ ⴰⵇⴰ ⵢⵉⵡⴻⴹ-ⴷⴷ.”
29 ⵉⵄⴰⵡⴻⴷ ⴰⵙⴻⵏ ⵉⵊⵊ ⵏ ⵓⵎⴻⴷⵢⴰ: “ⵅⵣⴰⵔⴻⵎ ⵖⴰⵔ ⵡⴰⵔⵜⵓ ⵏ ⵜⴰⵣⴰⵔⵜ ⵓ ⵖⴰⵔ ⵎⴰⵔⵔⴰ ⵜⵉⵛⴻⵊⵊⵓⵔⴰ.
30 ⵅⵎⵉ ⵖⴰ ⵙⵙⵏⴻⴹⵢⴻⵏⵜ, ⴰⴷ ⵜⴻⵙⵙⵏⴻⵎ ⵙ ⵎⴰⵏ ⴰⵢⴰ ⴰⵇⴰ ⴰⵏⴻⴱⴷⵓ ⵢⵉⵡⴻⴹ-ⴷⴷ.
31 ⴰⵎⵎⵓ ⵉⵜⵜⵅⴻⵚⵚⴰ ⵄⴰⵡⴻⴷ ⴽⴻⵏⵏⵉⵡ, ⵅⵎⵉ ⵖⴰ ⵜᵉⵜⵜⵡⴰⵍⴰⵎ ⵜⵉⵎⴻⵙⵍⴰⵢⵉⵏ-ⴰ ⵜⵜⴻⵎⵙⴰⵔⴰⵏⵜ, ⵙⵏⴻⵎ ⵅⴻⵏⵏⵉ ⴱⴻⵍⵍⵉ ⵜⴰⴳⴻⵍⴷⵉⵜ ⵏ ⴰⵔⴻⴱⴱⵉ ⵜⵓⴷⴻⵙ-ⴷⴷ.
32 ⵙ ⵜⵉⴷⴻⵜⵜ ⴰⴷ ⴰⵡⴻⵎ ⵉⵏⵉⵖ, ⴰⵇⴰ ⵡⴰⵔ ⵉⵄⴻⴷⴷⵓ ⵊⵊⵉⵍ-ⴰ ⴰⵍ ⵖⴰ ⵢⵉⵍⵉ ⵓⵢⴰ ⴽⵓⵍⵛⵉ.
33 ⴰⵊⴻⵏⵏⴰ ⴷ ⵜⴻⵎⵎⵓⵔⵜ ⴰⴷ ⵄⴻⴷⴷⵓⵏ, ⵎⴰⵛⴰ ⴰⵡⴰⵍⴻⵏ ⵉⵏⵓ ⵡⴰⵔ ⵄⴻⴷⴷⵓⵏ ⵄⴻⵎⵎⴰⵔⵚ.
34 ⵃⴹⴰⵎ ⵉⵅⴻⴼ ⵏⵡⴻⵎ ⵃⵉⵎⴰ ⵡⴰⵔ ⵜⵜⴻⴹⵇⵉⵍⴻⵏ ⵡⵓⵍⴰⵡⴻⵏ ⵏⵡⴻⵎ ⵣⴻⴳ ⵓⴼⵓⵛⵛⴻⵃ ⴷ ⵡⴻⵙⵛⴰⵔ ⴷ ⵉⵎⵓⵏⴰⵙ ⵏ ⴷⴷⵓⵏⴻⵛⵜ-ⴰ, ⵓ ⵡⴰⵔ ⵅⴰⵡⴻⵎ ⴷⴷ-ⵉⵡⴹⵉ ⵡⴰⵙⵙ ⵏⵏⵉ ⴷⴻⵖⵢⴰ.
35 ⵎⵉⵏⵣⵉ ⴰⴷ ⴷⴷ-ⵢⴰⵙ ⴰⵙⵙ ⵏⵏⵉ ⴰⵎ ⵍⴼⴻⵅ ⵅ ⵎⴰⵔⵔⴰ ⵉⵏⵏⵉ ⵉⵇⵇⵉⵎⴻⵏ ⵅ ⵓⵖⴻⵎⴱⵓⴱ ⵏ ⵜⴻⵎⵎⵓⵔⵜ.
36 ⵃⴹⴰⵎ ⵅⴻⵏⵏⵉ ⵍⴻⴱⴷⴰ, ⵥⴰⴵⴻⵎ ⵃⵉⵎⴰ ⴰⴷ ⵜⵉⵍⵉⵎ ⵜⴻⵙⴷⴰⵀⴻⴵⴻⵎ ⵎⴰⵃⴻⵏⴷ ⴰⴷ ⵜⵏⴻⵊⵎⴻⵎ ⵣⵉ ⵎⴰⵔⵔⴰ ⵎⵉⵏ ⵖⴰ ⵉⵎⵙⴰⵔⴻⵏ, ⵓⵛⴰ ⴰⴷ ⵜⴱⴻⴷⴷⴻⵎ ⵣⵣⴰⵜ ⵉ ⵎⵎⵉⵙ ⵏ ⴱⵏⴰⴷⴻⵎ.”
37 ⵙ ⵓⵣⵉⵍ ⵜⵓⵖⴰ ⵉⵙⵙⴻⵍⵎⴰⴷ ⴷⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵎⴰⵛⴰ ⵙ ⴵⵉⵍⴻⵜ ⵜⵓⵖⴰ ⵉⵜⵜⴻⴼⴼⴻⵖ, ⵉⵜⵜⵖⵉⵎⴰ ⵉⵜⵜⵏⵓⵙⴰ ⵅ ⵡⴻⴷⵔⴰⵔ ⵓⵎⵉ ⵇⵇⴰⵔⴻⵏ: ‘ⵜⴰⴷⴷⴰⵔⵜ ⵏ ⵣⵣⵉⵜⵓⵏ’.
38 ⴷⵉ ⵚⵚⴱⴻⵃ ⵣⵉⵛ ⵜⵓⵖⴰ ⵎⴰⵔⵔⴰ ⵉⵡⴷⴰⵏ ⵜⵜⴰⵙⴻⵏ-ⴷⴷ ⵖⴰⵔⴻⵙ ⴷⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵃⵉⵎⴰ ⴰⴷ ⵙⵍⴻⵏ ⴰⵡⴰⵍ ⵏⵏⴻⵙ.