1 ⵎⴰⵏ ⴰⵢⴰ ⵜⵓⵖⴰ ⴷ ⵉⵛⵜ ⵏ ⵜⵎⴻⵙⵍⴰⵛⵜ ⵜⴰⵄⴻⴼⴼⴰⵏⵜ ⴰⵍ ⵟⵟⴰⵔⴼ ⵉ ⵢⵓⵏⵓⵙ ⵓⵛⴰ ⵜⵀⴰⵊ ⵜⴻⴼⵇⴻⵃⵜ ⵏⵏⴻⵙ.
2 ⵉⵥⵥⵓⴵ ⵉ ⵙⵉⴷⵉ, ⵉⵏⵏⴰ: “ⴰ ⵙⵉⴷⵉ, ⵎⴰ ⵡⴰⵔ ⵏⵏⵉⵖ ⴰⵎⵎⵓ ⵓⵎⵉ ⴷ ⴰⵢⵉ ⵜⵓⵖⴰ ⴷⵉ ⵜⴻⵎⵎⵓⵔⵜ ⵉⵏⵓ? ⵅ ⵓⵢⴰ ⵏⵡⵉⵖ ⴰⴷ ⵜⵜ ⵊⵊⴻⵖ ⵓⵎⵉ ⴳⴳⵉⵖ ⴰⴷ ⴰⵔⴻⵡⵍⴻⵖ ⵖⴰⵔ ⵜⴰⵔⵛⵉⵛ ⵎⵉⵏⵣⵉ ⵏⴻⵛⵛ ⵙⵙⵏⴻⵖ ⴱⴻⵍⵍⵉ ⵛⴻⴽ ⴷ ⵉⵊⵊ ⵏ ⴰⵔⴻⴱⴱⵉ ⴷ ⴰⵃⵏⵉⵏ ⴷ ⴰⵔⵃⵉⵎ, ⵖⴰⵔⴻⴽ ⵜⵜⴰⵙⵉⵄ ⵏ ⵍⵅⴰⴹⴰⵔ ⴷ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵜⴰⵎⴻⵇⵇⵔⴰⵏⵜ ⵓⵛⴰ ⵜⵏⴻⴷⵎⴻⴷ ⴰⴷ ⵜⴻⴳⴳⴻⴷ ⵍⵖⴰⵔ.
3 ⵅⴻⵏⵏⵉ ⵍⴻⵅⵅⵓ, ⴰ ⵙⵉⴷⵉ, ⴽⴽⴻⵙ ⵣⵣⴰⵢⵉ ⵍⴻⵄⵎⴰⵔ ⵉⵏⵓ, ⵎⵉⵏⵣⵉ ⵉⵜⵜⴱⴰⵏ ⴰⵢⵉ ⴱⴻⵍⵍⵉ ⵍⵎⴻⵡⵜ ⵉⵏⵓ ⵃⵙⴻⵏ ⵣⵉ ⵜⵓⴷⴰⵔⵜ ⵉⵏⵓ.”
4 ⵉⵏⵏⴰ ⵙⵉⴷⵉ: “ⵎⴰ ⵜⴻⵛⵏⴰ ⵓⵎⵉ ⵜⵅⴻⵢⵢⵇⴻⴷ ⴰⵎⵎⵓ?”
5 ⵉⴼⴼⴻⵖ ⵢⵓⵏⵓⵙ ⵣⵉ ⵜⴻⵏⴷⵉⵏⵜ ⵓⵛⴰ ⵉⵔⵓⵃ ⵉⵇⵇⵉⵎ ⴷⵉ ⵊⵊⵉⵀⴻⵜ ⵏ ⵛⵛⴰⵔⵇ ⵏ ⵜⴻⵏⴷⵉⵏⵜ ⵎⴰⵏⵉ ⵉⴳⴳⴰ ⵉ ⵢⵉⵅⴻⴼ ⵏⵏⴻⵙ ⵜⴰⵙⴻⵇⵇⴰⴼⵜ ⵏ ⵉⴼⴻⵜⵡⴰⵏ ⵓⵛⴰ ⵉⵇⵇⵉⵎ ⵙⵡⴰⴷⴷⴰⵢ ⵏⵏⴻⵙ ⴷⵉ ⵜⵉⵍⵉ ⵎⴰⵃⴻⵏⴷ ⴰⴷ ⵉⵥⴰⵔ ⵎⵉⵏ ⵖⴰ ⵉⵎⵙⴰⵔⴻⵏ ⵉ ⵜⴻⵏⴷⵉⵏⵜ.
6 ⵜⵓⵖⴰ ⵙⵉⴷⵉ ⴰⵔⴻⴱⴱⵉ ⵉⵙⵙⴻⵡⵊⴻⴷ ⵉⵛⵜ ⵏ ⵜⵛⴻⵊⵊⴰⵔⵜ ⵏ ⵓⵜⴻⴱⵀⴻⵜ ⵓⵛⴰ ⵉⵊⵊⴰ-ⵉ-ⵜⵜ ⴰⴷ ⵜⴻⵢⵎⴰ ⵜⵓⵄⵍⴰ ⵅ ⵢⵓⵏⵓⵙ ⵃⵉⵎⴰ ⴰⴷ ⵜⵉⵍⵉ ⴷ ⵜⵉⵍⵉ ⵅ ⵓⵣⴻⴵⵉⴼ ⵏⵏⴻⵙ ⵓ ⵃⵉⵎⴰ ⴰⴷ ⵉⴽⴽⴻⵙ ⵓⵅⴻⵢⵢⴻⵇ ⵏⵏⴻⵙ. ⵉⴼⴰⵔⵃ ⵢⵓⵏⵓⵙ ⴰⵟⵟⴰⵙ ⵅ ⵜⵛⴻⵊⵊⴰⵔⵜ-ⴰ ⵏ ⵍⴻⵄⵊⴻⴱ.
7 ⵎⴰⵛⴰ ⵖⴰⵔ ⵍⴻⴼⵊⴰⵔ ⵏ ⵜⵡⴻⵛⵛⴰ ⵏ ⵡⴰⵙⵙ ⵉ ⴷⴷ-ⵉⴹⴼⴰⵔⴻⵏ ⵉⵙⵙⴻⵡⵊⴻⴷ ⴰⵔⴻⴱⴱⵉ ⵉⵛⵜ ⵏ ⵜⴽⴻⵛⵛⴰ ⵏⵏⵉ ⵜⴻⵙⵙⴻⵃⵍⴻⵛ ⵜⴰⵛⴻⵊⵊⴰⵔⵜ ⵏ ⵓⵜⴻⴱⵀⴻⵜ ⵏⵏⵉ ⴰⵍⴰⵎⵉ ⵜⵓⵥⴻⵖ.
8 ⴰⵍⴰⵎⵉ ⴷⴷ-ⵜⴻⵏⵇⴰⵔ ⵜⴼⵓⵛⵜ, ⵉⵎⵙⴰⵔ ⴱⴻⵍⵍⵉ ⴰⵔⴻⴱⴱⵉ ⵉⵙⵙⴻⴽⴽ ⵉⵊⵊ ⵏ ⵓⵙⴻⵎⵎⵉⴹ ⵏ ⵛⵛⴰⵔⵇ ⵉⵃⴰⵔⵔⴻⵏ ⵓⵛⴰ ⵜⴻⵡⵜⴰ ⵜⴼⵓⵛⵜ ⴰⵣⴻⴵⵉⴼ ⵏ ⵢⵓⵏⵓⵙ ⴰⵍⴰⵎⵉ ⵉⴷⴻⵡⵡⴻⵅ ⵓⵛⴰ ⵏⴻⵜⵜⴰ ⵢⴰⵔⵣⵓ ⴰⴷ ⵉⵎⵎⴻⵜ, ⵉⵏⵏⴰ: “ⵉⵜⵜⴱⴰⵏ ⴰⵢⵉ ⴱⴻⵍⵍⵉ ⵍⵎⴻⵡⵜ ⵉⵏⵓ ⵃⵙⴻⵏ ⵣⵉ ⵜⵓⴷⴰⵔⵜ ⵉⵏⵓ.”
9 ⵅⴻⵏⵏⵉ ⵉⵏⵏⴰ ⴰⵙ ⴰⵔⴻⴱⴱⵉ ⵉ ⵢⵓⵏⵓⵙ: “ⵎⴰ ⵜⴻⵛⵏⴰ ⵓⵎⵉ ⵜⵅⴻⵢⵢⵇⴻⴷ ⴰⵎⵎⵓ ⵅ ⵜⵛⴻⵊⵊⴰⵔⵜ-ⴰ ⵏ ⵓⵜⴻⴱⵀⴻⵜ?” ⵉⵏⵏⴰ: “ⴰⵇⴰ ⴷ ⵚⵚⴻⵃ ⴰⵇⴰ ⵅⴻⵢⵢⵇⴻⵖ, ⴰⵍⴰⵎⵉ ⵣⴻⵎⵎⴰⵔⴻⵖ ⴰⴷ ⵎⵎⵜⴻⵖ!”
10 ⵉⵏⵏⴰ ⴰⵙ ⵙⵉⴷⵉ: “ⵛⴻⴽ ⵜⴻⵣⵣⵉⴵⴻⵣ ⴰⵛ ⵜⵛⴻⵊⵊⴰⵔⵜ ⵏ ⵓⵜⴻⴱⵀⴻⵜ ⵉ ⵓⵎⵉ ⵡⴰⵔ ⵜⵅⴻⴷⵎⴻⴷ ⵓ ⵉ ⵓⵎⵉ ⵡⴰⵔ ⵜⴻⵙⵙⴻⵢⵎⴻⴷ, ⴷ ⵜⴻⵏⵏⵉ ⴷⴷ-ⵢⵓⵙⵉⵏ ⴷⴻⴳ ⵉⵛⵜ ⵏ ⴵⵉⵍⴻⵜ ⵓⵛⴰ ⵜᵉⵜⵜⵡⴰⵀⴻⵍⵍⴻⴽ ⴷⴻⴳ ⵉⵛⵜ ⵏ ⴵⵉⵍⴻⵜ.
11 ⵎⴰ ⵏⴻⵛⵛ ⵡⴰⵔ ⴷ ⴰⵢⵉ ⵜⴻⵣⵣⵉⴵⴻⵣ ⵜⴻⵏⴷⵉⵏⵜ ⵏ ⵏⵉⵏⵡⴰ ⵜⴰⵎⴻⵇⵇⵔⴰⵏⵜ ⵜⴻⵏⵏⵉ ⵉ ⴷⵉ ⵉⴵⴰ ⴽⵜⴰⵔ ⵣⵉ ⵎⵢⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵉⵡⴷⴰⵏ ⵉⵏⵏⵉ ⵡⴰⵔ ⵉⵙⵙⵉⵏⴻⵏ ⵍⴼⴰⵔⵇ ⵊⴰⵔ ⵓⴼⵓⵙ ⵏⵙⴻⵏ ⴰⴼⵓⵙⵉ ⴷ ⵓⴼⵓⵙ ⵏⵙⴻⵏ ⴰⵣⴻⵍⵎⴰⴹ ⵓ ⵙⴻⵏⵏⴻⵊ ⵉ ⵓⵢⴰ ⴰⵇⴰ ⴷⵉⵏ ⴰⵟⵟⴰⵙ ⵏ ⵍⴻⴱⵀⴰⵢⴻⵎ?”