1 “ⴰⴷ ⵉⴼⴰⵔⵃ ⵍⴻⵅⵍⴰ ⴷ ⵜⴻⵎⵎⵓⵔⵜ ⵢⵓⵥⵖⴻⵏ, ⴰⴷ ⵜⴻⵙⵍⵉⵡⵍⴻⵡ ⵍⴻⵡⴹⴰ, ⴰⴷ ⵜⵏⴻⵡⵡⴰⵔ ⴰⵎ ⵜⵏⴻⵡⵡⴰⵛⵜ ⵡⴰⵔ ⵣⵣⴰⵢⴻⵙ ⵡⴹⴰⵏⵜ ⵜⵉⴼⵔⴰⵢ ⵄⴻⵎⵎⴰⵔⵚ.
2 ⴰⴷ ⵜⵏⴻⵡⵡⴰⵔ ⴰⴷ ⵜⵛⵓⵡⵡⴰⵔ, ⵡⴰⵀ, ⴰⴷ ⵜⴻⵙⵍⴻⵡⵍⵉⵡ ⵍⴻⵡⴹⴰ ⵙ ⵍⴻⴼⵔⴰⵃⴻⵜ ⴷ ⵓⵙⵍⵉⵡⵍⴻⵡ. ⴰⴷ ⴰⵙ ⵉⵎⵎⴻⵡⵛ ⵓⵄⵓⴵⵉ ⵏ ⵍⵓⴱⵏⴰⵏ, ⵍⵄⴻⵣⵣ ⵏ ⴽⴰⵔⵎⵉⵍ ⵓ ⵏ ⵍⴻⵡⴹⴰ ⵏ ⵛⴰⵔⵓⵏ. ⵏⵉⵜⵏⵉ ⴰⴷ ⵥⴰⵔⴻⵏ ⴰⵄⵓⴵⵉ ⵏ ⵙⵉⴷⵉ, ⵍⵄⴻⵣⵣ ⵏ ⴰⵔⴻⴱⴱⵉ ⵏⵏⴻⵖ.”
3 “ⵙⵎⴻⵃⴹⴻⵎ ⵉⴼⴰⵙⵙⴻⵏ ⴰⵔⵅⵓⵏ ⵓ ⵙⵊⴻⵀⴷⴻⵎ ⵉⴼⴰⴷⴷⴻⵏ ⵉⵜⵜⴻⵎⵔⴰⵢⵡⴰⵏ.
4 ⵉⵏⵉⵎ ⵉ ⵢⵉⵏⵏⵉ ⵖⴰⵔ ⵉⴵⴰ ⵓⵍ ⵉⴳⴳⵯⴻⴷ: ‘ⵉⵍⵉⵎ ⴷ ⵉⵔⵢⴰⵣⴻⵏ, ⵡⴰⵔ ⵜⵜⴻⴳⴳⵯⴻⴷⴻⵎ! ⵅⵣⴰⵔⴻⵎ, ⴰⵔⴻⴱⴱⵉ ⵏⵡⴻⵎ ⴰⴷ ⵉⵅⵍⴻⴼ, ⴰⴷ ⴷⴷ-ⵢⴰⵙ ⵡⴻⵅⵍⴰⴼ ⵏ ⴰⵔⴻⴱⴱⵉ, ⵏⴻⵜⵜⴰ ⴰⴷ ⴷⴷ-ⵢⴰⵙ ⵙ ⵢⵉⵅⴻⴼ ⵏⵏⴻⵙ, ⴰⴷ ⴽⴻⵏⵏⵉⵡ ⵉⵙⵙⴻⵏⵊⴻⵎ.’
5 ⵅⴻⵏⵏⵉ ⴰⴷ ⵏⵏⵓⵔⵣⵎⴻⵏⵜ ⵜⵉⵟⵟⴰⵡⵉⵏ ⵏ ⵉⴹⴰⵔⵖⴰⵍⴻⵏ ⵓⵛⴰ ⴰⴷ ⵜⵜⵡⴰⵔⴻⵣⵎⴻⵏ ⵉⵎⴻⵣⵣⵓⵖⴻⵏ ⵏ ⵉⴷⵓⵀⵛⴰⵔ.
6 ⵅⴻⵏⵏⵉ ⴰⴷ ⵉⵏⴳⴻⵣ ⵓⵇⵉⴷⴰⵔ ⴰⵎ ⵓⴷⴰⴷ ⵓⵛⴰ ⵉⵍⴻⵙ ⵏ ⵓⵣⵉⵏⵓⵏ ⴰⴷ ⵉⵙⵍⵉⵡⵍⴻⵡ, ⵎⴰⵖⴰⵔ ⴰⴷ ⴷⴷⵓⵇⵇⵣⴻⵏ ⵡⴰⵎⴰⵏ ⴷⵉ ⵍⴻⵅⵍⴰ ⵓⵍⴰ ⴷ ⵜⵉⵖⵣⴰⵔⵉⵏ ⴷⵉ ⵍⴻⵡⴹⴰ.
7 ⵜⴰⵎⵎⵓⵔⵜ ⵢⵓⵥⵖⴻⵏ ⴰⴷ ⵜⴻⴷⵡⴻⵍ ⴷ ⵙⵙⴰⵔⵉⵊ ⵓ ⵜⴰⵎⵎⵓⵔⵜ ⵉⴼⴼⵓⴷⴻⵏ ⴷ ⵜⴰⵍⴰⵡⵉⵏ ⵉⵜⵜⴱⴻⵇⴱⵓⵇⴻⵏ. ⴷⵉ ⵜⴻⵎⵎⵓⵔⵜ ⵏ ⵡⵓⵛⵛⴰⵏⴻⵏ ⵏ ⵍⴻⵅⵍⴰ, ⵎⴰⵏⵉ ⴰⵔⵔⴻⵢⵃⴻⵏ, ⴰⴷ ⵢⵉⵍⵉ ⴰⵔⴱⵉⵄ ⴰⴽ-ⴷ ⵓⵖⴰⵏⵉⵎ ⴷ ⵡⴻⵣⵔⴰⴼ.”
8 “ⴰⴷ ⴷⵉⵏ ⵢⵉⵍⵉ ⵉⵊⵊ ⵏ ⵡⴻⴱⵔⵉⴷ ⵉⵙⴻⴳⴳⵎⴻⵏ, ⴰⴱⵔⵉⴷ ⵏⵏⵉ ⵉ ⵖⴰ ⵍⴰⵖⴰⵏ ‘ⴰⴱⵔⵉⴷ ⴰⵎⵇⴻⴷⴷⴰⵙ!’. ⵓⵍⴰ ⴷ ⵉⵊⵊ ⵏ ⵓⵎⴻⵅⵎⵓⵊ ⵡⴰⵔ ⵅⴰⵙ ⵉⴳⴳⵓⵔ, ⵎⴰⵛⴰ ⴰⴷ ⵢⵉⵍⵉ ⵉ ⵏⵉⵜⵏⵉ: ⵎⴰⵏ ⵡⴻⵏ ⵎⴰ ⵉⴳⴳⵓⵔⴻⵏ ⵅ ⵡⴻⴱⵔⵉⴷ-ⴰ, ⵄⴰⴷ ⵉⴱⵓⵀⴰⵍⵉⵢⵢⴻⵏ ⵡⴰⵔ ⵜⵜⵡⴻⴷⴷⵉⵔⵉⵏ.
9 ⵡⴰⵔ ⴷⵉⵏⵏⵉ ⵉⵜⵜⵉⵍⵉ ⵡⴰⵢⵔⴰⴷ, ⵡⴰⵀ, ⵡⴰⵔ ⵅⴰⵙ ⵉⵜⵜⴳⵉⵄⵄⵉⴷ ⵏⵉⵖ ⴰⴷ ⵉⵜⵜⵡⴰⴼ ⴷⵉⵏ ⵓⵍⴰ ⴷ ⵉⵊⵊ ⵏ ⵍⵡⴻⵃⵛ ⵉⵜⵜⵛⴰⵔⵔⴻⴳ, ⵎⴰⵛⴰ ⵉⵏⵏⵉ ⵉⵜⵜⵡⴰⴼⴻⴽⴽⴻⵏ ⴰⴷ ⵅⴰⵙ ⵓⵢⵓⵔⴻⵏ.
10 ⵉⵏⵏⵉ ⵉⵜⵜⵡⴰⵚⴻⵍⵃⴻⵏ ⵣⵉ ⵙⵉⴷⵉ ⴰⴷ ⵄⴻⵇⴱⴻⵏ, ⴰⴷ ⴷⴷ-ⴰⵙⴻⵏ ⵙⵍⵉⵡⵍⵉⵡⴻⵏ ⵖⴰⵔ ⵚⵉⵀⵢⵓⵏ. ⵍⴻⴼⵔⴰⵃⴻⵜ ⵏ ⵍⴻⴱⴷⴰ ⴰⴷ ⵜⴰⵔⵙⴰ ⵅ ⵉⵣⴻⴵⵉⴼⴻⵏ ⵏⵙⴻⵏ. ⴰⴼⴰⵔⵔⴻⵊ ⴷ ⵍⴻⴼⵔⴰⵃⴻⵜ ⴰⴷ ⵖⴰⵔⵙⴻⵏ ⴰⵡⴹⴻⵏ, ⴰⵛⴹⴰⵏ ⴷ ⵡⴻⵙⵃⵉⵙⵙⴻⴼ ⴰⴷ ⵣⵣⴰⵢⵙⴻⵏ ⴰⵔⴻⵡⵍⴻⵏ.”