1 مَا وَارْ ثتّْڒِيغِي ثِيغِيثْ ؤُ وَارْ ثسْڭِيعِّيذْ
2 خْ ثْقِيشَّاثْ ن ڒڭْعُوذِي خْ وبْرِيذْ،
3 غَارْ ؤُغزْذِيسْ ن ثوُّورَا،
4 ”إِ كنِّيوْ، أَ إِرْيَازنْ، تّْڒَاغِيغْ،
5 كنِّيوْ إِحَافِييّنْ،
6 سْڒمْ، مِينْزِي أَذْ سِّيوْڒغْ
7 مَاغَارْ أَنغْ إِنُو أَذْ يِينِي ثِيذتّْ س نّيّثْ،
8 مَارَّا أَوَاڒنْ ن ؤُقمُّومْ إِنُو
9 أَقَا أَثنْ مَارَّا صْفَانْ
10 كْسِيمْ تَّارْبِييّثْ إِنُو، وَارْ إِدْجِي نُّوقَارْثْ،
11 مَاغَارْ ثِيغِيثْ حْسنْ زِي ڒْمَارْجَانْ،
12 نشّْ، ثِيغِيثْ، زدّْغغْ غَارْ وفْثَانْ،
13 ثِيڭّْوُوذِي ن سِيذِي ذ أَشْرَاهْ ن ڒْغَارْ،
14 غَارِي أَشَاوَارْ ذ ثْوِيزَا،
15 زَّايِي حكّْمنْ إِجدْجِيذنْ،
16 زَّايِي حكّْمنْ ڒْحُوكَّامْ
17 نشّْ تّخْسغْ مَارَّا
18 أَڭْڒَا ذ شَّانْ أَقَا أَثنْ غَارِي،
19 فْرُوثَا إِنُو ثشْنَا خْ وُورغْ إِتِّيسِّيقنْ،
20 نشّْ ڭُّورغْ خْ ؤُمسْرُوقْ ن ثْسڭْذَا،
21 حِيمَا أَذْ أَرّغْ إِنِّي ذ أَيِي إِتّخْسنْ
22 سِيذِي إِڭَّا أَيِي، ذ أَمزْوَارُو ن وبْرِيذْ نّسْ،
23 زِي ڒبْذَا إِتّْوَازدْجعْ خَافِي جّهْذْ،
24 ؤُمِي وَارْ ذِينْ ثُوغِي عَاذْ أَمَانْ إِهوْڒنْ،
25 قْبڒْ مَا أَذْ تّْوَاڭّنْ إِذُورَارْ،
26 نتَّا ثُوغَا عَاذْ وَارْ د-إِخْڒِيقْ
27 ؤُمِي نتَّا إِڭَّا إِجنْوَانْ، ثُوغَا أَيِي ذِينْ،
28 ؤُمِي نتَّا إِڭَّا إِسيْنُوثنْ سنّجْ،
29 ؤُمِي نتَّا إِڭَّا إِ ڒبْحَارْ أَيْمِيرْ نّسْ،
30 ثُوغَا أَيِي ذ أَمُوذْرُوسْ إِعِيزّنْ
31 تِّيرَارغْ ذِي مَارَّا ثَامُّورْثْ نّسْ،
32 خنِّي ڒخُّو، أَ إِحنْجِيرنْ إِنُو،
33 سْڒمْ غَارْ تَّارْبِييّثْ
34 سّعْذْ ن بْنَاذمْ نِّي غَارِي إِسْڒَانْ،
35 مَاغَارْ ونِّي ذ أَيِي يُوفِينْ، أَذْ يَافْ ثُوذَارْثْ،
36 ونِّي إِ ذ أَيِي إِخْضَانْ، إِيزّمْ ڒعْمَارْ نّسْ،