1 ؤُشَا يِيوضْ نتَّا غَارْ ؤُجمَّاضِينْ ن ڒبْحَارْ ذِي ثمُّورْثْ ن ڭَاذَارِينِيسْ.
2 ؤُمِي د-إِفّغْ زِي ثْغَارَّابُوثْ، إِڒْقَا إِ-ث إِجّْ ن بْنَاذمْ زڭْ إِمضْڒَانْ ذَايسْ إِجّْ ن ڒَارْيَاحْ ذ أَمنْڭُوسْ.
3 ثُوغَا إِزدّغْ ذڭْ إِمضْڒَانْ ؤُشَا وَارْ إِزمَّارْ حذْ أَذْ ث إِشَارْفْ ؤُڒَا س سّْنَاسڒْ،
4 مِينْزِي وَاخَّا ثُوغَا شَارْفنْ ث أَطَّاسْ ن ثْوَاڒَاوِينْ س إِشذِّييّنْ غَارْ إِضَارنْ ؤُ س سّْنَاسڒْ، أَقَا نتَّا إِقْضُو سّْنَاسڒْ نِّي، يَارْژَا إِشذِّييّنْ ؤُ وَارْ إِزمَّارْ حذْ أَذْ ث إِقمّعْ.
5 ثُوغَا-ث ڒبْذَا، أَسّْ ذ دْجِيڒثْ، ذڭْ إِذُورَارْ ؤُ ذڭْ إِمضْڒَانْ، إِسْغُويُّو، إِيزّمْ إِخفْ نّسْ س إِژْرَا.
6 ؤُمِي إِژْرَا نتَّا يَاسُوع زِي ڒَاڭّْوَاجْ، يُوزّڒْ ؤُشَا إِسْجذْ أَسْ.
7 إِسْغُويْ س جّهْذْ ؤُشَا إِنَّا أَسْ: ”مِينْ ذِينْ جَارْ أَيِي أَكِيذكْ، أَ يَاسُوع، مِّيسْ ن أَربِّي، أَمْعُودْجِي خْ كُوڒْشِي. تّْزَاوْڭغْ شكْ س أَربِّي، وَارْ ذ أَيِي تّْمَارَّاثْ!“
8 مِينْزِي أَقَا إِنَّا أَسْ: ”فّغْ زِي بْنَاذمْ-أَ، أَ ڒَارْيَاحْ أَمنْڭُوسْ!“
9 إِسّقْسَا ث: ”مَامّشْ ذ أَشْ قَّارنْ؟“ يَارَّا-د، إِنَّا: ”إِسمْ إِنُو ’لِيخْيُونْ‘، مَانْ أَيَا إِخْسْ أَذْ يِينِي ’أَبَارُّو‘، مِينْزِي نشِّينْ ذڭْ وَاطَّاسْ.“
10 إِزَاوْڭْ إِ-ث أَطَّاسْ حِيمَا وَارْ ث إِسِّيڭّْوجْ بَارَّا إِ ثمُّورْثْ نِّي.
11 ثُوغَا ذِينْ غَارْ وذْرَارْ إِشْثْ ن ثْحِيمَارْثْ ثمْغَارْ ن إِڒْفَانْ ثتّْهدَّا.
12 زَاوْڭنْ ث شّْوَاطنْ نِّي، نَّانْ: ”سكّْ أَنغْ غَارْ إِڒْفَانْ، حِيمَا نْزمَّارْ أَذْ ذَايْسنْ نَاذفْ.“
13 إِسَامْحْ أَسنْ يَاسُوع. ڒخْذنِّي فّْغنْ ڒَارْيَاحْ إِمنْڭَاسْ زڭْ ورْيَازْ نِّي، ؤُذْفنْ ذڭْ إِڒْفَانْ، ؤُشَا ثُوزّڒْ ثْحِيمَارْثْ نِّي غَارْ إِجّْ ن جَّارْفْ يُوعْڒَانْ ؤُشَا ثوْضَا ذِي ڒبْحَارْ. ثُوغَا-ثنْ عْڒَاحَاڒْ ذڭْ وَاڒْفَاينْ زَّايْسنْ ؤُشَا غَارْقنْ ذِي ڒبْحَارْ.
14 مَاشَا إِمكْسَاونْ ن إِڒْفَانْ أَروْڒنْ، خبَّارنْ مَانْ أَيَا ذِي ثنْذِينْثْ ؤُ خْ إِيَّارنْ. إِوْذَانْ فّْغنْ-د حِيمَا أَذْ ژَترنْ مِينْ إِمْسَارنْ.
15 ؤُسِينْ-د غَارْ يَاسُوع، تّْوَاڒَانْ أَمَارْيَاحْ إِ ذَايسْ ثُوغَا شّْوَاطنْ، ونِّي ذِي ثُوغَا إِزدّغْ ’لِيخْيُونْ‘، إِقِّيمْ، يَارْضْ، س ڒْبَاڒْ نّسْ، ؤُشَا ڭّْوذنْ.
16 إِنِّي إِژْرِينْ مَانْ أَيَا، خبَّارنْ ثنْ مِينْ إِمْسَارنْ إِ ؤُمَارْيَاحْ إِ ذِي ثُوغَا شّْوَاطنْ، ؤُ عَاوذْ خْ يِيڒْفَانْ نِّي.
17 ؤُشَا بْذَانْ تّْزَاوْڭنْ ث مَاحنْذْ أَذْ إِڭّْوجْ خْ ثمُّورْثْ نْسنْ.
18 ڒَامِي إِنْيَا نتَّا ذِي ثْغَارَّابُوثْ، إِزَاوْڭْ إِ-ث ؤُمَارْيَاحْ إِ ذَايسْ ثُوغَا شّْوَاطنْ حِيمَا أَذْ إِقِّيمْ أَكِيذسْ.
19 وَارْ ث إِجِّي، مَاشَا إِنَّا أَسْ: ”رُوحْ غَارْ ثَادَّارْثْ نّشْ ذ ڒَادْجْ نّشْ، خبَّارْ إِ-ثنْ مَارَّا مِينْ زَّايكْ إِڭَّا سِيذِي، مَامّشْ خَاكْ يَارْحمْ.“
20 ؤُشَا إِرُوحْ، إِبْذَا إِتّْبَارّحْ ذِي ذِيكاپُولِيسْ مَارَّا مِينْ ذ أَسْ إِڭَّا يَاسُوع، ؤُشَا مَارَّا ثْبهْثنْ.
21 أَوَارْنِي ڒَامِي إِژْوَا يَاسُوع س ثْغَارَّابُوثْ غَارْ ؤُجمَّاضْ، إِمُونْ-د خَاسْ عَاوذْ أَطَّاسْ ن ڒْغَاشِي أَمْ ثُوغَا-ث خْ ثْمَا ن ڒبْحَارْ.
22 يُوسَا-د عَاوذْ إِجّنْ زڭْ إِمقّْرَاننْ ن ثمْزِيذَا، قَّارنْ أَسْ يَايْرُوسْ. ؤُمِي ث إِژْرَا، إِوْضَا أَسْ غَارْ إِضَارنْ.
23 إِزَاوْڭْ إِ-ث أَطَّاسْ، إِنَّا أَسْ: ”إِدْجِي ثْمَاژُوژْثْ ثْحڒْشْ أَطَّاسْ. تّْزَاوْڭغْ شكْ أَذْ د-ثَاسذْ، أَذْ خَاسْ ثسَّارْسذْ إِفَاسّنْ نّشْ، حِيمَا أَذْ ثڭّنْفَا، أَذْ ثدَّارْ.“
24 إِرُوحْ أَكِيذسْ ؤُشَا إِضْفَارْ إِ-ث-إِ-د وَاطَّاسْ ن ڒْغَاشِي، ؤُشَا نِيثْنِي ذحّْسنْ ث.
25 مَاشَا ثُوغَا ذِينْ إِشْثْ ن ثمْغَارْثْ تَّازّْڒنْ زَّايسْ إِذَامّنْ ثنْعَاشْ ن إِسڭّْوُوسَا،
26 ؤُشَا ثكَّا خَاسْ ثَامَارَا أَطَّاسْ زڭْ إِضْبِيبنْ ؤُمِي ثسُّوفّغْ مَارَّا مِينْ غَارسْ، مَاشَا وَارْ ثسْثنْفِيعْ س وَالُو، ؤُشَا يَارْنِي عَاذْ خَاسْ ڒْحَاڒْ.
27 أَقَا ثسْڒَا خْ يَاسُوع ؤُشَا ثُوسَا-د غَارسْ أَمْ ثكَّا خْ دّْحَاسْ ن ڒْغَاشِي زِي ضفَّارْ نّسْ ؤُشَا ثْحَاذَا أَرُّوضْ نّسْ،
28 مِينْزِي ثنَّا: ”مَاڒَا حَاذِيغْ مْغِيرْ أَرُّوضْ نّسْ، أَذْ قِّيمغْ دَّارغْ.“
29 ڒخْذنِّي يُوژغْ ؤُسِيزّڒْ ن إِذَامّنْ، ثُوشَا أَكْ-ذ أَرِّيمثْ نّسْ بلِّي ثڭّنْفَا زِي ڒهْڒَاشْ نّسْ.
30 ڒخْذنِّي يُوشَا يَاسُوع أَكْ-ذ يِيخفْ نّسْ بلِّي إِفّغْ زَّايسْ جّهْذْ ؤُشَا إِنّقْڒبْ غَارْ ڒْغَاشِي، إِنَّا: ”وِي إِحَاذَانْ أَرُّوضْ إِنُو؟“
31 نَّانْ أَسْ إِمحْضَارنْ نّسْ: ”شكْ ثْوَاڒِيذْ ڒْغَاشِي إِذحّسْ إِ شكْ ؤُ شكْ ثسّقْسِيذْ: ’وِي ذ أَيِي إِحَاذَانْ؟‘ “
32 مَاشَا إِقِّيمْ إِخزَّارْ حِيمَا أَذْ إِژَارْ وِي يڭِّينْ مَانْ أَيَا.
33 ثُوغَا ثَامطُّوثْ ثڭّْوذْ، ثتَّارْجِيجِي، أَمْ ثسّنْ مِينْ ذ أَسْ إِمْسَارنْ، ؤُشَا ثُوسَا-د، ثوْضَا أَسْ غَارْ إِضَارنْ ؤُشَا ثْعَاوذْ أَسْ ثِيذتّْ مَارَّا.
34 خنِّي إِنَّا أَسْ: ”أَ يدْجِي، لْ-إِيمَانْ نّمْ أَقَا إِوْشَا أَمْ ثُوذَارْثْ، رُوحْ س ڒهْنَا أَذْ ثِيڒِيذْ ثڭّنْفِيذْ زِي ڒهْڒَاشْ نّمْ!“
35 أَمْ ثُوغَا عَاذْ إِسَّاوَاڒْ، ؤُسِينْ-د شَا زِي ثَادَّارْثْ ن ؤُمقّْرَانْ ن ثمْزِيذَا، نَّانْ أَسْ: ”إِدْجِيشْ ثمُّوثْ، مَايمِّي ثْصدَّاعذْ عَاذْ أَمْسغَّارْ؟“
36 مَاشَا يَاسُوع إِسْڒَا أَوَاڒنْ إِ إِنَّانْ ؤُشَا إِنَّا إِ ؤُمقّْرَانْ ن ثمْزِيذَا: ”وَارْ تّڭّْوذْ شَا! أَمنْ وَاهَا!“
37 وَارْ إِسْمِيحْ ؤُڒَا إِ يِيجّنْ أَذْ ث يُويُورْ أَكِيذسْ، مْغِيرْ شِيمْعُونْ بُوطْرُوسْ ذ يَاعْقُوبْ ذ يُوحَانَّا، ؤُمَاسْ ن يَاعْقُوبْ.
38 ؤُسِينْ-د غَارْ ثَادَّارْثْ ن ؤُمقّْرَانْ ن ثمْزِيذَا ؤُشَا إِژْرَا إِ-ثنْ شَّاثنْ أَڭجْذُورْ، تّْرُونْ ؤُشَا سْغُويُّونْ.
39 ؤُمِي د-يُوذفْ، إِنَّا أَسنْ: ”مَايمِّي ثشَّاثمْ أَڭجْذُورْ، ثتّْرُومْ؟ ثَاحنْجِيرْثْ وَارْ ثمُّوثْ شَا، مَاشَا أَقَا ثطّصْ.“
40 نِيثْنِي ضحْشنْ زَّايسْ. مَاشَا نتَّا إِسُّوفّغْ إِ-ثنْ كُوڒْشِي بَارَّا ؤُشَا يِيوِي أَكِيذسْ بَابَاسْ ذ يمَّاسْ ن ثْحنْجِيرْثْ ذ يِينِّي ثُوغَا أَكِيذسْ، خنِّي يُوذفْ-د مَانِي ثُوغَا ثتّْوَاسَّارْسْ ثْحنْجِيرْثْ.
41 إِطّفْ ذڭْ ؤُفُوسْ ن ثْحنْجِيرْثْ، إِنَّا أَسْ: ”كَّارْ، أَ ثَاحنْجِيرْثْ!“
42 ڒخْذنِّي ثكَّارْ ثْحنْجِيرْثْ ؤُشَا ثُويُورْ، مِينْزِي ثُوغَا ثَاحنْجِيرْثْ غَارسْ ثنْعَاشْ ن إِسڭّْوُوسَا. ثْبهْثنْ نِيثْنِي س يِيجّْ ن ؤُثبْهثْ إِمْغَارْ.
43 ؤُشَا نتَّا يُومُورْ إِ-ثنْ س جّهْذْ، حِيمَا ؤُڒَا ذ إِجّنْ أَذْ إِبَارّحْ س مَانْ أَيَا. خنِّي إِوصَّا أَذْ أَسْ وْشنْ حِيمَا أَذْ ثشّْ.