1 عْقڒْ، أَ سِيذِي، خْ مِينْ إِ ذ أَنغْ إِمْسَارنْ،
2 ثوْضَا ثسْغَارْثْ ن ڒْوَارْثْ نّغْ إِ إِبَارَّانِييّنْ،
3 نشِّينْ نذْوڒْ ذ إِيُوجِيڒنْ بْڒَا بَابَاثْنغْ،
4 أَمَانْ نّغْ نْسسّْ إِ-ثنْ س ثْمنْيَاثْ،
5 ضفَّارنْ أَنغْ خْ يِيرِي نّغْ،
6 أَقَا نْسَارّحْ أَفُوسْ غَارْ مِيصْرَا، غَارْ أَشُّورْ،
7 إِبَابَاثنْ نّغْ خْضَانْ،
8 إِمْسخَّارنْ دّبَّارَانْ خَانغْ،
9 نشِّينْ نْسبّڒْ ثُوذَارْثْ نّغْ
10 ثِيڒْمشْثْ نّغْ ثتّحْذُوذُوقْ أَمْ ثفْقُونْثْ،
11 سّْخَارْڭنْ ثِيمْغَارِينْ ذِي صِيهْيُونْ،
12 ڒْحُوكَّامْ يُويْڒنْ ثنْ س إِفَاسّنْ ن يِيخفْ نْسنْ،
13 إِرْيَازنْ إِجهْذنْ قَاعْ أَربُّونْ إِژْرَا ن ثْسِيرْثْ،
14 إِمْغَارنْ سّْبدّنْ أَغِيمِي ذِي ثوُّورَا ن ثنْذِينْثْ،
15 ثْودَّارْ ڒفْرَاحثْ ن وُوڒْ نّغْ،
16 إِوْضَا أَنغْ ثَاجّْ خْ ؤُزدْجِيفْ نّغْ.
17 س ؤُينِّي إِهْڒشْ وُوڒْ نّغْ أَطَّاسْ،
18 زِي سِّيبّثْ ن وذْرَارْ ن صِيهْيُونْ
19 شكْ، أَ سِيذِي، أَذْ ثقِّيمذْ إِ ڒبْذَا،
20 مَايمِّي ثخْسذْ شكْ أَذْ أَنغْ ثتُّوذْ إِ ڒبْذَا؟
21 أَ سِيذِي، أَرّْ أَنغْ-د غَاركْ،
22 مَاغَارْ مَا س ثِيذتّْ ثنْضَارذْ أَنغْ كُوڒْشِي؟