1 Jesucristo rey David castapita aywaragmi cargan. Davidnami cargan Abrahampa castanpita aywarag. Saymi Abrahampita galaycur Jesucristupa unay castancuna caycuna cayargan:
2 Abrahampa surinmi cargan Isaac.
3 Judäpa surincunami cayargan Fareswan Zara.
4 Arampa surinmi cargan Aminadab.
5 Salmonpa surinmi cargan Booz.
6 Isaïpa surinmi cargan rey David.
7 Salomonpa surinmi cargan Roboam.
8 Asapa surinmi cargan Josafat.
9 Uziaspa surinmi cargan Jotam.
10 Ezequiaspa surinmi cargan Manasés.
11 Josiaspa surinmi cargan Jeconías y waquin wauguincunapis.
12 Saychönami Jeconiaspa surin Salatiel yurergan.
13 Zorobabelpa surinmi cargan Abiud.
14 Azorpa surinmi cargan Sadoc.
15 Eliudpa surinmi cargan Eleazar.
16 Jacobpa surinmi cargan Mariapa runan José.
17 Saymi Abraham cawashgan wisanpita David yurishganyag chunca chuscu (14) generación cargan. Saynölami David cawashgan wisanpita Israel runacunata Babiloniaman apayashgan wisanyag chunca chuscu (14) generación cargan. Saynölami Babiloniaman apayashgan wisanpita Jesucristo yurishganyag chunca chuscu (14) generación cargan.
18 Jesucristo caynömi yurergan. Mariawan tänanpä José parlacush caycarpis paywan manami punorganräsu. Sayno caycaptinpis María gueshyag ricacorgan Santu Espiritupa munayninwanmi.
19 Gueshyag ricacuptinpis Josëga ali runa car manami munargansu runacuna Mariata jamuränanta. Saymi mana quejacuylapa cachariyta yarpargan.
20 Cacharinanpä yarpachacuycaptinmi Tayta Diosninsipa angilnin Josëta sueñuynincho nergan: “Rey Davidpa castan José, Mariaga manami pï runawanpis punushgasu gueshyag ricacunanpä, sinöga Santu Espiritupa munayninwanmi gueshyag ricacush. Sayno caycaptenga mana rabiacuylapa warmiquipä Mariata shuntacuy.
21 Olgu wamratami María gueshyaconga. Runacuna jusalicushgancunata perdonar salvananpä captinmi say wamrapa jutin canga Jesús.” Sayno nirmi Josëta sueñuynincho ángil parlapargan.
22 Jesús yurinanpämi Tayta Diosninsipa profëtan guelgargan:
23 “Juc doncëlla jipashmi gueshyag ricacur olgu wamrata gueshyaconga.
24 Sayno niptinmi José punuycashganpita riccharcamur Tayta Diosninsipa angilnin nishgannöla Mariata shuntacorgan warminpä.
25 Isanga Mariawan taycarpis paywan manami punorganräsu wawan yurishganyag. Mariapa wawan yuriycuptinmi jutinta José churapargan Jesús jutin cananpä.