1 Tayta Dios, mañacamushäta wiyaycamuy.
2 Llaquicuycaptëga nogapita ama pacacuychu ari.
3 Goshtay illgajnömi aywacuycä.
4 Guewa wañuytajnömi shongöpis ushaycan.
5 Chay-jina ataycällarnami agrayashcäpis.
6 Nogaga caycä chunyajcho tucu caycajnömi,
7 Puñuytapis manami tarëchu.
8 Chiquimajcunaga cada rätumi wiyächiparcaycäman.
9 Tantapa ruquin uchpallatami acuycäpis.
10 Fiyupami rabyacurcushcanqui.
11 Llantuy päsacojnöllami watäcunapis päsacuycan.
12 Gam ichanga Tayta Dios, imaypis raymi caycanqui.
13 Jatarcushpayqui Sionta cuyapaycuyna.
14 Sirbishojcunaga Sionta ragällata ricarmi fiyupa llaquicurcaycan.
15 Llapan nasyun runacunawan raycunami munayniyoj Tayta Diosta rispitangapaj.
16 Pay Sionta allchananpaj shamushpanmi munayniyoj cashanta musyachiconga.
17 Wacchacuna mañacushanta Tayta Diosga wiyanmi. Paycuna mañacushantaga manami gonganchu.
18 Guepata yurejcuna ricananpaj isquirbicächun.
19 Cayno isquirbichun: «Tayta Diosga ricarämun janaj pacha tiyashanpita.
20 Wañuchicänanpaj caycaj prësucuna llaquicuycajta wiyar salbaran.»
21 Chaynöpami Sioncho Tayta Diospita willaconga.
22 Intëru nasyunpita runacuna, raycuna shuntacarcurmi Tayta Diosta aduranga.
23 Mösullaraj caycaptënami callpätapis ushacächisha.
24 Nogaga në: «Tayta Dios, amaraj apacamayrächu. Mösullaraj caycaptëga amaraj pushacamayrächu.»
25 Tayta, gallarinanpita-pachami cay pachatapis gamga tacyachishcanqui.
26 Llapanmi chaycunapis illgangapaj.
27 Gammi ichanga cashayquinölla caycanquipaj.
28 Sirbishojcunapita mirajcunataga allichömi goyächinquipaj.