1 Chaura Job niran:
2 «Llaquicuynëta, disigrasya chayamashancunata
3 lamar cantuncho agushpitapis masmi lasanman.
4 Tayta Diospa lëchanmi nogacho jaticasha caycan.
5 Guewan captenga bürrupis manami gaparanchu.
6 Gam nimashayquega cachiynaj micuynömi,
7 Chaypis cananga mana yachashämi micuynë.
8 «¡Ima alliraj canman mañacushäta Tayta Dios auniycamaptin!
9 ¡Ima alliraj canman Tayta Dios llapiramaptin!
10 Fiyupa nanaywan wañurpis cushicömanmi
11 Callpäpis manami cannachu masta awantanäpänaga.
12 Manami gagano sinchichu cä,
13 Quiquilläpitaga manami imatapis rurächu.
14 «Ñacaycaj amïgunchïtaga cuyapanchïmi,
15 Gamcunami ichanga amïgö caycarpis mana yanapämanquichu.
16 Yacuga putca aywan gasapawan, rashtawan tacushami.
17 Mana rashtaptinnaga ragrapa yacu uraj chaquicäcunmi.
18 Yacuta ashir caminanticunapis juc-läpana purin.
19 Temapita Sabäpita aypalla nigusyanticuna shamöga
20 Ashir aywashanman chayarga fiyupa llaquicun.
21 Chaynömi gamcunapis nogapäga carcaycanqui:
22 Noga manami gamcunata imatapis mañacöchu.
23 Manami ‹chiquimajcunapita salbamay› nëchu.
24 «Yachachimay-llapa, chauraga mana rimacuypami chasquicushaj.
25 Rasun cajpitaga pipis manami ‹mana› ninchu.
26 Gamcunaga jamurpämanqui rimashäpitami.
27 Chayno car gamcunaga wacchata wañuchinanpaj nirpis ninquimanmi.
28 Masqui ricäramay.
29 Sumaj yarpachacuy. Ama fiyuga caychu.
30 Gamcunaga capas yarpanqui llullacuycashäta.