1 Iet mahsen ehu duwen Ninipe, koasoiepen kaudiahl ehu me wiawihong Nahum, mehn Elkos.
2 KAUN-O Koht sohte kin kupwurki emen en pahrekiong ih;
3 KAUN-O sohte kin ketin mwadang engiengda,
4 E kin ketin ruwese madau, e ahpw kin madada!
5 Nahna kan kin rerrer mwohn silang en KAUN-O;
6 Ma e pahn ketin engiengda, ihs me kak pitsang?
7 KAUN-O me ketin kupwur mwahu;
8 E kin ketin kamwomwala douluhl sapwellime imwintihti kan rasehng lapake;
9 Dahme kumwail koasoakoasoane nan kapehdamwail en uhkihong KAUN-O?
10 Kumwail pahn roangala douluhl
11 Ninipe, mie ohl emen me pwarada sang rehmw, me diren koasoandi suwed, e kin wia eh koasoandi suwed ong KAUN-O.
12 Iet me KAUN-O ketin mahsanihong sapwellime aramas akan en Israel: “Mehnda ma mehn Asiria kan me kehlail oh ngeder, ahpw re pahn mwomwla oh sohrala. Nei aramas akan, I kalokeikumwailehr, ahpw I sohte pahn pwurehng wia met.
13 Met I pahn katokedier en Asiria manaman pohmwail oh kauwehla selmete me salihkumwaildier.”
14 Iet me KAUN-O ketin koasoanehdi duwen Asiria: “Sohte pahn kadaudokarail me pahn kadakadaur adarail. I pahn kamwomwala dikedik en eni kan me mi nan tehnpas en arail koht kan. I kaukaunop sousou ehu ong mehn Asiria kan—re sohte konehng re en momour!”
15 Kilang, meninkeder men kohkohdo pohn nahna kan me weuwa rohng mwahu pwoat! E kohkodohn kalohkihda manaman en powehdi! Kumwail mehn Suda, kumwail wia amwail sarawi kan oh patohwanohng Koht dahme kumwail inoukihongehr. Me suwed kan solahr pahn pwurehng mahweniong sapwamwailo. Re mwomwlahr douluhl!