1 No hott da Hiob ksawt,
2 “Heichet mich goot ab,
3 Sind geduldich mitt miah diveil es ich shvetz,
4 Is mei glawk geyyich mensha?
5 Gukket an mich un seind fashtaund,
6 Vann ich an dess denk, is es miah angsht,
7 Favass halda di gottlohsa oh layva,
8 Iahra kinnah sinn um si rumm,
9 Iahra haymeda sinn sayf un unni furcht,
10 Alli-mohl es iahra bulla un kee zammah gedu sinn, vadda di kee drawwich,
11 Iahra kinnah shpeela vi lemmah in en drubb shohf;
12 Si singa mitt di tambourines un harfa,
13 Dee leit iahra layva is goot biss si ald vadda,
14 Avvah doch sawwa si zu Gott, ‘Loss uns gay!
15 Veah is da Awlmechtich, es miah een deena sedda?
16 Nau heichet moll, dee leit mayna si macha sich selvaht goot ab,
17 Vee oft vatt's licht funn di gottlohsa ausgmacht?
18 un si vekk geblohsa vi shtroh im vind,
19 Diah glawvet es Gott en kind shtrohft fa di sinda funn sei daett.
20 Loss si iahra shtrohf sayna mitt iahra aykni awwa,
21 Vass gevva si drumm vass es gebt mitt iahra kinnah noch eena,
22 Kann ennich ebbah Gott veisheit lanna,
23 Ay-ebbah shteahbt diveil es eah noch frish un ksund is,
24 Sei millich-aymah is foll millich,
25 Avvah ebbah shunsht shteahbt mitt en bedreebdi sayl,
26 Avvah si leiya awl zvay nayvich nannah im grund,
27 Gukk moll, ich vays eiyah gedanka,
28 Diah frohwet, vo is es haus fumm grohsa mann,
29 Hend diah nee nett selli kfrohkt es rumm heah gayn,
30 Si sawwa es da evil mann vatt nett kshtrohft,
31 Veah sawkt eem in's ksicht vass eah fadeend hott?
32 Diveil es eah in da grawb-hohf gedrawwa vatt,
33 Di sholla fumm grawb sinn sees zu eem;
34 So vi kennet diah mich drayshta mitt eiyah dummi vadda?