1 Am i dahm, ni hahawa ep neid g anghil. Tki id ab i hud dahm kahchim t amjed k geꞌe uꞌukch g gewkdag. K ab amjed g tonlig wabsh wehsko tonod an jewed dahm.
2 K am si s-kaidam neok ch hab kaij:
3 Bat wa masma e padch g kihhim nat pi muꞌi ha padch g hemajkam g pi apꞌekamkaj.
4 Ni hahawa ep kah mo ab neok g Jiosh dahm kahchim amjed ch hab kaij:
5 Pi ap chuꞌijigaj o shaꞌi si uhgk sipulkas.
6 S-koꞌokam at hab em-juh.
7 Ab g wo mahki g haꞌas shoꞌigdag ch pi ap tahhadkam mo wa heꞌes hejel ab e mahkch g ab si has e-elidadag ch kaisdag.
8 Kut id hekaj g shoꞌigdaj wehs ab wo i shul dahm wabsh shel i e oidam.
9 Hegam kokownal mo wehmaj hab junihim g pi apꞌekam at wo si shoanid wehhejed am i neidok mamt mei.
10 Idam o ga hu wabsh mehk gegok no pi s-ehbid mat wo nei g shoꞌigdaj ch hab kaij:
11 K g s-kakais id dahm jewed hab waꞌap si shoani ch pi ap e tahtk wehhejed no pi hahawa pi hedai ha nolawt g ha-gagli.
12 Pi oki hedai ha nolawt g ha-ohlaga ch ha-plahdaga ch s-namkig hohodai ch g s-namkig ha-lohbaga ch g mamskal ch g s-namkig uhs. Nahnko haꞌichu oki hab wua g al-huandi aꞌagkaj ch s-namkig uhs ch kohwli ch wainomi k ch s-namkig hodaikaj. K oi wa pi hedai ha nolawt.
13 Am o chum gagda hegai mo haschu am wehnads g haꞌichu hugi ch nahnko mahs s-ap uhwchu ch nawait ch e koꞌadam a-saidi ch chuꞌi ch pilkani ch haiwani ch kahwal ch kakawyu ch kakalit ch nenehol ch chum hems g oꞌodham dodakag. K pi hedai ha nolawt.
14 K hab kaij idam s-kakais ab wui hegai kihhim:
15 Hegam mat s-e kakaisch am haꞌichu gagdak atki ga hu wabsh mehk wo gegokk no pi s-ehbid g shoꞌigdaj. Idam at wo si shoanid ch wo pi ap e tahtkkad
16 ch hab wo kaijchid:
17 T eda shaꞌi si s-hohtam wehs heb hu shul g e-kaisdag.”
18 Am o meihim g kihhim ch g kuhbs am wuhshani. K wehs idam am neid ch si hihnk ch hab kaij, “Pi o hekid hema kihhim hab shaꞌi masma d geꞌe kihhim.”
19 T idam ab hahawa iawua g jewed e-moꞌo ab k si s-kaidam hihnk ch si shoani ch hab kaij:
20 Kut oi wa d wo si geꞌe s-hehgigk an dahm kahchim ch ed mat i gei ihda pi apꞌekam kihhim. Jesus chuhchai ch Jiosh haꞌichu i tashogiddam ch wehs g Jiosh hemajkamga at wo si s-hehgigk. Jiosh at ab wo abch ihda kihhim g chuꞌijig mo has ha juhkchkahim.
21 Kut am hahawa hema i e chehgi g si s-gewk anghil k am hema bei g hodai. Ihda hodai oki haꞌas geꞌej mo g si geꞌe chuꞌikud. T g anghil am daꞌich ge shuhdagi ch ed k hab kaij:
22 Hegam mumsigo mo ha gew g aꞌalpa ch uhs kukuikud ch kohwli kukuikud at pi hekid am hu ep wo piast amai.
23 Pi at hekid am hu ep wo e mehmheid g lalampa.
24 Kumtki s-koꞌokam wo namkid g kihhim nat pi ia e koꞌij g Jiosh haꞌichu i tashogiddam ch Jiosh hemajkamga. Chum o hems d chuꞌijigaj hegam mat gan hu aꞌai jewed dahm e koꞌij.