1 Hagaagahia, diiloo be e dahi laa dangada e basa adu?
2 De lili e daa ga magau tangada lodo senga,
3 Au gu gidee bolo tangada lodo senga e hagadagadaga age,
4 Ana dama e dee ola naa donu,
5 Tangada hiigai e gai ga odi ana huamanu gu hagihagi,
6 De hagaduasala e dee hanage i lodo mama,
7 aagai tangada e haanau ange gi lodo hai ngadaa,
8 Gai noo go au go koe, gai au e dangidangi ange gi de Maadua,
9 Ia e hai denga mee hagalele mouli e dee maua laa gi tonu ange aagena,
10 Ia e hai gi pala iho de langi gi honga de henua,
11 Ia e gaavange denga duulanga maolunga gi gilaadeu e lodo maolalo,
12 Ia e hai gi dee ssula hagatau a tangada e heiangi vaivai dagodo,
13 Ia e hai naa gi boogia mai gilaadeu i olaadeu heiangi vaivai daakodo,
14 Gilaadeu e hedae ange naa gi de gohu i de laangi,
15 Aagai ia e hagaola de ia e duasala mai i olaadeu alelo kangi,
16 Gai de gau hagaau aloha e dahi alaadeu tali,
17 Tilo, e manuuia tangada a de Maadua e hagaheohi,
18 Ia e hagammae, aagai e ahe ange hogi ga saabini de maanuga;
19 Ia e hagaola goe mai i de hai ngadaa i e ono hanonga,
20 Ia e hagaola naa goe mai i de magau i de masavaa o de onge,
21 Koe e buibuia naa i denga muna hagammae,
22 Koe e gadagada naa i de masavaa o de hagaduasala ma de onge,
23 Gai koe e hai dahi hagatoo donu hagaheloongoi madali hadu o de gelegele,
24 Gai koe e donu iho naa bolo doo hale e nnoho paba,
25 Koe e iloo naa hogi bolo au dama gu soa,
26 Koe e magau naa i doo madumadua,
27 Tilo, gimaadeu gu agoago i de mee nei, gai se muna abodonu.