1 Dogu hadu manava gu bolebole
2 Hagalaangona, hagalaangona adu dono leo,
3 Ia e hai gi labalaba ana uila i lalo de langi alodahi,
4 Muli mai gai dono leo e hagangolo;
5 De leo o de Maadua e hagalele mouli i de hagangolo i de hatuli;
6 Ia e hai ange gi denga snow, ‘Malili iho gi henua i lalo,’
7 Ia e daohi hegau a dangada alodahi,
8 Denga manu lodo henua gu hulo ma gu hagalilo,
9 Ssio e sao mai i dono aabi,
10 De manava o de Maadua e hagahale denga haisi,
11 Ia e hhao denga hagausinga i de vai,
12 Gai ia e hai gilaadeu gi haganigo saele gi haia mee alodahi aana e tala ange
13 Ia e gaamai de langi e hagaduasala ai dangada,
14 Job, hagalaangona de mee nei;
15 E aha, koe e iloo dagodo o ssauaa o de Maadua e daohi ai denga giliiga,
16 Koe e iloo be dee hee de hai o denga hagausinga e daudau ai laa i lo te langi,
17 E deai, koe e langona iho donu huu doo mahana
18 Koe e maua i de doha gi madoha lo te langi madali ia,
19 Daalaa mai amaadeu muna e tala ange gi de Maadua;
20 E aha, ga tala ange au gi de ia bolo au e lodo e basa ange?
21 E deai donu se dangada e maua i de galo ange e tilo de laa,
22 De maalama mahamaha e hanage i ngaiho;
23 De Ia Mmahi Mmao laa — gidaadeu e dee maua gi gidee ia;
24 Deelaa ai, dangada e maatagu i de ia;