1 Tilo, au gu gidee mee nei alodahi,
2 Oodou mee e iloo, gai au e iloo hogi;
3 Aagai au e lodo e tala ange agu muna gi de Ia Mmahi Mmao laa,
4 Aagai goodou e haoli goodou i oodou muna hhadu;
5 Mee naa goodou gi nnoho donu gi dee mmuu,
6 Goodou nnoho hagalaangona agu muna e hagadaumee adu ai;
7 E maua e goodou i de pasa baubau i de ingoo o de Maadua?
8 Goodou e maua i de hai hegau i de hilihili dangada ange gi de ia?
9 E aha, e danuaa adu naa gi goodou noo ia e tilo oodou dagodo?
10 Ia e hagasee naa donu goodou,
11 Dono mahamaha e dee hai naa ga maatagu goodou?
12 Oodou muna hagasengasenga e bei lehu;
13 Goodou nnoho mage dee mmuu, gai au ga tala agu muna;
14 Gu aha au gu hagahai ngadaa ai nei donu huu au,
15 Gai ga daia naa donu e ia ga magau au, gai au e dahi donu agu tali ange gi de ia;
16 Kana adu de mee nei e hagaola naa au,
17 Goodou kana ange hagalaangona agu muna,
18 Tilo, au gu hagadabena e tala dogu donu,
19 Goai e maua i de hai baasi mai gi de au?
20 De Maadua, gaamai gi de au luu mee e lua nei,
21 aaua gee doo lima e hagaduasala ai nei au,
22 Gai hagahia mai au gai au ga basa adu,
23 Dee hee maa de lagolago ogu baubau ma ogu haisala?
24 Gu aha gu hagammuni ai naa luoo mada
25 E aha, koe ga hagamadagu naa au bei de lau manu e ilihia laa i de madangi?
26 Koe e daohi denga mee hai ngadaa e hai baasi mai ai gi de au,
27 Koe gu nnoa ange luoogu vae gi denga laagau hagamakaga;
28 Gai tangada e bobo bei dagodo o dahi mee bobo,