1 Huan ya ni eltoc nopa huicatl catli David huicac para TOTECO pampa quinmanahuijtoya tlen nochi icualancaitacahua huan tlen Saúl.
2 Quiijto:
3 NoTeco Dios, ta techyahualohua para amo huelis nechajsise nocualancaitacahua.
4 Nijnotzas, TOTECO, catli quinamiqui tijhueyichihuase.
5 Quema nochi nechyahualohuayayaj para nechmictise,
6 Quema nijmatiyaya nimiquisquía huan nechtilanayaya campa mijcatzitzi,
7 huajca ipan notlaohuijcayo nijnojnotzqui TOTECO.
8 Huajca chicahuac mojmolini tlali,
9 Elqui quen poctli quisayaya ipan iyacatzol.
10 Huan TOTECO quiechcapano ilhuicactli huan hualtemoc para nechpalehuis.
11 Elqui quen TOTECO tlejcoc ipan ieltlapal se querubín tequihuajquetl huan patlantihualajqui ajacatipa.
12 Yaya motzajqui ica tzintlayohuilotl,
13 Cahuaniyaya itlatlanex TOTECO huan elqui quen tlapetlaniyaya iixpa.
14 Tlatomonqui nelía chicahuac tlen ilhuicac huan ajsic campa hueli,
15 Quimajcajqui cuatlamintli huan nocualancaitacahua cholojque campa hueli.
16 Quema yaya tlailpitzqui ica cualantli,
17 TOTECO momaxitlajqui tlen ilhuicac huan nechitzqui.
18 Nechmanahui tlen nocualancaitacahua catli más tetique.
19 Inijuanti motlalijque noca na quema nechajsitoya se hueyi tequipacholi.
20 Nechhuicac campa amo mahuilili.
21 TOTECO nechtlaxtlahuijtoc pampa nijchihua catli xitlahuac iixpa.
22 Quena, nijtoquilijtoc iojhui TOTECO,
23 Niquiximati itlanahuatilhua,
24 Ninejnentoc xitlahuac iixpa,
25 Yeca TOTECO nechtlaxtlahuijtoc,
26 Ta, TOTECO tiquintlasojtla catli tetlasojtlaj.
27 Timonextía titlapajpactli ica catli tlapajpactli.
28 Ta tiquinmaquixtía catli motequipachohuaj,
29 TOTECO, tinotlahuil.
30 Ica mochicahualis Toteco Dios huelis niquintlanis miyac soldados catli nocualancaitacahua.
31 Xitlahuac nochi iojhui Toteco Dios.
32 Amo aqui seyoc Dios,
33 Yaya Toteco Dios catli nechchicahualismaca.
34 TOTECO quichihua noicxihua ma elica ajacasontzitzi.
35 TOTECO techmaca noyajatil para huelis nitlahuilanas.
36 Ta techmanahuía quen se tepostli catli nechyahualohua.
37 Noojhui tijchijtoc patlahuac para amo niohuijtis,
38 Niquintoquili nocualancaitacahua, huan niquintzontlamilti.
39 Niquintzontlamilti nochi para amo aqui huelis sempa motlananas.
40 Ta techfuerzajmacac para huelis nitlahuilanas.
41 Huan ta tijchijqui para nochi nocualancaitacahua ma choloca noixpa.
42 Inijuanti tlatzajtzilijque para acajya quimaquixtisquía,
43 Huajca na niquinchijqui quen tlaltejpoctli.
44 Techmanahuijtoc tlen nopa fiero tlacame catli mopantíaj ipan noaltepe.
45 Huan catli ehuani sequinoc tlalme huihuipicaj noixpa.
46 Sequinoc tlali ehuani momajmatíaj,
47 TOTECO itztoc.
48 Toteco Dios quinmacuepilía nochi nocualancaitacahua.
49 Quena, TOTECO nechmanahuijtoc tlen nocualancaitacahua.
50 Yeca nimitztlascamati, TOTECO.
51 TOTECO, ta techmanahuijtoc huan techtlalijtoc nimotlanahuatijca.