1 Huan ya ni eltoc nopa huicatl tlen David huicac para TOTECO pampa quinmanahuijtoya tlen nochi icualancaitacahua huan tlen Saúl.
2 Quiijto:
3 NoTeco Dios, ta tinechyahualohua para ax huelis nechajsise nocualancaitacahua.
4 Nijnotzas, TOTECO, tlen quinamiqui tijhueyichihuase.
5 Quema nochi nechyahualohuayayaj para nechmictise,
6 Quema nijmatiyaya nimiquisquía huan nechtilanayaya campa mijcatzitzi,
7 huajca ipan notlaohuijcayo nijnojnotzqui TOTECO.
8 Huajca chicahuac mojmolini tlali,
9 Elqui queja poctli quisayaya ipan iyacatzol.
10 Huan TOTECO quiechcapano elhuicactli huan hualtemoc para nechpalehuis.
11 Elqui queja TOTECO tlejcoc ipan ieltlapal se querubín elhuicac ejquetl huan patlantihualajqui ajacatipa.
12 Yaja motzajqui ica tzintlayohuilotl,
13 Tlahuiyaya itlatlanex TOTECO huan elqui queja tlapetlaniyaya iixpa.
14 Tlatomonqui nelía chicahuac tlen elhuicac huan ajsic campa hueli,
15 Quimajcajqui cuatlamintli huan nocualancaitacahua cholojque campa hueli.
16 Quema yajaya tlailpitzqui ica cualantli,
17 TOTECO momaxitlajqui tlen elhuicac huan nechitzqui.
18 Nechmanahui tlen nocualancaitacahua tlen más tetique.
19 Inijuanti motlalijque noca na quema nechajsitoya se hueyi cuesoli.
20 Nechhuicac campa ax mahuilili.
21 TOTECO nechtlaxtlahuijtoc pampa nijchihua tlen xitlahuac iixpa.
22 Quena, nijtoquilijtoc iojhui TOTECO,
23 Niquixmati itlanahuatilhua,
24 Ninejnentoc xitlahuac iixpa,
25 Yeca TOTECO nechtlaxtlahuijtoc,
26 Ta, TOTECO tiquintlasojtla tlen tetlasojtlaj.
27 Timonextía titlapajpactic ica tlen tlapajpactic.
28 Ta tiquinmaquixtía tlen mocuesohuaj,
29 TOTECO, tinotlahuil.
30 Ica mochicahualis Toteco Dios huelis niquintlanis miyac soldados tlen nocualancaitacahua.
31 Xitlahuac nochi iojhui Toteco Dios.
32 Axaca seyoc Dios,
33 Yaja Toteco Dios tlen nechchicahualismaca.
34 TOTECO quichihua noicxihua ma elica ajacasotzitzi queja masame iniicxihua.
35 TOTECO nechmaca noyajatil para huelis nitlatehuis.
36 Ta tinechmanahuía queja se tepostli tlen nechyahualohua.
37 Noojhui tijchijtoc patlahuac para ax niohuijtis,
38 Niquintoquili nocualancaitacahua, huan niquintzontlamilti.
39 Niquintzontlamilti nochi para axaca huelis sampa motlalanas.
40 Ta tinechfuerzajmacac para huelis nitlatehuis.
41 Huan ta tijchijqui para nochi nocualancaitacahua ma choloca noixpa.
42 Inijuanti tlatzajtzilijque para acajya quimaquixtisquía,
43 Huajca na niquinchijqui queja tlaltejpoctli.
44 Tinechmanahuijtoc tlen nopa fiero tlacame tlen mopantíaj ipan noaltepe.
45 Huan tlen ehuani sequinoc tlaltini huihuipicaj noixpa.
46 Sequinoc tlali ehuani momajmatíaj,
47 TOTECO itztoc.
48 Toteco Dios quinmacuepilía nochi nocualancaitacahua.
49 Quena, TOTECO nechmanahuijtoc tlen nocualancaitacahua.
50 Yeca nimitztlascamati, TOTECO.
51 TOTECO, ta tinechmanahuijtoc huan tinechtlalijtoc nimotlanahuatijca.