1 यःपिं दाजुकिजापिं, अप्वः गुरु जुयाः जुइ मते। गुरु जुया जूपिन्त परमेश्वरं मेपिन्त स्वयाः कडा जुइक न्याय यानादी।|src="HK00029B.TIF" size="col" ref="३:१"
2 झी फुक्कसिनं अप्वः यानाः द्वंके यः। मद्वंकुसे नवाये फुम्ह मनू हे जक सिद्धम्ह जुइ। थज्याःम्ह मनुखं जक थःगु म्हयात लके हने फइ।
3 झीसं थःगु खँ मानय् याकेत सलयागु म्हुतुइ लगाम तयाबी, अले झीसं सलयात यःयःथाय् यंके फइ।
4 अथे हे फसं न्ह्यानाच्वंगु ततःधंगु लःजहाजयात नं छगू चिचाधंगु कर्ण जक संकाः नं जहाज चले याइम्हय्सिनं थः यःथाय् यंके फु।
5 झीगु मे नं अथे हे खः। थ्व मे चिपु जूसां थ्वं ततःधंगु खँ ल्हानाः फुइँ याइ।
6 मे नं मि थें खः। थ्व झीगु म्हया मेमेगु म्हब्व स्वयाः मभिंगु म्हब्व खः। थ्वं झीगु म्ह छम्हं स्यंकाबी। अले नरकयागु मि कयाः झीगु जीवनयात हे छ्वय्काबी।
7 मनूतय्सं फुक्कसित तहलगय् याये फु। इमिसं गुँइ च्वंपिं पशुतय्त, झंगःतय्त, घिसय् जुया जुइपिं जन्तुतय्त, अले समुद्रय् च्वंपिं जीवजन्तुतय्त तकं तहलगय् याये फु।
8 मेयात धाःसा सुनानं थौं तक लके याये मफुनि। थ्व तसकं मभिं, थ्वयात लके याये थाकु, अले थ्व बिखं जायाच्वनी।
9 थुकिं हे झीसं प्रभु परमेश्वर बाःयात सुवाः बीगु, अले थुकिं हे परमेश्वर थें च्वंक दय्कातःपिं मनूतय्त सराः बीगु खः।
10 व हे छप्वाः म्हुतुं सुवाः नं बीगु, अले सराः नं बीगु याइ। यःपिं दाजुकिजापिं, थथे छता याये मते।
11 छगू हे बुंगाःचाय् साःगु नं खायुगु नं लः बुया वइ मखु।
12 दाजुकिजापिं, यःमरिमाय् भद्राक्ष सइ ला? अले दाखमाय् यःमरि सइ ला? चि सवाः वःगु बुंगाःचाय् साःगु लः बुया वइ मखु।
13 छिमिथाय् परमेश्वरयागु वचन स्यने फुम्ह सुं बुद्धि दुम्ह मनू दु धयागु जूसा वं तःधं मजुसे बांलाःगु चालचलनयाम्ह जुयाः बांलाक ज्या यानाः क्यँ।
14 तर छिपिं नुगः मुइकाः स्वार्थी जुयाः तःधंछुया जुइ मते। थुकथं छिमिसं फताहा खँ ल्हानाः परमेश्वरयागु सत्ययात त्वपुइत स्वये मते।
15 थज्याःगु बुद्धि परमेश्वरपाखें वःगु मखु। थज्याःगु बुद्धि ला संसारं ब्यूगु, अले शैतानपाखें वःगु खः।
16 गन नुगः मुइकीपिं थः यःथें यानाजुइपिं मनूत दइ, अन कचकच जक जुइ, अले मभिंगु न्ह्यागुं ज्या जुइ।
17 परमेश्वरपाखें दुगु बुद्धि पवित्र, शान्ति बीगु, क्वमिलु जुइगु, मिजासं जाःगु, दया दुगु व भिंगु फल बीगु जुइ। थ्व ख्वाः स्वयाः ज्या मयाइगु व दुग्यंगु जुइ।
18 शान्ति बीम्हय्सिनं मिलय् यायेगु ज्यां भिंगु फल सय्की।