1 सुथय् न्हापां यहोशू अले इस्राएलीत शित्तीम त्वःताः यर्दन सिथय् वल। यर्दन छिनावने न्ह्यः इपिं अन हे पाल ग्वयाः बाय् च्वन।
2 स्वन्हु लिपा सकलें कुलनायःत छाउनी दथुइ जुयावनाः
3 मनूतय्त थुकथं उजं बिल, “छिमिसं लेवी पुजाहारीतय्सं परमप्रभु छिमि परमेश्वरयागु बाचा चिनादीगु सनू क्वबिया वंगु खनीबलय् छिपिं थथःगु थासं पिहां वयाः उकिया ल्यूल्यू हुँ।
4 अले छिमिसं वनेमाःगु लँपु सी, छाय्धाःसा व लँपुइ छिपिं न्हापा वंगु मदुनि। अय्नं छिपिं व सनूया लिक्क मवंसे छगू किलोमिटर ति ल्युने च्वँ।”
5 यहोशूं मनूतय्त थथे धाल, “छिमिसं थःत शुद्ध या, छाय्धाःसा कन्हय् परमप्रभुं छिमिगु दथुइ अजू चाइपुगु ज्या यानादी।”
6 यहोशूं पुजाहारीतय्त थथे धाल, “बाचा चिनादीगु सनू क्वबियाः मनूतय् न्ह्यः न्ह्यः हुँ।” अथे जुयाः इपिं बाचा चिनादीगु सनू क्वबियाः मनूतय् न्ह्यः न्ह्यः वन।
7 परमप्रभुं यहोशूयात धयादिल, “थनिंनिसें जिं सकल इस्राएलीतय्गु न्ह्यःने छन्त तःधंके। अले इमिसं जि मोशालिसें दुगु थें छलिसें नं दु धकाः सी।
8 बाचा चिनादीगु सनू क्वबिपिं पुजाहारीतय्त छं थथे धा, ‘छिपिं यर्दन खुसिया सिथय् थ्यनेवं लखय् वनाः दनाच्वँ।’”
9 यहोशूं इस्राएलीतय्त धाल, “थन वयाः परमप्रभु छिमि परमेश्वरया वचन न्यँ!
10 थुकिं छिमिसं धात्थेंयाम्ह परमेश्वर छिमिगु दथुइ दी धकाः सी। वय्कलं धात्थें हे छिमिगु न्ह्यःनें कनानीत, हित्तीत, हिव्वीत, परिज्जीत, गिर्गाशीत, एमोरीत व यबूसीतय्त इमिगु देशं ख्यानाछ्वइ।
11 स्व! फुक्क पृथ्वीया प्रभुयागु बाचा चिनादीगु सनू छिमिगु न्ह्यः न्ह्यः यर्दन खुसिइ वनी।
12 आः इस्राएलया छगू छगू कुलं छम्ह छम्ह यानाः झिंनिम्ह मनू ल्य।
13 फुक्क पृथ्वीया प्रभु परमप्रभुयागु बाचा चिनादीगु सनू क्वबिपिं पुजाहारीतय्गु तुतिपालि यर्दनया लखय् लाइबलय् च्वय्निसें न्ह्यानावइगु यर्दनया लः दिनाः छथाय् द्वँ मुनी।”
14 उकिं यर्दन खुसि छीत मनूतय्सं थःपिनिगु पाल क्वकाःबलय् पुजाहारीत बाचा चिनादीगु सनू क्वबियाः मनूतय् न्ह्यःने वन।
15 छ्व लयेगु इलय् यर्दन खुसिइ लः तःजाःगु जुइ। अथे जूसां बाचा चिनादीगु सनू क्वबिपिं पुजाहारीत यर्दनय् थ्यनाः इमिगु तुतिं लःया सिथय् थियेवं
16 न्ह्यानावःगु लः दित, अनं खुसिया यक्व च्वय् सार्तानया न्ह्यःने आदम धाःगु शहर लिक्क हे लः छथाय् मुंगुलिं मृत-सागरय् न्ह्यानावंगु लः मन्त। उकिं मनूत यरीहोया चुलिंचू छिनावन।
17 सकल इस्राएलीत गंगु बँ जुयाः खुसि छिनामवंतले परमप्रभुयागु बाचा चिनादीगु सनू क्वबियाच्वंपिं पुजाहारीत यर्दनया दथुइ मसंसे दनाच्वन।