1 यहूदाया जुजु योशियाहया काय् सिदकियाहं राज्य यानाच्वंगु शुरुया दँय् परमप्रभुपाखें यर्मियायाथाय् वःगु वचन थ्व हे खः।
2 परमप्रभुं जितः थथे धयादिल, “छेंगूया खिपः व सिँया गजबारं छगू जुवा दय्कि, अले छंगु ककुइ ति।
3 अले यरूशलेमय् यहूदाया जुजु सिदकियाहयाथाय् वःपिं दूततय्गु ल्हातं एदोम, मोआब, टुरोस व सीदोनया जुजुपिन्थाय् खबर छ्व।
4 इमित थःथः मालिकयाथाय् वनाः थथे धा धकाः आज्ञा ब्यु, ‘दक्व शक्ति दुम्ह परमप्रभु, इस्राएलया परमेश्वरं थथे धयादी, “छिमिसं थःथः मालिकयात थथे धा,
5 थ्व पृथ्वी, थ्व पृथ्वीइ च्वंपिं मनूत व पशुतय्त जिं थःगु तःधंगु बलं व ल्हाःया शक्तिं दय्कागु दु, अले जिं थुकियात सुयात बी मास्ति वः वयात बी।
6 आः जिं थ्व फुक्क देशत थः दास बेबिलोनयाम्ह जुजु नबूकदनेसरयात बी धुन, अले वयागु सेवा यायेमा धकाः गुँपशुत नं वयात बिया।
7 वयागु थःगु जाति पतन जुइगु ई मवतले थ्व फुक्क जातिं वयागु, वया काय्यागु व वया छय्यागु सेवा याइ। अनंलि यक्व जाति व ततःधंपिं जुजुपिन्सं वयात थःगु बसय् तइ।
8 “‘“अय्नं छुं जाति वा देशं बेबिलोनयाम्ह जुजुया सेवा मयात धाःसा वा वया जुवाया क्वय् थःगु ककु मतल धाःसा जिं उगु जातियात वयागु ल्हातं नाश मयाःतले तरवार, अनिकाल व महामारीं सजाँय बी, जि, परमप्रभुं धाये।
9 उकिं छिमिसं बेबिलोनयाम्ह जुजुया सेवा यायेमाली मखु धकाः छिमित धाःपिं छिमि अगमवक्तात, छिमि ज्वखना स्वइपिं, छिमिगु म्हगसया अर्थ कनीपिं छिमि धामी वा तन्त्रमन्त्र याइपिनिगु खँ न्यने मते।
10 इमिसं मखुगु अगमवाणी ल्हाइ गुकिं छिमित थःगु देशं तापाक यंकीगु ज्या जक जुइ। जिं छिमित देशं पितिनाछ्वये अले छिपिं नाश जुइ।
11 तर छुं जातिं बेबिलोनयाम्ह जुजुया जुवा थःगु ककुइ तयाः वयागु सेवा याइ, जिं उगु जातियात वयागु थःगु हे देशय् बुँज्या याकेबी अले च्वनेबी,”’” परमप्रभुं धयादी।
12 यहूदाया जुजु सिदकियाहयात जिं थ्व फुक्क खँ नं धया। जिं धया, “बेबिलोनयाम्ह जुजुया जुवा थःगु ककुइ ति अले वयात व वया मनूतय्त सेवा या। अले छ म्वाइ।
13 बेबिलोनयाम्ह जुजुया सेवा मयाइपिं जातिया बारे परमप्रभुं धयादीगु थें तरवार, अनिकाल व महामारीं छ व छिमि प्रजा छाय् सीगु?
14 ‘बेबिलोनया जुजुया सेवा छिमिसं यायेमाली मखु’ धकाः धाइपिं अगमवक्तातय्गु खँ छिमिसं न्यने मते, छाय्धाःसा इमिसं ला छिमित मखुगु अगमवाणी ल्हानाच्वंगु दु।
15 परमप्रभुं धयादी, ‘जिं इमित छ्वयागु मखु, अय्नं इमिसं जिगु नामय् मखुगु अगमवाणी ल्हानाच्वंगु दु। उकिं जिं छिमित देशं पितिनाछ्वये। छिपिं छिमित अगमवाणी ल्हाइपिं छिमि अगमवक्तातनापं नाश जुइ।’”
16 अले पुजाहारीत व सकलें मनूतय्त जिं थथे धया, “परमप्रभुं थथे धयादी – छिमिसं थः अगमवक्तातय्गु खँ न्यने मते। इमिसं धाइगु, ‘परमप्रभुया देगःया थलबल बेबिलोनं याकनं हइगु जुइ।’ इमिसं छिमित मखुगु अगमवाणी धयाच्वंगु दु।
17 इमिगु खँ न्यने मते। बेबिलोनयाम्ह जुजुया अधीनय् च्वनाः वयागु सेवा या, छिपिं म्वाइ। थ्व शहरयात छाय् नाश जुइके बीगु।
18 इपिं अगमवक्तात खः अले इमिके परमप्रभुया वचन दु धइगु खःसा, परमप्रभुया देगलय् दुगु, यहूदाया जुजुया दरबारय् दुगु व यरूशलेमय् ल्यं दुगु मालसामान बेबिलोनय् मयंकेमा धकाः दक्व शक्ति दुम्ह परमप्रभुयाके इमिसं बिन्ति यायेमा।
19 देगःया थां, कँय्यागु तग्वःगु त्यांकि, लिधंसात व शहरय् त्वःता वंगु मेमेगु सामानया बारे दक्व शक्ति दुम्ह परमप्रभुं थथे धयादी,
20 गुगु सामान बेबिलोनया जुजु नबूकदनेसरं यहोयाकीमया काय्, यहूदाया जुजु यहोयाकीनयात यरूशलेमं ज्वनाः यहूदा व यरूशलेमयापिं ततःधंपिं मनूतलिसें बेबिलोनय् यंकूबलय् मयंकूगु खः,
21 परमप्रभुया देगलय्, यहूदाया जुजुया दरबारय् व यरूशलेमय् ल्यनाच्वंगु उपिं थलबलया बारे दक्व शक्ति दुम्ह परमप्रभु, इस्राएलया परमेश्वरं थथे धयादी,
22 ‘व फुक्क सामान बेबिलोनय् यंकीगु जुइ। अले जिं इमित वास्ता मयातले व सामान अन हे दयाच्वनी अले जिं व सामान हाकनं लित हये, अले यरूशलेमय् हाकनं तये,’” परमप्रभुं धयादी।