1 न्हय्दँ न्हय्दँ फुइबलय् छिमिसं त्यासा त्वःताबीमाः।
2 व थुकथं यायेमाः, सुं मनुखं मेम्ह इस्राएलीयात त्यासा ब्यूगु दुसा वं उकियात त्वःताबीमाः। वं त्यासा लित कायेगु कुतः मयायेमाः। छाय्धाःसा थ्व दँय् त्यासा त्वःताब्यु धकाः परमेश्वरं धयादीगु दु।
3 परदेशीयाके धाःसा कर यानाः काये फु अय्नं दाजुकिजापिन्त बियागु त्यासा लित मकासें त्वःताबीमाः।
4 अथे जूसाः छिमिगु दथुइ सुं नये मखंपिं जुइ मखु छाय्धाःसा परमप्रभु छिमि परमेश्वरं छिमित सर्बयकथं त्यासा कायेत बियादीत्यंगु देशय् सुवाः बियादी।
5 छिमिसं छिमि परमप्रभुयागु वचन बांलाक न्यन धाःसा अले जिं छिमित कनेगु आज्ञा बांलाक मानय् यात धाःसा
6 वय्कःया थःगु बचंकथं परमप्रभु छिमि परमेश्वरं छिमित सुवाः बियादी अले छिमिसं यक्व जातितय्त त्यासाबी। छिमिसं धाःसा त्यासाकाये मालि मखु। अले छिमिसं यक्व जातितय्त शासन याइ, अय्नं इमिसं छिमित शासन याये खनि मखु।
7 परमप्रभु छिमि परमेश्वरं छिमित बियादीगु देशया शहरय् छिमि इस्राएलीतय् सुं नये मखंसा छिमिसं वयात बीत नुगः स्याके मते।
8 बरु वयात छु छु माःगु खः नुगः मस्याकुसें त्याये ब्यु।
9 होश या! सुं मनुखं त्यासा त्वःतेगु न्हय्गूगु दँ वइन धकाः मभिंगु बिचाः नुगलय् तयाः थः गरीब दाजुकिजायात छुं मबिल धाःसा व गरीबम्हय्सिनं परमप्रभुयाथाय् छंगु विरोधय् इनाप याइ, अले छन्त पापया द्वपं लाइ।
10 छिमिसं वयात धात्थें हे ब्यु, वयात बीबलय् छिमिगु नुगः मस्यायेमाः छाय्धाःसा थुकिं यानाः परमप्रभु छिमि परमेश्वरं फुक्क ज्याय् व छिमिसं ल्हाः तइगु फुक्क खँय् सुवाः बियादी।
11 देशय् नये मखंपिं न्ह्याबलें दइ। अथे जुयाः जिं छिमित धयाच्वनागु दु, थःगु देशय् च्वंपिं गरीबपिं व मगाःमचाःपिं मनूतय्त नुगः मस्याकुसें ब्यु।
12 छिमि सुं हिब्रू दाजुकिजा वा तताकेहेँनं थःत थःम्हं छिमिगु ल्हातय् मिल अले वं खुदँ तक छिमिगु सेवा यात धाःसा न्हय्दँ क्यनीबलय् वयात त्वःताछ्वयेमाः।
13 छिमिसं वयात त्वःताछ्वइबलय् खालि ल्हाः छ्वये मते।
14 छिमिसं थःगु फैच्वलय्पाखें, थःगु खलां व थःगु दाखतिसिगु सालं नुगः मस्याकुसें वयात ब्यु। परमप्रभु छिमि परमेश्वरं छिमित गज्याःगु सुवाः बियादीगु दु, वकथं हे वयात ब्यु।
15 मिश्रय् छिपिं दास जुयाच्वंबलय् परमप्रभु छिमि परमेश्वरं छिमित त्वःतकाहयादीगु खँ लुमंकि। अथे जुयाः थौं जिं छिमित थ्व आज्ञा बी।
16 अय्नं छिमि च्यलं छन्त व छिमि छेँजःयात माया यानाः छिपिंलिसें लय्तायाः “छिमित त्वःतावने मखु” धकाः धाल धाःसा
17 वयात लुखाय् यंकाः छपु नतूचा कयाः वयागु न्हय्पंप्वाः खनाब्यु। अले व म्वातले छिमि च्यः जुइ। थः भ्वातिंयात नं अथे हे या।
18 च्यःयात त्वःतावने बीत थाकु चाये मते। छाय्धाःसा ज्याला कयाः ज्या याइम्ह ज्यामिनं काइगु ज्यालाया निदुगं मूया ज्या वं खुदँय् यात। अले परमप्रभु छिमि परमेश्वरं छिमित फुक्क ज्याय् सुवाः बियादी।
19 छिमि सा द्वहं व फैच्वलय्या न्हापां बूम्ह न्ह्याम्ह बाजात नं परमप्रभु छिमि परमेश्वरया निंतिं अलग तयेमाः। छिमि न्हापां बूम्ह द्वहंचायात छुं ज्याय् छ्यले मते। अले न्हापां बूम्ह फैया सँ खाये मते।
20 परमप्रभुं ल्ययादीगु थासय् वय्कःया न्ह्यःने छिमिसं थः छेँजःपिंलिसें दँय्दसं वयागु ला नयेगु या।
21 सुं पशु लंग्रा वा मिखा मखंम्ह जूसा वा मेगु छुं कथंया ख्वं वयाके दुसा वयात परमप्रभु छिमि परमेश्वरया लागि बां बी मते।
22 थःगु हे शहरय् व नयेगु या। हरिण व चल्लाया ला नः थें नियमकथं शुद्ध वा अशुद्ध मनुखं व नये ज्यू।
23 छिमिसं हि धाःसा नये मते। उकियात लः थें बँय् प्वंकाब्यु।