1 एलीशा अगमवक्तां अगमवक्तातय् पुचःयाम्ह छम्हय्सित सःताः धाल, “तयार जु, थ्व जैतून चिकंया सिसी ज्वनाः छ रामोत गिलादय् हुँ।
2 अन थ्यनीबलय् छं निम्शीया छय्, यहोशापातया काय् येहूयात मा। वयाथाय् हुँ, दुने वनाः वयात पासापिंपाखें अलग यानाः दुने च्वंगु क्वथाय् यंकि।
3 अले थ्व सिसिइ दुगु चिकं वयागु छेनय् लुनाः थथे धा, ‘परमप्रभुं थथे धयादी – जिं छन्त इस्राएलया जुजु अभिषेक यानागु दु।’ अनंलि खापा चाय्काः बिस्युं हुँ। लिबाके मते!”
4 उकिं व ल्याय्मम्ह अगमवक्ता रामोत-गिलादय् वन।
5 अन थ्यंबलय् वं सेनाया कप्तानतय्त छथाय् च्वनाच्वंगु खन। वं धाल, “कप्तान, छिलिसें छगू खँ ल्हाये माःगु दु।”
6 येहू दनाः छेँय् दुने दुहां वन। व ल्याय्मम्ह अगमवक्तां येहूया छेनय् चिकं लुनाः थथे धाल, “परमप्रभु, इस्राएलया परमेश्वरं थथे धयादी – ‘जिं छन्त जिमि प्रजा इस्राएलया जुजु अभिषेक यानागु दु।
7 छं थः मालिक आहाबया काय्पिन्त स्यायेमाः, अले ईजेबेलं जिम्ह अगमवक्तात व मेमेपिं दासतय्त स्याःगुलिं जिं वयात सजाँय बी।
8 आहाबया फुक्क घराना नाश जुइ। जिं वया छेँयापिं छम्ह छम्ह मिजंतय्त, दास थजुइमा वा दास थमजुइमा, इस्राएलय् नाश यानाबी।
9 जिं आहाबया घरानायात नबातया काय् यारोबाम व अहियाहया काय् बाशाया घराना थें यानाबी।
10 यिजरेलया छकू बुँइ ईजेबेलयात खिचातय्सं नइ। वयात सुनानं थुनी मखु।’” अथे धयाः व अगमवक्ता खापा चाय्काः ब्वाँय् वन।
11 येहू थः कप्तान पासापिन्थाय् पिहां वन। इपिं मध्ये छम्हय्सिनं वयात न्यन, “फुक्क ठीक जू ला? व वें छन्थाय् छाय् वःगु?”
12 इमिसं लिसः बिल, “जिमिसं छुं मस्यू! वं छु धाल, जिमित धा।”
13 इमिसं हथाय् चाचां थःगु गा त्वयाः वयागु क्वय् स्वाहानेय् हे लायाबिल। अले तुरही पुयाः तःसलं धाल, “येहू जुजु खः!”
14 उकिं निम्शीया छय्, यहोशापातया काय् येहूं योरामया विरोधय् ग्वसाः ग्वल। (योराम फुक्क इस्राएलीतनापं अरामया जुजु हजाएलपाखें इस्राएलया रक्षा यायेत रामोत-गिलादय् च्वनाच्वंगु खः।
15 तर योराम अरामया जुजु हजाएललिसें लडाइँ याःबलय् घाःपाः जूगुलिं थःगु घाः लंकेत यिजरेलय् लिहां वःगु खः।) येहूं थःनापं दुपिं मनूतय्त धाल, “छिपिं जिलिसें दु धयागु खःसा यिजरेलयापिं मनूतय्त खबर बीत थ्व शहरं छम्हय्सित नं पिहां वनेबी मते।”
16 अनंलि थःगु रथय् च्वनाः व यिजरेलपाखे वन। योराम अन आराम यानाच्वंगु खः, अले योरामयात स्वयेत यहूदाया जुजु अहज्याह अन वःगु खः।
17 यिजरेलया धरहराय् दनाच्वंम्ह पालें येहूया पुचः वयाच्वंगु खनाः तःसलं धाल, “जिं छपुचः मनूत रथय् च्वनाः वयाच्वंगु खनाच्वनागु दु।”
18 व सल गयावंम्ह येहूयाथाय् थ्यन, अले वयात थथे धाल, “जुजुं थथे धयादी – ‘छिकपिं शान्तिया निंतिं वयागु खः ला?’”
19 जुजुं सल गइम्ह मेम्ह मनू छ्वल। व येहूयाथाय् वःबलय् वं धाल, “जुजुं थथे धयादी, ‘छु छि शान्तिया निंतिं वयागु खः ला?’”
20 अले पालें धाल, “व इमिथाय् ला थ्यन। तर व नं लिहां मवः। पुचःया नायलं निम्शीया छय् येहूनं थें रथ चले यानावयाच्वंगु दु। वं वेंनं थें रथ चले याइगु।”
21 योरामं धाल, “जिगु रथ तयार या!” इमिसं रथ तयार यायेधुंकाः इस्राएलया जुजु योराम व यहूदाया जुजु अहज्याह थथःगु रथय् च्वनाः येहूयात नापलावन। इमिसं वयात यिजरेली नाबोतया जमिनय् नापलात।
22 येहूयात खनाः योरामं न्यन, “छु छि शान्तिया निंतिं वयागु खः ला?”
23 योराम थःगु रथ फहिकाः अहज्याहयात थथे धाधां बिस्युं वन, “अहज्याह! धोखा जुल।”
24 येहूं थःगु धनुष पिकयाः योरामया ब्वहःया दथुइ कय्कल। वाणं वयागु नुगलय् सुयाबिल। अले व थःगु रथय् ग्वारातुल।
25 येहूं थः रथया कप्तान बिदकारयात धाल, “वयात ल्ह्वनाः यिजरेली नाबोतया क्यबय् वान्छ्वया ब्यु। जितः छता खँ लुमना वल। छ व जि वया बौ आहाबया ल्युने ल्युने रथय् च्वनाः वनाच्वनाबलय् वया बारे थ्व अगमवाणी धयादीगु खः।
26 ‘परमप्रभुं थथे धयादी, जिं म्हिगः नाबोत व वया काय्पिनिगु हि खना। धात्थें जिं थ्व हे जमिनय् छंके बदला काये।’ आः परमप्रभुया वचनकथं वयात यंकाः व हे क्यबय् वांछ्वयाब्यु।”
27 थथे जूगु खनाः यहूदाया जुजु अहज्याह बेथ-हागान वनीगु लँ तक हे बिस्युं वन। येहूं वया ल्यू वनाः तसलं धाल, “वयात नं स्या।” उकिं इमिसं यिबलामया लिक्क गूरया पाःचाय् वयात वयागु हे रथय् घाःपाः यानाबिल। तर व मगिद्दोय् बिस्युं वन, अले अन हे सित।
28 वया च्यःतय्सं वयागु सीम्ह रथय् तयाः यरूशलेमय् यंकल। वयात वयागु हे चिहानय् वया पुर्खातनापं दाऊदया शहरय् थुन।
29 आहाबया काय् योराम इस्राएलया जुजु जूगु झिंछगूगु दँय् अहज्याह यहूदाया जुजु जूगु खः।
30 येहू यिजरेलय् वन। ईजेबेलं वयागु बारे न्यनाः थःगु मिखाय् अजः तल, अले सँ छ्यनाः झ्यालं क्वय् स्वल।
31 येहू ध्वाखा दुने दुहां वनेवं ईजेबेलं न्यन, “थः मालिकयात स्याइम्ह अय् जिम्री, छ शान्तिया निंतिं वयागु खः ला?”
32 वं च्वय् झ्याःपाखे स्वयाः धाल, “जिपाखे सु दु? सु दु?” अले निम्ह स्वम्ह नपुंसकतय्सं क्वय् व दुथाय् स्वल।
33 येहूं धाल, “वयात क्वफानाछ्व!” उकिं इमिसं वयात क्वफानाछ्वल। वयागु हिया फुति अंगलय् लात अले सलतय्सं वयात न्हूबलय् इमिगु म्हय् नं हिया फुति लात।
34 येहूं दुहां वनाः नयेत्वने यात। अले येहूं धाल, “व सराः लाःम्ह मिसायात यंकाः थुनाब्यु। व जुजुया म्ह्याय् खः।”
35 इपिं वयात थुनेत क्वय् वंबलय् इमिसं वयागु छ्यंया क्वँय्, तुति व ल्हाः जक लुइकल।
36 इमिसं लिहां वयाः येहूयात धाल। अले वं धाल, “थ्व ला यिजरेलया उगु थासय् खिचातय्सं ईजबेलया ला नइ धकाः थः दास तिश्बी एलियापाखें धयादीगु परमप्रभुया वचन खः।
37 ईजेबेलया म्ह यिजरेलया जमिनय् साः थें जुइ। गुकें यानाः सुनानं ‘थ्व ईजेबेल खः धकाः धाये फइ मखु।’ ”