1 योशियाह जुजुं परमप्रभुया निंतिं यरूशलेमय् छुत्काराया नखः हन। न्हापांगु लाया झिंप्यन्हु दुखुन्हु इमिसं छुत्काराया चिधीम्ह भ्याःचा स्यात।
2 वं पुजाहारीतय्त थथःगु ज्याय् तल, अले परमप्रभुया देगलय् सेवा यायेत इमित हःपाः बिल।
3 वं फुक्क इस्राएलयात स्यनीपिं व परमप्रभुयात शुद्ध यानातःपिं लेवीतय्त आज्ञा बिल, “इस्राएलया जुजु दाऊदया काय् सोलोमनं दय्कूगु देगलय् बाचा चिनादीगु सनू ति। छिमिसं हानं सनू क्वबिया जुइ म्वाल। अथे जुयाः थः परमप्रभु परमेश्वर व वय्कःया प्रजा इस्राएलया सेवा या।
4 इस्राएलयाम्ह जुजु दाऊद व वया काय् सोलोमनं च्वःगु विधिकथं थथःगु परिवारकथं थथःगु पुचलय् तयार जु।
5 “अले पवित्र थासय् लेवीत पुचः पुचः यानाः दँ। थुकिं यानाः छिमिसं थःनापं ज्या याइपिं चिचीधंगु पुचःया निंतिं ग्वाहालि याये फइ।
6 छुत्काराया नखःया चिधीपिं भ्याःचात स्या। अले मोशापाखें बियादीगु परमप्रभुया वचनकथं थःपिन्त शुद्ध यानाः थःनापं ज्या याइपिं इस्राएलीतय्गु निंतिं मेपिं चिधीम्ह भ्याःचात तयार या।”
7 योशियाहं अन दुपिं फुक्क मनूतय्त छुत्काराया फुक्क बलिया निंतिं ३०,००० म्ह चिधीम्ह भ्याःचा व दुगुचा बिल। अले वं व हे इलय् मेगु बलिया निंतिं ३,००० म्ह द्वहं नं बिल। व फुक्कं वं थःगु सम्पत्तिं ब्यूगु खः।
8 वया हाकिमतय्सं नं मनूत, पुजाहारीत व लेवीतय्त थःगु इच्छां पशुत बिल। परमप्रभुया देगःया नायःत हिल्कियाह, जकरिया व यहीएलं पुजाहारीतय्त नखःबलय् बलि बीत २,६०० म्ह चिधीम्ह भ्याःचा व दुगुचा बिल। अले मेगु बलिया निंतिं स्वसःम्ह द्वहंत नं बिल।
9 लेवीतय् नायःत कोनन्याह व वया किजापिं शमायाह व नतनेल, अले मेपिं लेवीतय् नायःत हशब्याह, यहीएल व योजाबादं लेवीतय्त ५,००० म्ह चिधीम्ह भ्याःचा व दुगुचा बिल। अले मेगु बलिया निंतिं न्यासःम्ह द्वहं नं बिल।
10 थुकथं सेवा शुरु यायेत फुक्क तयार जुल, अले जुजुया आज्ञा कथं पुजाहारीत थथःगु थासय् व लेवीत थथःगु पुचलय् दन।
11 इमिसं छुत्काराया चिधीम्ह भ्याःचात स्यात। पुजाहारीतय्सं वेदीइ हि हा हा यात। लेवीतय्सं धाःसा उपिं पशुतय्गु छेंगू तुल।
12 अनंलि इमिसं मोशाया सफुलिइ च्वया तः थें मनूतय् परिवार परिवारया पुचः पुचःयात परमप्रभुयात छायेगु निंतिं बीत होमबलित अलग्ग तल। अले द्वहंतय्त नं अथे हे यात।
13 इमिसं विधिकथं छुत्काराया पशुया ला मिइ छुल, अले पवित्र देछात धाःसा थल, कित्ली व तापेसय् मन, अले व फुक्क मनूतय्त हथासं इन।
14 अनंलि हारूनया वंशयापिं पुजाहारीतय्सं बहनि तक हे होमबलि व पवित्र बलिं दाः इमिसं थःगु निंतिं व हारूनया वंशयापिं पुजाहारीतय्गु निंतिं तयारी यात।
15 आसापया सन्तान अर्थात म्ये हालीपिन्सं धाःसा दाऊद, आसाप, हेमान व जुजुया अगमवक्ता यदूतूनं क्वःछिनातःगु नियमकथं थथःगु थाय् काल। फुक्क लुखा पिवाःत थथःगु मू लुखाय् दनाच्वन। इमि थःथिति लेवीतय्सं इमिगु निंतिं तयारी याःगु जुयाः ध्वाखा पिवाःतय्सं थथःगु ज्या त्वःताः वये म्वाल।
16 थुकथं उखुन्हु हे योशियाह जुजुयागु आज्ञा कथं छुत्काराया नखः हनेत व परमप्रभुया वेदीइ होमबलि छायेत परमप्रभुया आराधनाया फुक्क तयारी यात।
17 अन दुपिं इस्राएलीतय्सं अबलय् छुत्काराया नखः हन, अले न्हय्न्हु तक सोडा मतःगु मरिया नखः हन।
18 अगमवक्ता शमूएलया इलंनिसें इस्राएलय् थुकथंयागु छुत्काराया नखः गुबलें हंगु मदुनि। योशियाह जुजुं पुजाहारीत, लेवीत, यरूशलेमयापिं मनूत अले यहूदा व इस्राएलया फुक्क थासं अन वःपिं मनूतनापं हंगु थें ज्याःगु छुत्काराया नखः न्हापा गुबलें इस्राएलया मेपिं जुजुपिन्सं हंगु मदुनि।
19 योशियाह जुजु जूगु झिंच्यागूगु दँय् थ्व छुत्काराया नखः हंगु खः।
20 योशियाह जुजुं देगःया निंतिं थ्व फुक्क यायेधुंकाः मिश्र देशया जुजु नेको थः सेना ज्वनाः लडाइँ यायेत यूफ्रेटिस खुसि सिथय् च्वंगु कर्कमीश शहरय् वल। अले योशियाह वनापं लडाइँ यायेत पिहां वन।
21 तर नेकोनं वयाथाय् थ्व खबर छ्वल,
22 तर योशियाह लिमच्यू, तर नेकोलिसें ल्वायेत वं थःत म्हमसीक मेम्ह थें च्वंकल। अले लडाइँ याः वन। वं नेकोपाखें वःगु परमेश्वरया वचनयात वास्ता मयाः। तर मगिद्दोया ब्यासिइ वलिसें ल्वाः वन।
23 वाण कय्कीपिन्सं योशियाह जुजुयात वाणं कय्कल। अले वं थः मनूतय्त धाल, “जितः थनं तापाक यंकि, जि बांमलाक घाःपाः जूगु दु।”
24 उकिं इमिसं योशियाहयात रथं क्वकाल। अले वयात वयागु हे मेगु रथय् तयाः यरूशलेमय् हल। व अन हे सित, अले वयात वया पुर्खातय्गु चिहानय् थुन। व सीगुलिं यहूदा व यरूशलेमयापिं फुक्क मनूतय्सं नुगः मछिंकल।
25 अगमवक्ता यर्मियां नं योशियाहया निंतिं सीम्येत च्वल। म्ये हालीपिं फुक्क मिजं व मिस्तय्सं थौं तक नं थुपिं सीम्येलय् योशियाहयात लुमंकी। थुपिं सीम्येत इस्राएलय् छगू परम्परा जूगु दु। थुपिं सीम्येत बिलापया म्येलय् नं च्वयातःगु दु।
26 योशियाह जुजु जुयाच्वंबलय् जूगु फुक्क खँ, अले परमप्रभुया व्यवस्थाय् च्वयातःगु थें,
27 वं याःगु भक्तिया ज्यात, शुरुंनिसें लिपा थ्यंकया फुक्क खँ इस्राएल व यहूदाया जुजुपिनिगु इतिहासया सफुलिइ च्वयातःगु दु।