1 मनश्शे झिंनिदँ दुबलय् जुजु जूगु खः। वं नेय्न्यादँ (५५) यरूशलेमय् राज्य यात।
2 परमप्रभुं इस्राएलीतय्गु न्ह्यःनं लिनाछ्वःपिं जातितय्सं याःथें घच्चाइपुगु ज्याखं मनश्शें परमप्रभुया मिखाय् मभिंगु ज्या यात।
3 थः अबु हिजकियां नाश याःगु पुजा यायेगुथाय् वं हाकनं दय्कल। वं बालद्यःतय्त पुजा यायेत वेदीत व अशेरा द्यःमय्जुया थांत दय्कल, वं आकाशया सूर्य, तिमिला, नगु व ग्रहयात क्वछुनाः पुजा यात।
4 मूर्ति पुजा याइपिनिगु निंतिं वं देगलय् वेदीत दय्कल। उगु देगःया बारे यरूशलेमय् न्ह्याबलें जिगु नां दइ धकाः परमप्रभुं धयादीगु खः।
5 देगःया निगुलिं चुकय् वं आकाशया सूर्य, तिमिला, नगु व ग्रहयात पुजा याइगु वेदीत दय्कल।
6 वं थः काय्पिन्त बेन-हिन्नोमया ब्यासिइ मिइ बलि बिल। वं जादु यात अले भिं मभिं स्वल। वं तन्त्रमन्त्र यात अले भुतप्रेत व आत्मातनापं स्वापु तइपिनिगु व झाक्रिततय्गु सल्लाह काल। वं परमप्रभुया मिखाय् तसकं मभिंगु ज्या यानाः वय्कःयात तंचाय्कल।
7 वं देगलय् छगू मूर्ति तल, उगु देगःया बारे परमप्रभुं दाऊद व वया काय् सोलोमनयात थथे धयादीगु खः, “जिं इस्राएलया फुक्क कुलपाखें ल्ययागु थ्व देगः व यरूशलेमय् जिं न्ह्याबलेंया निंतिं जिगु नां तये।
8 इमिसं जिगु फुक्क आज्ञा मानय् यानाः जिम्ह दास मोशां इमित ब्यूगु व्यवस्था, विधि व नियम होश यानाः पालन यात धाःसा जिं इमि पुर्खातय्त बियागु देशं इस्राएलीतय्त हाकनं पितिनाछ्वये मखु।”
9 अथेजूसां मनश्शें यहूदायापिं मनूतय्त ततःधंगु पाप याकल। उपिं पाप परमप्रभुं इस्राएलीतय् न्ह्यःनं लिनाछ्वःपिं जातितय्गु पाप स्वयाः तःधं।
10 मनश्शे व वया मनूतलिसें परमप्रभु न्ववानादिल, तर इमिसं वास्ता मयाः।
11 उकिं इमित हमला यायेत परमप्रभुं अश्शूरया जुजुया सेनापतित हयादिल। इमिसं मनश्शेयात ज्वन, वयागु न्हासय् हुक तयाबिल। इमिसं वयात कँय्यागु सिखलं चिनाः बेबिलोनय् यंकल।
12 तर आपत जूबलय् वं परमप्रभु थः परमेश्वरयाके ग्वाहालि फ्वन, अले व वया पुर्खातय् परमेश्वरया न्ह्यःने क्वमिलु जुल।
13 वं प्रार्थना यात। परमेश्वरं मनश्शेया प्रार्थना न्यनादिल। वय्कलं मनश्शेयात यरूशलेमय् हाकनं लितहयादिल। अले वयात राजगद्दीइ तयादिल। थुकथं मनश्शें परमप्रभु हे परमेश्वर खः धकाः सीकल।
14 अनंलि मनश्शें दाऊदया शहरया पुर्बपाखे च्वंगु पिनेयागु पखाः अज्ज तःजाय्कल। गीहोन बुँगाःचाया दच्छिनंनिसें न्या ध्वाखा तक वं पःखाः अज्ज तःजाय्कल। ओफेल डाँडायात पखालं घेरय् यात। अले यहूदियाय् फुक्क पःखाः ग्वयातःगु शहरय् वं छम्ह छम्ह सेना नायःया अधीनय् छपुचः छपुचः सिपाइँत तल।
15 वं परमप्रभुया देगलय् थःम्हं तःगु विदेशी द्यःतय्गु मूर्ति देगलं चीकाछ्वल। अले देगःया डाँडा व यरूशलेमया थीथी थासय् वं थःम्हं हे दय्कूगु वेदीत चीकल। अले उपिं फुक्कयात वं शहरं पिने यंकाः वांछ्वयाबिल।
16 वं परमप्रभुया वेदी ल्ह्वनाः उकी मेलबलि व सुभाय् बलि छाल। परमप्रभु इस्राएलया परमेश्वरया सेवा यायेत वं यहूदायापिं फुक्क मनूतय्त आज्ञा बिल।
17 अय्नं मनूतय्सं आराधना यायेगु थासय् बलि बिया हे च्वन, तर परमप्रभु इमि परमेश्वरया लागि जक खः।
18 मनश्शे जुजु जुयाच्वंबलय् जूगु फुक्क खँ अले थः परमेश्वरयात वं याःगु प्रार्थना व परमप्रभु इस्राएलया परमेश्वरया नामय् वयात अगमवक्तातय्सं धाःगु खँत इस्राएलया जुजुपिनिगु सफुलिइ च्वयातःगु दु।
19 जुजुया प्रार्थना व परमप्रभुया लिसः, पश्चाताप याये न्ह्यः वं याःगु पाप, वयागु विश्वासघात, वं दय्कूगु मूर्ति पुजा याइगु थाय् व अशेरा द्यःमय्जुया थांत व पुजा याःपिं द्यःतय्गु खँ अगमवक्तातय्गु सफुलिइ च्वयातःगु दु।
20 मनश्शे सित, वयात वयागु हे दरबारया लिक्क थुन। वया लिपा वया काय् आमोन जुजु जुल।
21 आमोन निइनिदँ दुबलय् जुजु जूगु खः। वं यरूशलेमय् निदँ राज्य यात।
22 वं थः अबुनं याःथें हे परमप्रभुया मिखाय् मभिंगु ज्या यात। अले थः अबु मनश्शें दय्कूगु फुक्क मूर्तितय्त बलि बिल अले पुजा यात।
23 तर थः अबु थें व परमप्रभुया न्ह्यःने क्वमिलु मजू। व थः अबु स्वयाः झन पापी जुल।
24 आमोनया भारदारतय्सं वयागु विरोधय् ग्वसाः ग्वल, अले वयात वयागु हे दरबारय् स्यानाबिल।
25 अले इस्राएलया मनूतय्सं जुजु अमोनयात स्याःपिं सकसितं स्यात। इमिसं वया काय् योशियाहयात वयागु थासय् जुजु दय्कल।