1 “Nochi ipan ilhuicacti huan taltipacti ma quitacaquilica cati na niquijtos.
2 Xijselica notamachtil quej anquiselíaj at quema taquiyahui.
3 Na nitayolmelahua itoca TOTECO.
4 Yaya cati techmanahuía.
5 Pero nopa israelitame amo quichijtoque cati cuali.
6 ¿Quej nopa anquitaxtahuíaj TOTECO, anisraelitame?
7 Xiquelnamiquica nopa tonali cati huejcajquiya huan quenicatza panotihualajque amohuejcapan tatahua.
8 Oncac se tonali huejcajquiya quema Toteco Cati Más Hueyi quinmajmacac nochi xinach masehualme sesen tali campa itztosquíaj.
9 Pampa tiisraelitame tiimasehualhua TOTECO.
10 TOTECO techpanti tiisraelitame huan tohuejcapan tatahua ipan nopa huactoc tali,
11 Techchihuili quej se cuatojti moeltapalpapatatza ipan itepasol huan quinnotza ipilconehua para ma patanica.
12 Yaya TOTECO iseli techyacantoc huan amo aqui más.
13 TOTECO quichijqui ma titatanica.
14 Techtamacac ica mantequilla huan lechi ten inintapiyalhua.
15 Pero tiisraelitame pejqui tineltacuaj,
16 Huan tiisraelitame tijpejpehualtijque huan tijcualanijque TOTECO Dios,
17 Tiisraelitame tiquinmactilijque tacajcahualisti ajacame ten Amocualtacat,
18 Israelitame, anquielcajtoque amoTata huan amoTamanahuijca. Anquielcajque Toteco Dios cati techmacatoc nemilisti.
19 Huan TOTECO quiitac cati tijchihuayayaj huan tahuel cualanqui ica tojuanti.
20 Huan teipa TOTECO quiijto: ‘Na nojquiya nimoicancuepas ica inijuanti,
21 Techchijque ma niquintasomati pampa quinhueyichijque teteyome huan taixcopincayome cati amo ya Toteco Dios.
22 Nocualancayo tejcos quej se tit,
23 Nielis quej se cati quinmajcahuilis cuataminti,
24 Cocoxcatiyase ica mayanti huan miquise ica tatotonilot.
25 Ipan calles huetzise ininconehua mictoque ica macheta,
26 Na niquijto para niquinsemanas huan niquintamiixpolos ipan taltipacti hasta amo aqui quinelnamiquis.
27 Pero amo niquijyohuisquía quema techpaquitasquíaj nocualancaitacahua.
28 Pero anisraelitame anquipolojtoque talnamiquilisti,
29 Sinta elisquía antamatini, huajca anquimachilisquíaj huan anquimatisquíaj canque antamitij.
30 Pampa ¿quenicatza elqui para setzi amocualancaitaca huelqui amechquixti mil anisraelitame?
31 Inintamanahuijca amocualancaitacahua amo hueli quitanis totamanahuijca tojuanti.
32 Pero anisraelitame anitztoque quej xocomeca tzonti cati amo cuali.
33 Amoxocomeca ayo eltoc quej inintencococa nopa cohuame cati temictíaj quej mahuaquijme.
34 ‘Nicajoctihuala miyac tamanti fiero para ica nimechtatzacuiltis.
35 Nochi nicajoctoc para nopa tonali quema nimomacuepas huan nimechmacas anisraelitame.
36 TOTECO quistehuas huan quintajtolsencahuas imasehualhua quema quiitas ayecmo quipiyaj fuerza.
37 Huan TOTECO quinilhuis:
38 ¿Canque itztoque cati quicuayayaj ichiyajca amotacajcahualis,
39 San na niiyojtzi niDIOS,
40 Nijtanana nomax para ilhuicac huan nitatestigojquetza.
41 huan temachti nijtentis nomacheta cati cahuani huan nipehuas nitetajtolsencahuas,
42 Nochi nocuataminhua nijchihuas xolontoc ica inieso.
43 ¡Ximoyolpaquiltica, nochi anmasehualme ipan taltipacti inihuaya imasehualhua TOTECO Dios!
44 Huan Moisés ihuaya Josué, icone Nun, monextijque iniixpa nochi israelitame,
45 huan Moisés quinpohuili ni huicat ten ipejya hasta itamiya.
46 Teipa quinilhui nopa israelitame:
47 Pampa ya ni amo ya se tamanti cati amojuanti huelis san anquiahuilmatise. Ni tanahuatilme eltoque nemilisti para amojuanti. Huan sinta anquineltocase ni tanahuatilme, anhuejcahuase para anitztose ipan nopa cuali tali cati ama anquipanose ni hueyat Jordán huan anmoaxcatise.”
48 Ipan nopa tonali TOTECO quicamanalhui Moisés huan quiilhui:
49 “Xiya ipan nopa tepeme Abarim huan xitejco hasta nopa tepet Nebo cati eltoc ipan inintal moabitame iixmelac altepet Jericó ipan seyoc nali ne hueyat. Huan ten nopona xijtachili nopa tali Canaán cati niquinmacas ma moaxcatica ni israelitame.
50 Huan teipa timiquis ipan nopa tepet cati ipan titejcos, huan timosejcotilis inihuaya moteixmatcahua. Timiquis quej moicni Aarón cati mijqui ipan tepet Hor huan mosejcotili ica iteixmatcahua.
51 Anome, ta huan Aarón, amo anmotemachijque ipan na iniixpa nopa israelitame quema anitztoyaj campa nopa atajti Meriba nechca Cades ipan nopa huactoc tali Zin. Huan amo antechhueyichijque iniixpa.
52 Huajca san ica huejca huelis tijtachilis nopa tali cati niquinmactilis ni israelitame, pero amo huelis ticalaquis ipan nopa tali.”