1 Huan ya ni eltoc nopa huicat cati David huicac para TOTECO pampa quinmanahuijtoya ten nochi icualancaitacahua huan ten Saúl.
2 Quiijto:
3 NoTeco Dios, ta techyahualohua para amo huelis techajsise nocualancaitacahua.
4 Nijnotzas, TOTECO, cati quinamiqui tijhueyichihuase.
5 Quema nochi techyahualtzacuayayaj para techmictise,
6 Quema nijmatiyaya nimiquisquía huan techtilanayaya campa mijcatzitzi,
7 huajca ipan notaohuijcayo nijnojnotzqui TOTECO.
8 Huajca chicahuac mojmolini tali,
9 Elqui quej pocti quisayaya ipan iyacatzol.
10 Huan TOTECO quiechcapano ilhuicacti huan hualtemoc para techpalehuis.
11 Elqui quej TOTECO tejcoc ipan ieltapal se querubín ilhuicac ejquet huan patantihualajqui ajacatipa.
12 Yaya motzajqui ica tzintayohuilot,
13 Cahuaniyaya itatanex TOTECO huan elqui quej tapetaniyaya iixpa.
14 Tatomonqui nelía chicahuac ten ilhuicac huan ajsic campa hueli,
15 Quimajcajqui cuataminti huan nocualancaitacahua cholojque campa hueli.
16 Quema yaya tailpitzqui ica cualanti,
17 TOTECO momaxitajqui ten ilhuicac huan techitzqui.
18 Techmanahui ten nocualancaitacahua cati más tetique.
19 Inijuanti nechtehuijque quema nechajsitoya se hueyi tequipacholi.
20 Techhuicac campa amo mahuilili.
21 TOTECO techtaxtahuijtoc pampa nijchihua cati xitahuac iixpa.
22 Quena, nijtoquilijtoc iojhui TOTECO,
23 Niquixmati itanahuatilhua,
24 Ninejnentoc xitahuac iixpa,
25 Yeca TOTECO techtaxtahuijtoc,
26 Ta, TOTECO tiquintasojta cati tetasojtaj.
27 Timonextía titapajpactic ica cati tapajpactic.
28 Ta tiquinmaquixtía cati mocuesohuaj,
29 TOTECO, tinotaahuil.
30 Ica mochicahualis Toteco Dios huelis niquintanis miyac soldados cati nocualancaitacahua.
31 Xitahuac nochi iojhui Toteco Dios.
32 Amo aqui seyoc Dios,
33 Yaya Toteco Dios cati techchicahualismaca.
34 TOTECO quichihua noicxihua ma elica sonectzitzi.
35 TOTECO techmaca noyajatil para huelis nitatehuis.
36 Ta techmanahuía quej se teposti cati techyahualohua.
37 Noojhui tijchijtoc patahuac para amo niohuijtis,
38 Niquintoquili nocualancaitacahua, huan niquintzontamilti.
39 Niquintzontamilti nochi para amo aqui huelis sempa motananas.
40 Ta techmacac tetili para huelis nitatehuis.
41 Huan ta tijchijqui para nochi nocualancaitacahua ma choloca noixpa.
42 Inijuanti tatzajtzilijque para acajya ma quimaquixtiqui,
43 Huajca na niquinchijqui quej taltepocti.
44 Techmanahuijtoc ten nopa fiero tacame cati mopantíaj ipan noaltepe.
45 Huan cati ehuani ipan sequinoc talme huihuipicaj noixpa.
46 Sequinoc tali ehuani momajmatíaj,
47 TOTECO itztoc.
48 Toteco Dios quincuepilía nochi nocualancaitacahua.
49 Quena, TOTECO techmanahuijtoc ten nocualancaitacahua.
50 Yeca nimitztascamati, TOTECO.
51 TOTECO, ta techmanahuijtoc huan techtalijtoc nimotanahuatijca.