1 Ikiavɨra Itir God, bar arazir aghuibar e gami, kamaghɨn e a mɨnabagham.
2 Ikiavɨra Itir God, godɨn ifavaribagh afiragha bar ekefe.
3 Ekiam nguazir kamɨn gumazir ekiaba bar dagh afira.
4 A uabɨra mirakelɨn ekiabagh ami.
5 A uan nɨghnɨzir aghuimɨn overiamɨn ingari.
6 A nguazim isa dɨpabagh isɨn an ingarizɨ an aperaghav iti.
7 An aruem ko iakɨnimɨn ingari.
8 An aruem atɨzɨma an aruemɨn isiragha gari.
9 A iakɨnim ko mɨkoveziba atɨzɨma me dɨmagarimɨn isira.
10 A Isipian otarir ivariabagh soghezɨ me ariaghire.
11 A Israelian gumazamiziba inigha Isipɨn kantri ategha azenan ize.
12 A uan gavgavir ekiamɨn, ua me inigha ize.
13 An Ongarir Aghevim gamizɨ a tongɨra biaghɨrɨ.
14 A uan gumazamizibar faragha ghua, ongarir kam biaghirɨzɨ naghɨn, an an tongɨra me inigha azenan ize.
15 A Isipɨn atrivim ko an mɨdorozir gumaziba avigha Ongarir Aghevimɨn me makunizɨ me dɨpam amegha ariaghire.
16 A uan gumazamizibar faragha ghua me inigha gumazamiziba puvatɨzir danganimɨn ghuava otifi.
17 An atrivir bar gavgavibav soghezɨ me ariaghire.
18 An atrivir ziaba itibav soghezɨ me ariaghire.
19 An Amorian Atrivim Sihon, a mɨsoghezɨ an areme.
20 A Basanian Atrivim Ok, a mɨsoghezɨ an areme.
21 An atrivir kabar nguazim isa uan gumazamizibagh anɨngi.
22 A nguazir kam isa uan ingangarir gumazim Israel ganɨngizɨ, nguazir kam men nguazimra mɨn iti.
23 En apaniba e abɨrima an e gɨnɨghnɨghavɨra iti.
24 A en apanibar dafaribar uam e ini.
25 A dagheba isa gumazamiziba ko asɨziba bar me ganɨdi.
26 Bizir kabanang bagh, e Godɨn uan Nguibamɨn itim mɨnamam!