1 मावोर विस्वसिरिर! आक्रिते इद पोल्लो वेहतह्नन: माट येसुसामिना पोल्लोतुन पोकुर कीयलाह आतोम. अदिनेनाह्क अद पोल्लो चट्पिट दुनियामेंड पोकुर आयि, ओसो मियगा आतप लेह्का, सबेटोर लोकुर वने तान मान ईसि केंजिर इनजोर, मयेनाह्क पार्तना कीम्ह्टु.
2 अहे ओसो सबेटोरु विस्वस केवोर, अदिनेनाह्क विरुद केवालोर मन्कलोरग्डाहि, तेल्वे मन्कलोरग्डाहि, देवुळि माक पिसिह कीयना इनजोर वने पार्तना कीम्ह्टु.
3 मति सामि किर्स्तु सेतेमतोग़ आंदोग़. ओग़ मीक मेग़्किह कीयनोग़, ओसो देयह्कना मुक्याल मियगा वावाह, मीक राका कीयनोग़.
4 मीक माट उकुम ईतप लेह्का, मीट कीयलाह आतिर. मुनेह ओसो सामि मीक ताकिह कीताह्कु, मीट कीसोरेन मनदकिर इन्जि, सामिनगा नावा बर्वस मन्ह्ता.
5 देवुळि मीक बेचोन जीवा कीता इनजोर पुनदलाहि, ओसो येसु किर्स्तु बेद्रम तिपलते दीरा पोस मेग़्किस मतोग़, अद्रम मीट वने तिपलते दीरा पोस मेग़्किस मनदलाहि, सामि मीक ताकिह कीयनदु.
6 इंजेके मावोर विस्वसिरिर! मावा येसुसामि किर्स्तुना पेदिरते, मीक उकुम ईयलाह आतोम: उच्वुर विस्वसिर कबळतुह्क लंडालोर आतोर, माट मीक काग़्हतव पोल्लोना लेह्का ताकोर. अद्रम मनवालोरा संगे गोत आयमाट.
9 (मियगा मोता आयलाह,) माक अदिकर मताये, मति माट अद्रम आयोम. मीट वने मावा लेह्कान मनदना इनजोर, मीक तोहतलाहि, (मावाङ कय्कने कबळ कीस तितोम).
10 कबळतुह्क लंडा आयवाल मन्कल तिनमाकेग़ इनजोर, माट मियगा मनदह्पा उकुम एवोमा?
11 माट इद्रम बाराह्क रासिह्नोम इतेके, मियगा उच्वुर विस्वसिर कबळतुह्क लंडा आसि तिरियिह्तोर. आपुना कबळ-काम केवा, दुस्रोराङ कबस्कनगा कय्क वाटिह्तोर इनजोर, माट केंजतोम.
12 अद्रमतोर मन्कलोर केमेन आस कबळ कीसि, आपुना कह्टेमतुन तिनिर इनजोर, येसुसामि किर्स्तुना पेदिरते, ओरिन अर्ज कीसि उकुम ईय्ह्नोम.
13 मति मावोर विस्वसिरिर! मीट इतेके आरेम आयवा, बेसताङ कबस्क कीसोर मन्ह्टु.
14 इद सीटटे माट रासतद पोल्लोतुन बोग़ाय केंजवेके, ओन ऊळिस मन्ह्टु, ओन्क लजा वानाह ओना संगे कलियमाट.
15 मति ओन कोटुलतोना लेह्का वने ऊळमाटु, मावोग़ विस्वसि इनजोर सीता कीसि, ओन बुद वेहाटु.
16 सुकम एवाल सामिनाहि मीक अमेसा सबे रीतिने सुकम दोर्कि. सामि मीट सबेटोरा तोळ मनदना इनजोर, पार्तना कीय्ह्नोम.
17 इचानाह नना वेहचोर वातन, ओर्वोग़ राससोर अतोग़. इंजेके नना पोलुनन, नावाय कयदे मीक जय येसु इनजोर, रासलाह आतन. नना इद्रमे सबे सीटिनगा, ननाय रास वेहतन इनजोर, मारिह कीय्ह्नन.
18 मावा येसुसामि किर्स्तुना देय्वा मियगा मनि.