1 ናንጊና ናንጋ ጎዳሢዮ!
2 ናንጊና ናንጋ ጎዳ ታኣኮ ላላሢ
3 ጋላታ ኮይሳ ናንጊና ናንጋ ጎዳ ታኣኒ ሺኢቃኔ፤
4 ሃይቢ ካራ ባይዚ ታና ሜታሴኔ፤
5 ዱኡፒ ሱሲ ታና ማሬኔ፤
6 ታኣኒ ሜታዼ ዎዶና ናንጊና ናንጋ ጎዳ ዔኤሌኔ፤
7 ሳዓ ዚምባሪ ጎጋይቄኔ፤
8 ዒዛኮ ሲኢዻፓ ዻጎ ጩባ ኬስኬኔ፤
9 ጫሪንጮ ዳርዚ ሊካ ዒ ኬዴኔ፤
10 ዒዚ ኪሩቤኤሎ ዑፃ ዴይ ባራኔኔ፤
11 ፔና ዒዚ ዹሞና ዓኣቼኔ፤
12 ዒዛኮ ዓኣ ፖዖፓ ዔቄያና ሻቺንታ ታሚ ፖዒንታ
13 ናንጊና ናንጋ ጎዳ ጫሪንጫፓ ጉጉንሤኔ፤
14 ዒዚ ሂኢዦ ፔኤሲና ዱኪ ሞርኮ ላኣሊሼኔ፤
15 ናንጊና ናንጋ ጎዳሢዮ!
16 ናንጊና ናንጋ ጎዳ ሎኦፓ ኩጮ ዳኪ ታና ዓርቄኔ፤
17 ታጊዳፓ ዎልቆና ባሼ ማዔ ታ ሞርኮፓ
18 ዔያታ ታኣኒ ሜታዼ ዎዶና ታኣኮ ሞርኬ ማዒ ዔቄኔ፤
19 ዒዚ ታና ዳልጊ ቤሲ ኬሴኔ፤
20 ናንጊና ናንጋ ጎዳ ታኣም ታ ፂሉሞጉዲ ጪጋንዳኔ፤
21 ናንጊና ናንጋ ጎዳኮ ጎይፆ ታ ሃንቴኔ፤
22 ዒዛኮ ዎጎ ቢያ ታኣኒ ማዺ ኩንሣኔ፤
23 ዒዚ ታና ዛጌ ጎይፆ ታኣኒ ፂሎኬ፤
24 ናንጊና ናንጋ ጎዳ ታኣኮ ፂሉሞጉዴያ
25 ናንጊና ናንጋ ጎዳሢዮ! ኔኤም ጉሙርቂንታዞም
26 ጌኤዦ ዓሶም ኔኤኒ ጌኤሺኬ፤
27 ዒኖ ሼሌዔ ዓሶ ኔኤኒ ዓውሳኔ፤
28 ናንጊና ናንጋ ጎዳሢዮ! ታኣኮ ኔኤኒ ፖዓሢኬ፤
29 ኔ ዎልቆና ዖሎ ዖላ ዓሶ ባሺ ታኣኒ ሄርቄኔ፤
30 ፆኦሲ ጎይፃ ሃይማ ፓጬኔ ጌይሳ ባኣዚ ባኣያ ፒዜኬ!
31 ናንጊና ናንጋ ጎዳፓ ዓታዛ ዖናዳይ ፆኦሲ?
32 ታኣም ዶዱሞ ዒንጋሢንታ
33 ዒዚ ቶኮ ታኣኮ ዎሾ ቶኪጉዲ ዶዲሻኔ፤
34 ኩጮ ታኣኮ ዒ ዖልዚ ዖሎንዶ ጎይሢ ዔርዛኔ፤
35 ኔኤኮ ባሺፆ ጊቲሞ ኔኤኒ ታኣም ዒንጌኔ፤
36 ታ ሃንታንዳ ጎይፆ ኔኤኒ ታኣም ዳልጊሼኔ፤
37 ሞርኮ ታኣኮ ታኣኒ ዳኪ ዓርቄኔ፤
38 ላሚ ጊንሣ ዔያታ ዔቁዋጉዲ ታኣኒ ዔያቶ ጋኣጬኔ፤
39 ዖላንዳጉዲ ዎልቄ ኔኤኒ ታኣም ዒንጌኔ፤
40 ታ ሞርካ ጊንሢም ባሺንቲ ጳሽካንዳጉዲ ኔ ማሄኔ፤
41 ዔያቶ ማኣዳ ዓሲ ኮይ ዔያታ ዒላቴኔ፤
42 ዢባሬ ፒፂ ዔኪ ዓኣዻ ሲላሊ ማዓንዳያ ሄላንዳኣና
43 ዋይዞ ዒፃ ዴሮይዳፓ ኔኤኒ ታና ዓውሴኔ፤
44 ፃንጎ ማዔ ዓሳ ታኣም ዚጋኔ፤
45 ዒጊቹሞና ካራ ዔያታ ባይዛኔ፤
46 ናንጊና ናንጋ ጎዳ ባይቁዋያኬ!
47 ዒዚ ታ ሞርኮ ኮሜ ኮፃኔ፤
48 ዒዚ ታኣኮ ሞርካፓ ታና ዓውሳኔ፤
49 ናንጊና ናንጋ ጎዳሢዮ! ዬያሮ ዴሮ ባኣካ
50 ዒዚ ካኣታሤ ካኣቲም ዼኤፒ ባሺሢ ዒንጋንዳኔ፤