1 Ascatan uhuun namapan ointsa ua oinmana cuscan afanan mato tapimai. Chashoan facu cuscara nan Jesús machi ahuun anu Sión ano nia un oian. Nanno 144,000 ahuun yorafo afu nia. Ahuun anu yafi Apa Diosin ahuun anuri aton fumananqui cunua.
2 Nantianri un nai murannoa oi uhuapacoin nica. Unuhuan ponoain nicatsa nicafain turuica achacoin nicatsa. Nan oi uhuapa un nica yora ichapa fanaincani manuti ichapari manuafo. Nan manuti ahuun anu arpa guitarra cuscara.
3 Fanainti funa tsoan nicayomisima Upa Diosin ahuun ointaifi fanainshoafo. Ascaifoanno nannori nan rafu non rafuri Diosin onihuani yafi Jesús icoinra huafoti cushumisifo veinte cuatrofoanri arifi nicafo. Nan 144,000 Jesús fu machi ano niafo. Ascan nanfoansi nan fanainti funa tapianfo. Jesús ato nashoni aton chaca soashoshquin Satanás afanan aton Ifo itamarocon nan aton ifocoin inon. Tsoa futsacai nan fanainti funapan atofu fanaintiroma.
4 Nan 144,000 yorafoan nocon Ifo Jesús nan chashoan facu cuscara tanacoinmisifo. Chaca shinantamarocon Jesushuunoa shinanfafaimisifo. Afin ato numani ato nashonishaquin Apa Diosin yorafo non ahuun yorafori inon. Ato catoan ahuun yorafo icaino ato yoia cuscan anonfo. Nanfoancaiyainfoqui chaca huamisima. Jesús caiquiri afu foanfafainmisifo.
5 —Nanfoan chani yoiaran, —ishoncai tsoan atohuunoa yoitiroma. Jesushuunoashu isharamisifo.
6 Ascatan un oian Diospan oinmati futsan afu nai muran ica fasi cuyacoin noyaino nantifi yorafo maifoti anoafo tsain shara ato yoinon. Caifoti yoifain shoco futsafoti yoifain nantifi tsain futsa futsatapafo yoimisifoti yoifain manifotiri ato tsain shara yoinon. Upa Diospan tsain nipanacahuunoa ato yoia.
7 Oi ashcafinin ato yoia isca huaquin, —Diosquiri shinancahuun. Mato yonoa cuscan man ayamashu aqui ratucoincahuun. Nicacoinsharacahuun. “Min sharacoin min ahuamamishti min atiroran,” huacahuun. Natian Diosin nantifi chacamisifo onaintimai. Nanton nai onihuafain mai onihuafain unuhuan saoya onihuafain unu tsosi sharari onihuani. Ascan a noicahuun. A yoihuu isca huaquin, “Min sharacoin min ahuamamishti atiro. Min nocon Ifon Dios shararan,” huacahuun, —ato huaa.
8 Ascatan Diospan oinmati futsan afu nai muran ica ahuun tsain anaitishon futsan nocotoshishon isca huaquin yoia, —Nan pushurasi uhuapa ahuun anu Babilonia. Yorahuanrasi nan pushurasi uhuapa ano ica. Nan yorafoan fasi chaca huamisi. Nanfoan chaca huamisi cuscan manifotiri chaca huama. Asca huaifoan Upa Diosin ato onaintimai afanan ipanonfoma. ¡Aichofain! Diosin ato onaintima afanan pushurasi Babilonia yamairan, —ishon Diosin oinmatinin nai muran icaton yoia.
12 Ascancunfin uhuun yoramishti maton ointi fupuima sharacahuun. Omitsiscafiaquin tunucahuun. Diosin noco yononi cuscan acahuun. Nocon Ifo Jesús cachiquiri huayamacahuun.
13 Ascatan un nica oi nai muranshon ua yoiaiton, —Un mia yoiai cuscan cunuhuu. Ratoranfo nocon Ifo Jesushuunoashu nai unimacoinshcaniran, —ishon ua yoia. —Ainfain. Iconfinquin. Naacanashu afanan omitsiscatirofoma. Upa Diosin ato ama cuscan acoinnafo. Nantianri unimacoinshcani. Nanfoan futsafo shara huashomisi cuscan Diosin nanfo ointiaquimamisima. Ascan Upaqui nocoaifoan ato inansharashquinran, —ishon Diospan Yoshin Sharanun yoia.
14 Ascatan uhuun namapan ointsa oian cuscan afanan mato yoinon. Un oian nai coin oshopa camaqui nan Diosin catoan Jesús ointsa un oian. Niaifon maiti orocoin maifain nopu ushtia cunocoin tsoma.
15 Ascan ahuun oinmati futsan afu nai muran ica Dios icanoashu caa nocon Ifo yoishquin. —Natian man ica. Nan maifoti ano man fanafo oshian. Natian chituaintian. Ascan min nopu ushtia tsomatan tashtushon ichahuahuu, —huaa. Nannori yoifiaquin fanacoinhuunoa yoiama. Diospan yorafohuunoa yoicoian isca huaquin, —Natian nantifi Jesús icoinra huafo ihuihuu Upa Dios icano ichananshu afu ipanacaforan, —ishon yoicoian.
16 Asca huatan nan nai coin camaqui tsaoshon ahuun nopu curushcai fucoa. Diosin mai anoafo tashtua cuscan huaquin aton icha huashquin. Nopucoinhuunoacai yoiama ahuun tsainhuunoa yoia. Afin yoiaitian ahuun yorafo ichanan huai.
17 Ascatan un oian Diosin oinmati futsari afu nai muran icanoa caa. Arifi nopu ushtia cunocoin tsoma.
18 Ascatan afanan Diosin oinmati futsari Dios cufiti anoashu caa. Nanton Diosin yonoa cuscan chihuunshon yorafo onaintimatiro. A oinmati nopu ushtia cunocoin tsomashon oi ashcafinin yoia, —Nan fimi ahuun anu uva nantifi oshiancoin. Ascan mushtushon icha huahuu, —ishon yoia. Nanscarifiai Upa Diosin ahuun oinmatihuunshon a nicacasmamisifo ichanan huashquin.
19 Asca huatan nan oinmati ahuun nopu ushtia cunocoin tsomashon uvatifin shatushon prensa muran pota ahuun unu fonon. Nanscarifiai Diospan oinmatifo afu nai muran icaton Diosin tsain nicacasmamisifo ichanan huai. Ascan Diosin atoqui sinacoin ato onaintimai.
20 Diosin icanoshon ato onaintimanama. Futsafoan ato rutushcani aton imi ichapa foshquin. Ascaran tsoan oinyomisima. Aton imi noacoin caballo fasi tusanancoian. Ahuun chai trescientos kilometro.