1 उन्छेःन् निङ्वाॽफुमाङ्ङिन् माङ्निङ्वाॽपाःन् के़बाःप्पाहाॽलाम्बा आनिॽ सुधे़बा ताक्थे़बाहाॽनु यरिक्ले़ङ् परिक् परिक्लाम्बा पारे़रो॥
2 कर आल्ल कन् कुनुप्मा ये़न्हाॽओग खुने़ॽ आबाङे आबुगे़न् कुस्साःलाम्बा आनिॽनु पारे़आङ् वाॽरो॥ आबुगे़न् कुस्साःङ्ग खुने़ॽ काक् पाःन्नो लक् के़घोःबा चोगुआङ् खुने़ॽलाम्बाए काक् नावागे़न् चइःत्तिन्नाङ् ने़स्सुरो॥
3 कन् आबुगे़न् कुस्साःल्लो निङ्वाॽफुमाङ्ङिल्ले़ कुमिमिदिङ्ङिन् ले़क्लो हे़क्क्याङ् आबुगे़न् कुस्साःन् निङ्वाॽफुमाङ्ङिल्ले़ कुसुत्नाःल्ले़ कुइत्छाप्लो॥ हे़क्क्याङ् खुने़ॽए मुक्साम्गे़न् कुबाःन्जाक्लाम्बा इक्सादिङ् खाम्बेःक्मोबा काक् पाःन्हाॽ वाॽर याःन्दुॽरो॥ खुने़ॽ मे़न्छाम् याप्मिहाॽ लायोलाम् सेसेसाङ्साङ् पोःङ्मा तङ्गाम् चोगुआङ् साङ्ग्राम्पेदाङ्ङो मिमिदिङ्गे़न् निङ्वाॽफुमाङ्ङिल्ले़ कुजुप्साङ् ले़प्माङ् युङ्सिङ्लो॥
4 निङ्वाॽफुमाङ्ङिल्ले़ आबुगे़न् कुस्साःन् माङ्लाइङ्बाहाॽनुःल्ले़आङ् पयम् यम्बा चोगुआङ् वाॽ॥ हे़क्केलॽरिक्के निङ्वाॽफुमाङ्ङिल्ले़ खे़ङ्हाॽरे़ खुनिॽ मिङ्ङिन्नुःल्ले़आङ् यम्बा मिङ् खुने़ॽ पिरुआङ् वाॽरो॥
5 थेआङ्भे़ल्ले़ निङ्वाॽफुमाङ्ङिल्ले़ आप्फाल्ले़आङ् माङ्लाइङ्बाहाॽ अक्खेलॽरिक् मे़मे़त्तुन्छिन्,
6 हे़क्क्याङ् निङ्वाॽफुसाःन् इक्सादिङ् खाम्बेःक्मो तारुल्ले़ खुने़ॽ अक्खे पाःत्तुॽ,
7 हे़क्क्याङ् निङ्वाॽफुमाङ्ङिल्ले़ माङ्लाइङ्बाहाॽरे़ खुनिॽ याःम्बेओ अक्खे पाःत्तुॽ,
8 कर खुने़ॽ आबुगे़न् कुस्साःल्ले़ कुयाःम्बेओ अक्खे पाःत्तु, “निङ्वाॽफुमाङ्ङे, खे़ने़ॽ के़हाङ्जुम्मिङ्ग सदादिङ् वाॽरो॥ हे़क्क्याङ् खे़ने़ॽ के़हाङ्तक्काःत्तिल्ले़ग के़मनाहाॽओ साम्योनिमान्नु हाङ् के़जोगुॽरो॥
9 खे़ने़ॽ साम्योनिमान् मिःम्जि के़मे़त्तु हे़क्क्याङ् ताप्फे़ःम्बान् के़जिःत्तुआङ् वाॽ॥ खे़ल्ले़ चोगुल्ले़ खे़ने़ॽ के़निङ्वाॽफुमाङ्ङिल्ले़ग सःत्ते़आङ् निःङ्गेःल्ले़ माङ्थुक्मा के़बिरे़आङ् के़न्जुम्हाॽनुःल्ले़आङ् थाःङ् के़युक्खे़रो॥”
10 खुने़ॽ याम्मो पाःत्तुॽ,
11 खे़ङ्हाॽ मे़मे़क् मे़बेःक् कर खे़ने़ॽ सदादिङ् के़वाॽरो॥ खे़ङ्हाॽग चाङ्देःत् कुइसिःक् मे़यःत् मे़दे़ःङ् मे़बेःक्लो॥
12 खे़ने़ॽ लगेःत्तिन्कुइसिःक् खे़ङ्हाॽ के़भाक्तुसिरो हे़क्क्याङ् कुद्रे़ःक् चाङ्देःत् कुइसिःक्के खे़ङ्हाॽ लाप्के़भुसुसिरो॥ कर खे़ने़ॽग आप्फाल्ले़आङ् के़न्ले़क्सिङ्ङिन् हे़क्क्याङ् खे़ने़ॽ सदादिङ् कुहिङ्वे़त् के़वाॽरो॥”
13 निङ्वाॽफुमाङ्ङिल्ले़ आबुगे़न् कुस्साःन् कुइसिःक् आत्तिन् माङ्लाइङ्बाहाॽआङ् अक्खेलॽरिक् मे़मे़त्तुन्छिन्लो,
14 कर माङ्लाइङ्बाहाॽग निङ्वाॽफुमाङ्ङिल्ले़ से़न्लप् पिरुसिबाहाॽरे़ खुनिॽ लागि माङ्सेवा के़जोःक्पा साम्सिरक्लो॥