1 ᤀᤠᤏᤡᤃᤧ ᤐᤠ᤺ᤳᤋᤢᤶᤒᤧᤒᤠ ᤐᤠ᤺ᤴᤏᤡᤴ ᤒᤠ ᤁᤴᤗᤥ–ᤀᤠᤏᤡ᤹ᤏᤢ ᤀᤰᤋᤱᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ᤃ ᤛᤠᤱᤃᤪᤠᤶᤐᤣᤍᤠᤱᤅᤥ ᤔᤡᤔᤡᤍᤡᤱᤃᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠ᤺ᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤗᤥ॥
2 ᤂᤢᤏᤧ᤹ᤃ ᤛᤣᤛᤣᤍᤧᤴᤏᤥ ᤔᤠᤱᤛᤣᤘᤠ ᤆᤥᤃᤢ᤹ᤖᤥ. ᤂᤧᤴ ᤛᤣᤛᤣᤍᤧᤴᤏᤡᤱᤃ ᤔᤧᤴᤇᤠᤶ ᤕᤠᤵᤔᤡᤖᤧ ᤔᤧᤈᤥᤃᤢᤒᤠ ᤔᤧ᤺ᤴ. ᤁᤖ ᤕᤜᤘᤣ ᤍᤠᤱᤒᤠᤸᤗᤧ ᤀᤠᤒᤠᤅᤣ ᤆᤥᤃᤢᤒᤠ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤗᤥ॥
3 ᤁᤧᤖᤧᤰ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤃ ᤆᤥᤓᤠ᤹ ᤏᤢ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤑᤠ᤹ᤀᤠᤱ ᤛᤣ᤺ᤰᤕᤢᤰ ᤔᤧᤒᤥ᤺ᤰᤂᤧᤒᤠᤖᤥ. ᤜᤧᤰᤁᤣ᤺ᤸᤗᤧ ᤁᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤀᤠᤱ ᤋᤥ᤺ᤶᤔᤠ ᤑᤠ᤹ᤀᤠᤱ ᤌᤣᤀᤡᤃ ᤁᤵᤔᤠᤀᤣ ᤐᤥ᤺ᤱᤗᤥ॥
4 ᤂᤢᤏᤧ᤹ ᤂᤠᤶᤒᤣ᤺ᤰᤔᤥᤀᤣ ᤘᤕᤧᤸᤗᤧᤃ ᤏᤡᤱᤘᤠ᤹ᤑᤢᤛᤠᤶᤒᤠ ᤔᤧᤒᤥ᤺ᤰᤂᤧᤴᤒᤠᤖᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤆᤥᤓᤠ᤹ ᤁᤧᤍᤥ᤺ᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤃ ᤋᤃᤡᤏᤢᤛᤠ ᤔᤧᤘᤠ᤹ᤖᤥ॥
5 ᤂᤧᤱᤜᤠ᤹ᤖᤧ ᤔᤠᤱᤛᤣᤘᤠ ᤔᤧᤈᤥᤃᤢᤒᤠ ᤛᤣᤛᤣᤍᤧᤴᤏᤡᤱᤃ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤛᤧᤰᤂᤠᤛ᤻ᤔᤠ ᤛᤣᤛᤣᤍᤧᤴᤏᤡᤸᤗᤧ ᤁᤢᤒᤡᤀᤡᤳᤇᤠᤵᤗᤰᤗᤥ॥ ᤌᤣᤀᤠᤱᤓᤧᤸᤗᤧ ᤔᤥᤛᤠ᤺ᤸᤗᤧ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶ ᤆᤥ᤺ᤰᤔᤠ ᤀᤡ᤺ᤳᤋᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣᤗ᤹ᤖᤡᤰ ᤛᤠᤶᤍᤡᤱ ᤐᤡᤖᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤡᤴ ᤁᤧᤈᤥᤃᤢᤸᤗᤧ ᤁᤥ᤺ᤰᤔᤠ ᤛᤶᤍᤠᤱ ᤁᤧᤏᤡ᤺ᤛᤢᤒᤠ ᤜᤧᤰᤁᤣ ᤕᤥᤎᤥ ᤔᤧᤶᤒᤥ᤺ᤱᤅᤣ ᤆᤥᤃᤧ᤹ᤀᤥ॥”
6 ᤁᤖ ᤕᤧᤛᤢᤖᤧ ᤂᤥ᤺ᤛᤢᤒᤠ ᤔᤠᤱᤛᤣᤘᤠ᤺ᤱᤃ ᤂᤧᤱᤜᤠ᤹ᤖᤧᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤆᤥ᤺ᤰᤗᤥ. ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱ ᤏᤢ ᤔᤧᤴᤇᤠᤶ ᤕᤠᤵᤔᤡᤗᤢᤶᤔᤥ ᤂᤢᤏᤧ᤹ ᤐᤠ᤺ᤴᤍᤱ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤋᤃᤡᤛ᤻ᤔᤠᤴᤏᤢ᤺ᤸᤗᤧᤀᤠᤱ ᤏᤢ᤺ᤒᤠ ᤆᤥ᤺ᤰ. ᤌᤣᤀᤠᤱᤓᤧᤸᤗᤧ ᤁᤴ ᤁᤢᤛᤱ ᤔᤠᤱᤜᤢᤵᤐᤡᤱᤃ ᤏᤢ᤺ᤒ᤻ ᤏᤢ᤺ᤒᤠ ᤔᤠᤱᤜᤧᤰᤜᤠ᤹ᤀᤥᤏᤧ ᤆᤥᤃᤧᤀᤠᤱ ᤘᤠ᤹ᤖᤥ॥
7 ᤌᤣᤀᤠᤱᤓᤧᤸᤗᤧ ᤋᤃᤡᤛ᤻ᤔᤠ ᤔᤠᤱᤜᤢᤵᤐᤡᤴ ᤑᤥᤋᤩᤠ ᤔᤧ᤺ᤴᤏᤣᤒᤠ ᤘᤕᤧᤸᤗᤧᤃ ᤘᤣ᤹ᤛ᤻ᤔᤠ ᤔᤠᤱᤜᤢᤵᤐᤡᤴ ᤆᤠᤜᤠᤒᤠ ᤔᤧᤈᤥᤃᤧᤴᤒᤠᤖᤥ॥
8 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ᤀᤥ ᤑᤥᤋᤩᤠ ᤂᤥ᤺ᤛᤢᤀᤠᤱ ᤐᤠ᤺ᤳᤋᤢ.
9 ᤁᤴ ᤁᤢᤛᤱ ᤔᤠᤱᤜᤢᤵᤐᤡᤱᤃ ᤔᤡᤛᤪᤗᤠᤶ ᤀᤠᤜᤢᤰᤁᤡᤸᤗᤧ ᤋᤧᤶᤛᤢᤱᤛᤡᤱᤅᤠᤱ ᤗᤠᤶᤗᤥᤛᤢᤱ ᤗ᤺ᤳᤋᤢᤱᤛᤡᤱᤒᤠ ᤂᤢᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤁᤢᤀᤡᤛᤡ᤺ᤰ ᤔᤧᤒᤥ᤺ᤱᤏᤧᤸᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤀᤡᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤥ ᤏᤛᤠ᤺ᤴᤛᤠᤒᤠ ᤔᤧᤶᤒᤥ᤺ᤰᤂᤧᤴ ᤜᤧᤰᤁᤩᤠᤱ ᤁᤶᤒᤪᤠᤱ ᤔᤧᤵᤔᤠ ᤗᤧᤖᤢᤱᤛᤡᤱᤗᤥ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹ᤖᤥ॥
10 ᤂᤧᤴ ᤕᤧᤶ ᤀᤣᤃᤠᤱ ᤀᤡᤛᤪᤠᤀᤡᤗᤡ ᤔᤏᤠᤜᤠ᤹ᤏᤢ ᤁᤴ ᤛᤣᤛᤣᤔᤠᤱᤜᤢᤵᤐᤡᤴ ᤆᤥᤃᤢᤱ. ᤂᤢᤏᤡ᤹ ᤏᤡᤱᤘᤠ᤹ᤒᤥ ᤀᤠᤎᤡᤶᤜᤠ᤹ ᤁᤣ᤺ᤳᤋᤢᤱ ᤐᤡᤖᤢᤱᤛᤡᤱᤅᤠᤱ ᤂᤢᤏᤡ᤹ ᤛᤡᤰᤗᤢᤱᤔᤥ ᤛᤠᤵᤋᤢᤱ ᤐᤡᤖᤢᤱᤛᤡᤱ. ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥ᤺ᤱᤅᤠᤀᤠᤱ ᤂᤧᤱᤜᤠ᤹ ᤀᤠᤔᤏᤠ ᤔᤧᤒᤥ᤺ᤱᤗᤥ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹ᤖᤥ॥
11 ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤁᤢᤗᤠᤈᤣ᤹ᤒᤠ ᤔᤏᤠ᤺ᤴ ᤜᤢ᤹ᤔᤠ ᤆᤠᤜᤠᤒᤠ ᤔᤧᤈᤥ᤺ᤰᤏᤧᤴᤗᤥ ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤁᤢᤶᤓᤢ᤹ ᤁᤢᤴᤛᤠ᤹ᤛᤡ ᤍᤠᤱᤒᤠᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ ᤗ᤹ᤖᤡᤰ ᤔᤧᤵᤔᤠᤛᤡ ᤔᤧᤒᤥ᤺ᤱᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤕᤶᤒᤠ ᤆᤢᤰᤐᤠ ᤁᤧᤖᤧᤰᤗᤧ ᤀᤡᤱᤃᤠ᤹ ᤁᤢᤛᤡᤱ ᤔᤧᤏᤡ᤺ᤳᤋᤠᤖᤥ॥
12 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤴ ᤗᤧᤵᤔᤡ ᤐᤡᤖᤢᤱᤛᤡᤱ ᤜᤧᤰᤁᤩᤠᤱ ᤂᤢᤏᤡ᤹ ᤗᤠᤕᤥ᤺ᤴ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤱᤅᤡᤴᤗᤥ॥”
13 ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤁᤢᤛᤱ ᤔᤠᤱᤜᤢᤵ ᤐᤠ᤺ᤳᤋᤢᤸᤗᤧ ᤋᤃᤡᤛ᤻ᤔᤠᤴ ᤕᤢᤰ ᤔᤧ᤺ᤴᤏᤣᤒᤠ ᤆᤥᤃᤢᤒᤠ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤕᤢᤰ ᤔᤧ᤺ᤴᤏᤣᤒᤠ ᤏᤢ ᤀᤥᤃᤵ ᤔᤧᤶᤒᤥ᤺ᤱᤔᤏᤠ ᤀᤠᤳᤋᤡᤴ ᤐᤠ᤺ᤴᤏᤡᤴᤇᤠᤱ ᤜᤠᤖᤠᤀᤣ ᤔᤠᤒᤣ᤺ᤰᤗᤥ॥