1 ꤊꤣ꤮ ꤠꤢ꤭ꤖꤢꤨꤋꤢꤨ꤭, ꤔꤟꤤꤘꤢ꤭ ꤠꤢ꤭ꤍꤟꤥ ꤛꤢꤩ꤭ ꤒꤢ꤬ꤟꤢꤩ꤬꤯
2 ꤔꤟꤤꤘꤢ꤭ꤡꤟꤢꤨ꤭ꤢꤩ꤬ ꤊꤟꤌꤣ꤭ ꤠꤢ꤭ꤒꤟꤢꤧ꤬ꤗꤢꤩ꤬ꤊꤛꤢ꤭ꤍꤟꤥ ꤚꤢꤪ ꤔꤟꤢꤧ꤬ ꤊꤟꤢꤦ ꤥ꤬ꤓꤝꤟꤥ꤭ꤕꤚꤟꤢꤧ꤬ ꤔꤢ꤬ꤘꤢꤨ꤬ꤜꤢꤧ꤭ꤓꤢꤨ꤭ꤘꤢꤦ꤬ ꤕꤢ꤭꤯
3 ꤡꤢꤪ꤭ꤊꤜꤟꤢꤪ꤬ꤗꤢ꤬ꤥ꤬ꤜꤟꤢꤪ꤭ ꤜꤢꤨ꤭ ꤘꤣ ꤔꤟꤢꤧ꤬ꤊꤢ꤬ꤔꤢꤪ꤭ꤜꤟꤥ꤬꤯
4 ꤗꤟꤥ꤬ꤔꤟꤤ ꤒꤟꤢꤧ꤬ꤞꤤꤖꤢꤧ ꤖꤢꤨ ꤔꤟꤢꤧ꤬ꤕꤟꤌꤣꤕꤚꤟꤢꤧ꤬ꤗꤢꤪ꤬ ꤒꤣ꤬ꤕꤚꤟꤢꤧ꤬ ꤔꤌꤣ꤬꤯
5 ꤢ꤬ ꤊꤟꤢꤦ ꤗꤟꤢꤩ꤬ꤏꤤ꤬ꤕꤜꤢꤧ ꤘꤢꤦ꤬ ꤔꤟꤢꤧ꤬ ꤘꤣ ꤒꤟꤢꤧ꤬ꤡꤛꤣꤞꤢꤦ ꤢꤨ꤭ꤗꤢꤩ꤭ ꤔꤢ ꤕꤚꤟꤢꤧ꤬ꤗꤢꤪ꤬ ꤘꤣ ꤢ꤬ ꤟꤢꤩꤙꤢꤧ꤬ꤤ꤬ꤜꤥ꤬ꤤ꤬ꤜꤛꤢ ꤡꤟꤛꤢ ꤢꤨ꤭ ꤔꤌꤣ꤬ ꤕꤢ꤭꤯
6 ꤠꤢ꤭ ꤊꤢ꤬ꤓꤢꤪ꤬ꤥ꤬ ꤘꤣ ꤊꤢ꤬ꤘꤢ꤭ꤖꤢꤨꤋꤢ꤭ꤏꤛꤢꤩ ꤚꤢꤪ ꤠꤢ꤭ ꤗꤛꤢꤓꤢꤩ꤬ ꤘꤣ ꤠꤢ꤭ꤟꤤ꤬ꤊꤜꤢꤪ꤭꤯
7 ꤘꤣ ꤕꤚꤟꤢꤧ꤬ꤔꤢ꤬ꤡꤟꤢꤧꤖꤢꤨ ꤊꤢ꤬ꤛꤢ꤭ꤢꤟꤌꤣꤢꤛꤢ ꤒꤣ꤬ꤗꤟꤢꤨ꤬ ꤢ꤬ꤊꤜꤢꤧ꤭ꤔꤌꤣ꤬, ꤠꤢ꤭ ꤗꤛꤢꤓꤛꤢꤩ꤬ ꤕꤚꤟꤢꤧ꤬ꤔꤢ꤬ꤡꤟꤢꤧꤖꤢꤨ ꤘꤣ ꤢ꤬ꤋꤢꤨ꤬ꤊꤜꤢꤪꤔꤟꤢꤪ꤭ ꤥ꤬ ꤊꤟꤌꤣ꤭ ꤢꤨ꤭ ꤒꤥ꤬ ꤒꤣ꤬ꤕꤚꤟꤢꤧ꤬꤯
8 ꤢ꤬ ꤡꤛꤣꤖꤢꤦ꤬ ꤘꤣ ꤕꤚꤟꤢꤧ꤬ꤗꤢꤪ꤬ꤚꤛꤢꤒꤥ꤬ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤢ꤬ꤟꤤ꤬ꤋꤢ꤭ꤏꤛꤢꤩ꤯
9 ꤗꤟꤢꤪꤒꤟꤢ꤭ ꤟꤢꤪ ꤚꤢꤪ ꤢ꤬ꤋꤤꤕꤢ꤬ꤜꤟꤥ ꤟꤢꤪ꤯
10 ꤚꤢꤪ ꤕꤚꤟꤢꤧ꤬ꤗꤢꤪ꤬ ꤒꤣ꤬ꤕꤚꤟꤢꤧ꤬ ꤓꤢꤩ꤬ꤗꤛꤢꤓꤛꤢꤩ꤬ꤏꤢꤦ꤬ ꤜꤢꤨ꤭꤯
11 ꤢ꤬ ꤟꤢꤩꤙꤢꤧ꤬ꤏꤛꤥ꤬ꤟꤢꤩꤙꤢꤧ꤬ꤏꤢꤪ꤭, ꤢ꤬ꤋꤢꤨ꤬ꤊꤜꤢꤪꤕꤚꤛꤢꤩ꤭꤯
12 ꤋꤥ꤭ꤑꤟꤢꤚꤢꤪ ꤢ꤬ꤥ꤬ ꤘꤣ ꤊꤜꤛꤢꤘꤢ꤭, ꤏꤛꤢꤩꤕꤢ꤭ꤚꤢꤪ ꤢ꤬ꤥ꤬ ꤘꤣ ꤊꤜꤢꤧꤊꤢꤨ꤭꤯
13 ꤢ꤬ ꤖꤛꤢꤙꤢꤦ ꤕꤚꤟꤢꤧ꤬ꤋꤢꤨ꤭ ꤘꤣ ꤢ꤬ꤋꤢꤨ꤬ꤊꤜꤢꤪꤔꤟꤢꤪ꤭ ꤥ꤬ ꤊꤟꤌꤣ꤭ꤢꤨ꤭ ꤒꤥ꤬ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤚꤢꤪ ꤢ꤬ ꤔꤟꤌꤣ꤬ꤗꤢꤦ ꤜꤢꤨ꤭꤯
14 ꤚꤢꤪ ꤢ꤬ ꤟꤢꤩ ꤜꤢꤨ꤭ ꤔꤢ, “ꤛꤢꤩ꤭ꤒꤣ꤬ꤑꤢꤩ꤭ ꤠꤢ꤭ ꤗꤟꤢꤩ꤬ꤞꤛꤢꤩ꤭ ꤜꤢꤨ꤭ꤒꤛꤢ꤭ꤓꤛꤢ꤬ ꤒꤟꤢꤧ꤬ꤖꤢꤨꤒꤟꤢꤧ꤬ꤜꤟꤛꤢꤩ꤬ ꤖꤢꤨ ꤒꤟꤢꤧ꤬ꤙꤢꤪꤞꤛꤥꤋꤢꤧꤋꤥ꤭ ꤒꤟꤢꤧ꤬ꤜꤢꤨ꤭ꤒꤛꤢ꤭ꤓꤛꤢ꤬ ꤔꤌꤣ꤬, ꤚꤢꤪ ꤢ꤬ꤐꤛꤢꤩ꤬ ꤥ꤬ ꤘꤣ ꤠꤢ꤭ꤟꤤ꤬ꤊꤢꤨ꤭ ꤛꤢꤩ꤭꤯
15 ꤖꤢꤨꤔꤌꤣ꤬ꤋꤢꤨ꤬ꤋꤛꤢꤩ꤭, ꤠꤢ꤭ ꤓꤢꤩ꤬ꤗꤛꤢꤓꤛꤢꤩ꤬ꤏꤢꤦ꤬ ꤔꤟꤢꤧ꤬꤯
16 ꤠꤢ꤭ ꤤ꤬ꤘꤢꤧ꤭ ꤟꤢꤪ ꤠꤢ꤭ꤜꤟꤢꤩꤗꤛꤢꤩ꤭ꤘꤢꤧ꤭ ꤍꤟꤢꤨ꤬ꤘꤢꤨ꤬ꤒꤝꤟꤥ ꤥ꤬ ꤘꤣ ꤤ꤬ꤡꤛꤤꤊꤟꤢꤩ ꤟꤛꤢ꤭ ꤔꤌꤣ꤬ꤒꤢ꤬ꤟꤢꤩ꤬ ꤟꤢꤪ꤯
17 ꤠꤢ꤭ ꤒꤢ꤬ꤏꤤ ꤔꤟꤌꤣ꤬ꤗꤢꤦ ꤔꤟꤤ ꤠꤢ꤭ꤜꤟꤢꤩꤗꤛꤢꤩ꤭ ꤔꤢ ꤗꤢꤨꤚꤢ꤬, ꤢ꤬ꤜꤢꤨꤎꤢ꤬ ꤔꤢ ꤞꤢꤪ꤬ꤞꤤꤔꤢ꤬ꤗꤥ꤬ ꤘꤣ ꤢ꤬ꤔꤟꤌꤣ꤬ꤗꤢꤦ ꤒꤢ꤬ꤟꤢꤩ꤬꤯
18 ꤟꤛꤢ꤭ꤗꤢꤪ꤭, ꤕꤟꤢꤧ꤬ ꤥ꤬ꤗꤛꤢꤩ꤭ꤔꤌꤣ꤬ꤗꤢꤦꤖꤛꤢꤙꤢꤦ ꤔꤟꤤ ꤜꤢꤨ꤭ ꤒꤣ꤬ꤞꤢꤧ꤭꤮ ꤒꤣ꤬ꤞꤢꤧ꤭,
19 ꤗꤟꤢꤩ꤬ꤒꤢꤩ꤭ꤟꤢꤩꤚꤢꤪ ꤠꤢ꤭ꤠꤟꤢꤧ꤬ ꤥ꤬ ꤘꤣ ꤟꤤ꤬ ꤒꤥ꤬꤯
20 ꤢ꤬ ꤏꤢꤨ꤬ꤔꤟꤌꤣ꤭ꤙꤢ꤭ ꤡꤛꤣꤔꤟꤤ ꤚꤢꤦ꤭ ꤔꤢ ꤚꤢꤦ꤭ꤊꤢꤪ꤭꤯
21 ꤢ꤬ ꤟꤢꤩꤙꤢꤧ꤬ꤤ꤬ꤜꤥ꤬ ꤡꤛꤣꤞꤢꤦꤊꤛꤢ꤭ ꤕꤚꤟꤢꤧ꤬ꤋꤢꤨ꤭ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤢ꤬ꤊꤜꤛꤢ꤯
22 ꤒꤣ꤬ꤖꤟꤌꤣꤒꤌꤣ꤭ ꤕꤚꤟꤢꤧ꤬ꤋꤢꤨ꤭ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤊꤚꤝꤥ꤭ꤊꤟꤌꤣ꤭ ꤜꤢꤨ꤭ ꤋꤛꤢꤩ꤭꤯
23 ꤚꤢꤪ ꤕꤚꤟꤢꤧ꤬ꤜꤟꤢꤦ꤬ꤒꤟꤢꤧ꤬ꤗꤟꤤ꤬ ꤋꤢꤧꤙꤢꤧ꤬ꤊꤛꤢ꤭ ꤜꤢꤨ꤭ꤞꤢꤧꤕꤜꤢꤪ꤬ ꤔꤢ ꤕꤜꤟꤢꤧ꤯
24 ꤠꤢ꤭ꤖꤢꤨ, ꤗꤟꤢꤩ꤬ꤖꤢꤨꤔꤌꤣ꤬ꤚꤢꤪ ꤋꤥ꤭ꤑꤟꤢ ꤔꤟꤤꤘꤢ꤭ ꤒꤟꤢ꤭ꤒꤟꤢꤩ꤬ ꤊꤟꤌꤣ꤭ ꤠꤢ꤭ꤍꤟꤥ꤯
25 ꤘꤛꤢ꤬ꤥ꤬ ꤒꤢꤧ꤭ ꤕꤚꤟꤢꤧ꤬ꤗꤢꤪ꤬ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤢ꤬ꤚꤤ꤬ꤢ꤬ꤊꤛꤢ꤭ ꤘꤣ ꤔꤟꤢꤧ꤬ꤞꤢꤧꤕꤜꤢꤪ꤬ꤊꤢꤨ꤭ ꤗꤟꤢꤩ꤯
26 ꤗꤟꤢꤩ꤬ꤒꤢꤩ꤭ꤟꤢꤩꤚꤢꤪ ꤢ꤬ ꤗꤟꤢꤩ꤬ꤞꤛꤢꤩ꤭ꤊꤛꤢ꤭ ꤢꤧ ꤔꤛꤢ꤬ꤡꤢꤪ ꤕꤚꤟꤢꤧ꤬ꤋꤢꤨ꤭꤯
27 ꤔꤟꤢꤧ꤬ ꤡꤛꤣ ꤘꤣ ꤢꤧ꤬ꤟꤤ꤬ ꤔꤌꤣ꤬ꤗꤢ꤬, ꤔꤟꤢꤧ꤬ ꤡꤛꤣꤕꤚꤢꤧ ꤟꤢꤪ ꤘꤣ ꤜꤟꤌꤣ꤭ꤊꤟꤢꤩꤔꤢꤩꤘꤢꤪ꤭꤯