1 ꤢꤩ꤬ ꤚꤟꤥꤜꤢꤨ꤭ ꤘꤤ꤭ ꤒꤣ꤬ꤗꤢꤦ꤭ ꤔꤢ ꤒꤟꤢꤧ꤬ꤊꤚꤟꤢꤦ꤭ꤒꤟꤢꤧ꤬ꤊꤜꤢꤧ꤭ ꤔꤌꤣ꤬ꤗꤢ꤬,
2 ꤡꤟꤢꤦ ꤘꤣ ꤢ꤬ꤒꤟꤢ꤭ꤒꤟꤢꤩ꤬ ꤔꤌꤣ꤬, ꤢ꤬ ꤊꤟꤢꤦ ꤕꤣꤔꤟꤤ ꤖꤢꤨꤋꤢꤨ꤭ ꤘꤣ ꤢ꤬ ꤗꤟꤢꤩ꤬ꤒꤢ꤬ꤚꤟꤢꤧ꤭ ꤗꤟꤌꤣꤖꤢꤧ꤭꤯
3 ꤚꤢꤦ꤭ ꤔꤢ ꤓꤢꤧ꤭ ꤗꤢ꤬, ꤢꤨ꤭ ꤙꤢꤦ꤭ꤗꤛꤢ ꤜꤢꤨ꤭ ꤔꤢ ꤗꤤ꤬꤯
4 ꤊꤢ꤬ꤛꤢ꤭ꤡꤟꤛꤢꤩ꤭ꤚꤤ꤬ꤡꤟꤛꤢ ꤔꤟꤤꤘꤢ꤭ ꤍꤟꤥꤜꤢ꤬ꤟꤥ꤭꤯
5 ꤊꤢ꤬ꤛꤢ꤭ ꤘꤣ ꤢ꤬ ꤟꤢꤩꤡꤟꤛꤢꤩ꤭ ꤕꤚꤟꤢꤧ꤬ꤏꤥ꤭ꤚꤟꤛꤢ꤬ꤖꤢꤨ ꤔꤌꤣ꤬ꤗꤢ꤬, ꤢ꤬ ꤕꤢ꤬ꤡꤟꤛꤢꤩ ꤟꤢꤪ ꤕꤚꤟꤢꤧ꤬ꤙꤛꤢꤜꤟꤛꤢ꤬ ꤜꤢꤨ꤭꤯
6 ꤜꤟꤛꤢꤩ꤬ ꤗꤢ꤬ ꤖꤛꤢꤩ꤭ꤖꤟꤌꤣ꤭ ꤢ꤬ꤋꤢꤨ꤬ꤊꤜꤝꤟꤥ꤭ꤓꤢꤧ꤭꤯
7 ꤊꤢ꤬ꤛꤢ꤭ꤙꤢꤪ꤭ꤙꤛꤢꤩ꤬ ꤙꤢꤩ꤬ꤘꤢꤨ꤬ꤔꤟꤤ ꤢ꤬ꤔꤟꤢꤩ ꤟꤢꤩꤙꤢꤧ꤬ ꤍꤟꤥꤒꤝꤟꤥꤍꤟꤥꤚꤛꤢ ꤔꤌꤣ꤬ꤗꤢ꤬, ꤢ꤬ꤒꤟꤢ꤭ꤒꤥ꤭ꤒꤟꤢ꤭ꤙꤢꤧ꤬ ꤒꤥ꤬꤯
8 ꤊꤢ꤬ꤛꤢ꤭ ꤒꤢ꤬ꤟꤢꤩ꤬ꤟꤢꤩ꤬ ꤒꤢ꤬ꤔꤟꤢꤩ꤬ ꤔꤢ ꤗꤢꤨꤢꤩ꤬ꤚꤢꤦ꤭ ꤔꤌꤣ꤬ꤗꤢ꤬, ꤢ꤬ꤞꤛꤢꤔꤢ ꤜꤟꤢꤪꤞꤢꤩꤜꤟꤢꤪꤕꤚꤟꤥ꤬ ꤘꤣ ꤢ꤬ꤡꤝꤤ꤬ꤔꤟꤤꤓꤢꤪꤔꤟꤤ ꤢꤨ꤭꤯
9 ꤊꤢ꤬ꤛꤢ꤭ ꤘꤣ ꤢ꤬ ꤋꤛꤢꤞꤢꤧꤘꤥ꤭ ꤢꤨ꤭ ꤗꤟꤢꤩ꤬ꤞꤢꤦ ꤜꤢꤨ꤭ ꤔꤌꤣ꤬, ꤢ꤬ ꤗꤛꤢꤕꤟꤢꤨ꤭ ꤟꤢꤪ ꤒꤟꤢꤧ꤬ꤗꤟꤥ꤬꤯
10 ꤞꤢꤧꤕꤚꤝꤟꤥ꤭ꤔꤟꤤ ꤕꤚꤟꤢꤧ꤬ꤙꤢꤩ꤭ꤖꤢꤧꤡꤟꤛꤢꤒꤟꤢꤧ꤬ ꤔꤌꤣ꤬ꤗꤢ꤬, ꤢ꤬ ꤒꤟꤥ꤭ꤔꤟꤤ꤯
11 ꤊꤢ꤬ꤛꤢ꤭ꤚꤤ꤬ꤡꤟꤛꤢ ꤘꤣ ꤢ꤬ ꤓꤢꤩꤏꤢꤦ꤬ ꤏꤛꤣ꤭ꤏꤢꤦ ꤡꤢꤪꤗꤢ꤬ꤚꤛꤢ꤬ ꤔꤌꤣ꤬, ꤒꤢ꤬ꤔꤢꤩꤖꤢꤨ ꤘꤣ ꤢ꤬ ꤗꤟꤢꤩ꤬ꤡꤟꤛꤢꤩ꤭ ꤢꤨ꤭ ꤊꤟꤢꤦ ꤕꤜꤤ ꤜꤢꤨ꤭ ꤕꤢ꤭꤯
12 ꤗꤛꤢꤓꤛꤢꤩ꤬ꤒꤟꤢ꤭ꤏꤢꤦ꤬ ꤔꤢ ꤓꤢꤩ꤭ ꤘꤣ ꤢ꤬ ꤗꤛꤢꤕꤟꤢꤨ꤭ꤞꤢꤦ ꤘꤛꤢꤩ ꤢ꤬ꤖꤢꤨ ꤔꤌꤣ꤬ꤗꤢ꤬,
13 ꤢꤨ꤭ ꤗꤟꤢꤩ꤬ꤚꤛꤢ ꤔꤟꤢꤧ꤬ ꤚꤢꤪ ꤔꤟꤢꤧ꤬ ꤊꤤ꤬ ꤗꤟꤢꤩ꤬ꤗꤢꤨ꤭ꤗꤟꤛꤢꤏꤢꤦ꤬ ꤢꤨ꤭ ꤟꤢꤩꤗꤢ꤬,
14 ꤡꤢꤓꤛꤢ꤬ ꤊꤜꤛꤢꤩ ꤊꤢ꤬ꤜꤢꤨ ꤜꤢꤨ꤭ ꤔꤌꤣ꤬ꤗꤢ꤬, ꤢ꤬ꤞꤛꤢꤔꤢ ꤓꤛꤢꤩ꤭ꤋꤢꤪ꤬ꤘꤢꤨ꤬ ꤕꤜꤥ꤭ ꤔꤌꤣ꤬ ꤟꤢꤪ꤯
15 ꤋꤢꤨ꤬ꤊꤜꤢꤪꤋꤢꤨ꤬ꤊꤜꤛꤢ꤭ ꤘꤣ ꤢ꤬ ꤟꤢꤩꤙꤢꤧ꤬ꤓꤌꤣ꤭ꤕꤜꤢꤦ ꤕꤢꤩ ꤊꤢ꤬ꤛꤢ꤭ꤚꤤ꤬ꤡꤟꤛꤢ ꤔꤢ ꤢ꤬ ꤗꤟꤢꤩ꤬ ꤒꤟꤢꤧ꤬ꤞꤢꤦ ꤒꤥ꤬ ꤔꤌꤣ꤬ꤗꤢ꤬, ꤡꤢꤪꤗꤢ꤬ꤚꤛꤢ꤬ ꤞꤢꤧꤐꤟꤢꤪ ꤔꤛꤢ꤬ꤡꤢꤪ ꤜꤢꤨ꤭꤯
16 ꤊꤢ꤬ꤛꤢ꤭ꤒꤢ꤬ꤊꤢꤧ꤬ ꤞꤢꤧꤑꤢꤩ꤭ꤕꤜꤥ꤭ ꤊꤟꤌꤣ꤭ ꤔꤢ ꤢꤨ꤭ ꤒꤣ꤬ꤡꤣ꤬꤮ ꤒꤥ꤬ ꤚꤢꤪ,
17 ꤋꤥ꤭ꤙꤢꤪꤞꤛꤥꤗꤟꤥ꤬ ꤗꤢ꤬ ꤢ꤬ ꤗꤟꤥ꤬ꤔꤟꤤ ꤡꤢꤪ ꤕꤝꤟꤥ꤭꤮ ꤒꤣ꤬ꤖꤟꤌꤣ꤯
18 ꤊꤢ꤬ꤛꤢ꤭ ꤋꤢꤨ꤬ꤊꤜꤢꤪꤔꤟꤢꤪ꤭ ꤥ꤬ꤒꤥ꤬ ꤢꤪꤜꤟꤛꤢ꤬ ꤔꤢ ꤢ꤬ꤋꤥ꤭ꤙꤢꤪꤞꤛꤥ ꤊꤤ꤬ ꤕꤜꤢꤙꤢꤧꤘꤛꤢꤩ ꤢ꤬ꤏꤢꤨ꤬ ꤒꤥ꤬ ꤟꤢꤩꤗꤢ꤬, ꤢ꤬ ꤕꤜꤢ ꤕꤢꤩ ꤜꤢꤨ꤭ ꤕꤢ꤭ ꤖꤢꤨꤔꤌꤣ꤬꤯
19 ꤊꤢ꤬ꤛꤢ꤭ ꤘꤣ ꤢ꤬ ꤊꤜꤛꤢꤩꤍꤢ꤭ ꤒꤢ꤬ꤗꤥ꤭ ꤢꤨ꤭ ꤔꤌꤣ꤬, ꤢ꤬ ꤞꤢꤧꤐꤟꤢꤦ ꤗꤟꤢꤩ꤬ꤙꤢꤧ꤬ꤏꤢꤧ꤭ ꤢꤨ꤭ꤞꤢꤧꤕꤜꤢꤪ꤬꤯
20 ꤊꤢ꤬ꤛꤢ꤭ꤞꤢꤧꤕꤜꤢꤪ꤬ꤊꤢ꤬ ꤔꤟꤤꤙꤢꤧ꤬ꤡꤟꤛꤢ ꤒꤟꤢꤧ꤬ꤚꤛꤢ ꤒꤥ꤬꤯
21 ꤖꤢꤨ ꤘꤣ ꤢ꤬ꤒꤢ꤬ꤊꤢꤧ꤬ ꤗꤟꤢꤩ꤬ꤞꤢꤧꤕꤜꤟꤢꤧ꤭ ꤢ꤬ꤗꤟꤌꤣ꤯
22 ꤒꤟꤢꤧ꤬ꤞꤢꤧꤊꤚꤟꤢꤦ꤭ ꤔꤌꤣ꤬ꤗꤢ꤬, ꤒꤟꤢꤧ꤬ꤋꤢꤨ꤬ ꤘꤣ ꤢ꤬ꤚꤛꤢ ꤒꤣ꤬ꤡꤣ꤬꤯
23 ꤊꤢ꤬ꤛꤢ꤭ꤡꤟꤛꤢꤩ꤭ꤚꤤ꤬ꤡꤟꤛꤢ ꤖꤛꤢꤩꤢꤩ꤬ꤟꤌꤣ꤬ ꤢꤨ꤭ ꤗꤢꤨꤢꤩ꤬ꤚꤢꤦ꤭ ꤚꤢꤪ ꤢ꤬ ꤗꤟꤢꤩ꤬ꤜꤟꤢꤨ꤬ꤋꤥꤊꤛꤢ꤭ ꤒꤟꤢꤧ꤬ꤗꤟꤢꤩ꤬ꤒꤥ꤭ꤗꤟꤢꤩ꤬ꤙꤢꤧ꤬꤯
24 ꤕꤚꤟꤢꤧ꤬ꤙꤢꤩ꤭ꤖꤢꤧꤡꤟꤛꤢꤒꤟꤢꤧ꤬ ꤒꤟꤥ꤭ꤔꤟꤤ ꤒꤟꤢꤧ꤬ꤞꤤꤖꤢꤧ꤯
25 ꤖꤢꤨ ꤘꤣ ꤢ꤬ꤒꤢ꤬ꤊꤢꤧ꤬ ꤗꤟꤢꤩ꤬ꤒꤢ꤬ꤋꤥ꤭ꤞꤢꤧ ꤢ꤬ꤗꤟꤌꤣ꤯
26 ꤊꤝꤤ꤭ꤕꤜꤢ ꤊꤢ꤬ꤛꤢ꤭ꤡꤢꤪ ꤔꤌꤣ꤬ꤗꤢ꤬, ꤢ꤬ꤒꤥ꤭ ꤒꤥ꤬꤯
27 ꤊꤢ꤬ꤛꤢ꤭ ꤘꤣ ꤢ꤬ꤒꤟꤢꤧ꤬ꤞꤢꤧꤋꤢꤨ꤬ꤞꤢꤧꤑꤢꤩ꤭ ꤥ꤬ ꤗꤟꤢꤜꤢ꤬ꤊꤥ꤭ ꤔꤌꤣ꤬ꤗꤢ꤬, ꤢ꤬ ꤚꤟꤢꤪ꤬ꤔꤟꤤꤘꤛꤢꤩ ꤢ꤬ꤒꤟꤢꤧ꤬ꤟꤢꤩꤙꤢꤧ꤬꤯
28 ꤊꤢ꤬ꤛꤢ꤭ꤙꤢꤪ꤭ꤙꤛꤢꤩ꤬ ꤋꤢꤨ꤬ꤊꤜꤢꤪꤕꤚꤛꤢꤩ꤭ ꤡꤢꤪ ꤙꤢꤧ꤬ꤙꤢꤧ꤬, ꤞꤌꤣ꤬ꤒꤢ꤬ꤊꤚꤢꤦꤊꤚꤢꤦ ꤢ꤬ ꤊꤤ꤬ ꤥ꤬ ꤟꤢꤩꤗꤢ꤬, ꤢꤨ꤭ ꤒꤢ꤬ꤔꤟꤢꤩ꤬ ꤜꤢꤨ꤭ ꤔꤢ ꤊꤢ꤬ꤛꤢ꤭ꤞꤤꤖꤢꤧ꤯