1 Nagaemo hakumo alino ataleno yagaino natesiyafeꞌmo Ala kava nepiꞌmo uꞌna fala nekuvaꞌmofeꞌmo na agufa gemo, namagana huka avelegamo halelika kaune ho, hutapa naha paigae.
2 Ago, hosu vayaꞌmogimo alagepa apaipa vayaꞌmo hapaesayafeꞌmo atiꞌapimo yagaiteꞌa kevemo aliꞌa yagailiꞌa haniꞌilagamo neꞌvae.
3 Faino ateꞌniya yaꞌmo aliꞌa halagape vaiꞌa atalesayana alagepa vayaꞌmogimo na kava hugae.
4 Gotiꞌa kokuꞌnapiꞌmo maiꞌnenoꞌaeꞌmo aote mono noꞌafiꞌmo fai maiꞌniye. Gotiꞌa yagaino neꞌapateya siateꞌmo fai maiꞌnenoꞌaeꞌmo ma mopafi muki vayaꞌmo apakeno alagepa huno apakeꞌneno alino fako huno neꞌapate.
5 Ala kava neꞌmoꞌa alagepa vayaꞌmo apamalageka nehiyaꞌmonanafa hosu vayanagi vayaꞌmo apamagisayafeꞌmo hapauꞌniya vayaꞌenagi huno aipafatiꞌmo alagi ohauꞌniye.
6 Agaemo apakaetegamo ko aigekana huno aneꞌai nofikana yaꞌmo yaga augiye. Atagi atafiꞌmo kae malefa yafanagi amuko yasimogi huno hetamaꞌapimo haneꞌniye.
7 Na agufa kavafeꞌmo hauꞌniyanagenoꞌaene. Ala kava neꞌmo fatago vekamo maiꞌnenoꞌaeꞌmo fatago kavafekeꞌmo hauꞌniyaꞌmofeꞌmae. Alagepa kavaꞌmo nehaya vayaꞌmogimo haiꞌa augosafiꞌmo agegae.