1 “Digau ala e lligi i di au, digaula e gadagada i di au dolomeenei!
2 Digaula digau huaidu, deai nadau hadinga ai,
3 Digaula e hagaloale huoloo gei e hiigai,
4 Digaula la digau e daagi nia geinga lodo henua gaa gai,
5 Nia daangada e wwolowwolo e hagabagi digaula gi daha,
6 Digaula e noho hua i lodo nia bongoo,
7 Digaula nogo wwolowwolo gadoo be nia manu lodo geinga,
8 Digaula la di buini balumee, gei hagalee e dau!
9 “Dolomeenei gei nia dama daane digaula gu lloomoi e gadagada mai gi di au,
10 Digaula e gulugulua i di au, e hagamaanadu bolo ginaadou e humalia i di au.
11 Idimaa God dela ne hai au gi haadanga balua,
12 Digau aanei e hai baahi mai gi di au
13 Digaula gu duuli dogu ala bolo ginaadou ga daaligi au.
14 Digaula gu ulu gi lodo nia bongoo
15 Au gu bolebole huoloo i dogu madagu.
16 “Dolomeenei, gei au gu hoohoo gaa made,
17 Ogu iwi huogodoo e mmae i di boo,
18 God guu kumi dogu uwa, guu dada ogu goloo gi daha.
19 Mee guu hudu au gi lodo nia gelegele pigi,
20 “Meenei God, au gu gahigahi Goe, gei Goe hagalee e hila mai.
21 Goe gu hai hua au haga huaidu,
22 Goe guu wanga au gi di madangi gi ilia gi daha,
23 Au gu iloo bolo Goe gaa wanga au gi di made,
24 Goe e aha dela e heebagi gi tangada dela gu mooho,
25 E hai behee?
26 Au gu hagadagadagagee gi di tene mo di maalama,
27 Au gu mooho huoloo i dogu hidi gaagaa mo dogu mmae.
28 Au e heehee hua gei au e honu i di lodo huaidu, deai dogu haga maalama ai.
29 Dogu lee la guu honu i di manawa gee gei e buhi,
30 Dogu gili gu luuli, au guu wele i di magi welengina.
31 I mua gei au nogo hagalongolongo gi nia lee tenetene,