1 Dakayo ay ipogaw ko,
2 Pangarig di osalek ay mankali en dakayo.
3 Da nan dinnge ya inammoan tako ay inbagan di ap-apo,
4 adi tako isaot sin aan-ak tako,
5 Inbaga na din linteg na
6 ta adalen din maisokat ay poli da
7 Say inbilina di en daida
8 ta baken dan kaman din ap-apo da
9 Din polin Efraim yan nan-armas da si pana,
10 Nilabsing da din intolag Diyos en daida,
11 Nilinglingan da din inam-amag na,
12 Sin pangiilaan di ap-apo da yan nan-amag si milagro
13 Din baybay yan nansianena et nandanenas daida,
14 Inpango nas daida babaen si liboo sin kaagawan
15 Nan-ekangenay bato sin kadardaratan
16 Inpawada nay obbog sin bato
17 Ngem intoltoloy da ay nanbasol en Diyos ay Kangatoan,
18 Ginagara da ay namadas en sisya
19 Nankali das maikontra en Diyos sin en da nangwanian,
20 Idi sinoplit na din bato,
21 Isonga idi dinngen Diyos na,
22 Tan magay pammati dan sisya,
23 Ngem olay mo siya di, binilina ed daya,
24 Kaman odan ay inig-as na di manna ay napod daya
25 Owat dan ipogaw ngem nangan da
26 Din dagem ay mapos belaan di agew yan binolosana,
27 Ad-ado ay titit di indawat nan daida,
28 Nag-as da sin nan-gawaan ya nanniliked di kampo da.
29 Isonga nangan ya nabsog da,
30 Ngem adi dan napnek et deda ay mangmangan da
31 yan binmonget si Diyos en daida
32 Ngem olay pay siya di, intoltoloy da ay nanbasol en sisya.
33 Isonga kaman dagem din biyag da
34 Idi pinse nay odom en daida,
35 Ninemnem da ay si Diyos ay Kangatoan
36 Ngem pag etek amin ay kali da,
37 Baken dan napodno en sisya,
38 Ngem managseg-ang si Diyos sin ipogaw na
39 Tan ninemnem na ay owat dan ipogaw
40 Sin lugar ay magay omili, kinontra das sisya,
41 Pinadapadas das sisya et nansakiten dan nemnem na,
42 Nilinglingan da din panakabalina
43 Nakaskasdaaw di inamag na
44 Nanbalinena si dada din ginawang da
45 Ad-ado ay ngilaw di inpawada na
46 Wada pay di dodon ay inbaa na
47 Babaen si dalalo ya andap, dinadael na
48 Pinse nas dalalo ya kimat din baka ya karnero da.
49 Inpalak-am na din palalo ay bonget na en daida,
50 Adi nan intoled din bonget na
51 Din besag di amin ay pamilya ed Egipto yan pinse na.
52 Pag nan ipango din ipogaw na
53 Magay lawa ay napasamak sin nangipangoana en daida
54 In-ey na din ipogaw na sin nasantoan ay daga na,
55 Inabo nan omili sin dinmatngan di ipogaw na,
56 Ngem si Diyos ay Kangatoan yan kinontra da
57 Baken dan napodno ya kinonkontra das sisya
58 Tan si Diyos yan inpabonget da
59 Palalo ay binmonget si Diyos sin nangilaana isna,
60 Din nanbeeyana ed Shilo yan binaybay-ana,
61 Inpalobos na ay posen ya isaan di kalaban da
62 Binmonget sin ipogaw na
63 Natey sin gobatan din babbaro da,
64 Natey si kampilan di papadi da,
65 Kaman naseseyep si Diyos ngem binmangon sin odi na,
66 Nansisianena din kalabana,
67 Sinigaana din polin Jose,
68 Ngem say pinili na et din tribun Juda,
69 Insaad nas di din Timplo na
70 Pinili nas David ay mansilbi en sisya,
71 ya pangay-ayowanana sin olbon da
72 Napodno sisya ay mangay-ayowan en daida,