1 राजा हेरोदए ओपालाक येसु यहूदिया खन्दलाव बेथलेहेम नाखारल ज़ जर्मिके। उजर्मिउ छींनी जैंसीर पुर्ब त॰नी यरूसलेमल हुद,
2 “जर्मिउ यहूदीराए याराजा काङ्क उलिज़्याव? नोलाई सरेस्न्या सोरो पुर्बल गेरँःके। है जैद नोलाई धो गेदोया लिद हुद गेले,” है यारादोकेर।
3 नो पाँ राजा हेरोदए थैद उयुँर आँचा पाँचा ताके। हिताव ज़ यरूसलेमलाव लिज़्याव भरी ब राजाए उयुँ स्यासो ज़ ताके।
4 है जैद राजा हेरोदए ओदेसलाव लिज़्याव घेप्पा घेप्पा पुजारीर स़ोनो सास्त्री भरी ब दुप्द, “नो धर्मसास्त्रलाव सर्सिउ ख्रीस जर्मिन्या पो काङ्क उलिज़्याव?” है लिद यासुधिक्यो।
5 नोराए, “यहूदियालाव बेथलेहेमल ज़ ताव परिन्या। अगमबक्ताए ब अइ लिद सर्द नैव,
6 ‘अ यहूदिया खन्दलाव बेथलेहेम,
7 राजा हेरोदए आव भरी थैद जैंसीरालाई अलगज़ा खुल्द, “नो सोरो खाक जेरँःव?” है दाद थ·रैद,
8 नोरालाई, “बाचिकेदा, नो जर्मिउ भाउज़ालाई बनै चावस खिम्च्यो। जेदैवत ङालाई मनी है दाव ताके। ङा ब बाद नोलाई धो ङादोरिज़्या,” है दाद बेथलेहेमदा यापरींक्यो।
9 नोर राजाए ओपाँ भैंःद याबाज़्याक फरी नो पुर्बलाव यारँःव सोरो याङ़ा याङ़ा बाद नो भाउज़ा जर्मिद उलिज़्याव पोक ज़ अदिके।
10 नो सोरोलाई रँःद बनै रेंए रेंए,
11 नो झ़िमल ज़ पसिकेर। नल नो भाउज़ालाई ओआमा मरियमस उलिज़्याव दैद ओङ़ाक फुलुप्सिद धो दाद यासुन्दुसर फैद सुनर धुपर बनै चाव चाव यासी ङरोर ब चरैःकेर।
12 हाः बेलाक ज़ तछा यामँल परमेस्वरए, “जे हेरोदए ल्योदा फरी ओल्द ताबाच्यो,” है ओरादोज़्याव रँःकेर। है जैद नोर हेरोदए ओल्योलाव घ्याँ माबाद तँनिकाव घ्याँ यादेसदा ओल्द बाकेर।
13 नो जैंसीर याबाव छींनी तछा योसेफए उमँल मनी परमेस्वरए ओचाकर्या हुद, “नँ सोद हतप्त ज़ भाउज़ा स़ोनो ओआमालाई लाँद इजिपदा धोंःचिके। फरी ‘हुचिके’ है ङामादाचिवा पै होङ ज़ लिच्यो। हेरोद राजाए नो भाउज़ालाई खिम्द सैःव पैंज़्याव,” है दोक्यो।
14 हाःत ज़ योसेफ सैंसिद रील ज़ नो भाउज़ालाई ओआमास इजिपदा निलाँक्यो।
15 हेरोद ओमासिवा पै होङ ज़ लिकेर। है जैद नत ज़ परमेस्वरए अगमबक्तालाई सरो उपरींव पाँ यो·के। नोए ओसरो आव ज़, “ङाज़ा इजिपनी खुल्द रैद ङानै।”
16 नो जैंसीर याबाव छींनी, ‘जैंसीराए ते याछकैनाव ची ओल्यो’ लिन्या सैंद हेरोद बनै रसिद बेथलेहेम स़ोनो नजीलाव खेपा ताद लिज़्याव भाउज़ार ऩेरिमकिन मेदाङाव भरी ओपो·स ज़ सैःव यापरींक्यो। नो ओरासैःव, जैंसीराए ङ़ादा सोरो यारँःव गोइँनी ज़।
17 नत ज़ यर्मिया अगमबक्ताए ओसरो पाँ यो·के। नोए ओसरो आव ज़,
18 “रामाल चिर्लनी बिर्ल थास्ज़्या।
19 हेरोद राजा उसिउ छींनी योसेफ इजिपल उलिज़्याक ज़ तछा उमँल परमेस्वरए ओचाकर्या फरी हुद,
20 “नँ सोद भाउज़ालाई ओआमास लाँद इस्राएलीराए जेपोदा ओल्द बाचिके। भाउज़ालाई सैःव पैंज़्याव ओल ज़ सिधुके,” है ओदोव प़ाइँना ज़,
21 योसेफ सैंसिद भाउज़ालाई ओआमास इस्राएल देसदा ज़ निलाँक्यो।
22 होङ ओकेसोत हेरोदए ओपोल ओज़ा अर्खिलाउसए यहूदीराए यादेस ओचलैज़्याव सैंद योसेफ नल लिन्या ओछे·ज़्याव। है जैद तछा उमँल, ‘गालील खन्दल बाद तोबोक लिन्के’ लिद परमेस्वरए है ओदोव रँःक्यो।
23 है जैद गालीललाव नासरत यादोज़्याव सहरल लिनाकेर। नो भरी ब अगमबक्ताराए यासरो मिताव ज़ यो·के। नो सर्सिउ आव ज़, “नोलाई नासरतलाव है दान्या लेर।”