1 निस्तार यादोज़्याव माँदा भरेस ज़्यान्या पर्ब ऩेलाए ओङ़ाल उलिज़्याव। हो बेलाक ज़ मुख्या पुजारीर स़ोनो सास्त्रीराए ‘येसुलाई कातानी झुकैद क्योःद सैःन्या ओताव?’ लिद गुमुस्ता यादोज़्याव।
2 नोर, “पर्ब बेलाक माता, म़ानी मिँर मचिन्या ओछ्यास लिज़्या,” है यालिज़्याव।
3 येसु बेथानिया नाखारल तोबो सिमोन यादोज़्याव कुऱीए उझ़िमक काँ उज़्युज़्याव। हो बेलाक तोबो मेंमाए बनै चाव ज़िम्ज़ा लुँ जाल उसी ङरो बनै ओएः ल्यो जतामसीए म़ास रैद जाए ओङ़ै केःद येसुए ओङ़ैत ओपो·स ज़ थीदिक्यो।
4 निताव रँःद नक लिज़्यावर ख्वा ख्वाराए यायुँ वा वा कैद, “आव मेंमाए काराव नाः ओएः ल्यो म़ास खेर ओझाःज़्याव?
5 बुरू नोलाई स़ोंसय चाँदीए सिक्काल यो·द नो पैसाए काता ज़ माल्योरालाई भाःद ओराएकिन तान्या ओल्यो,” है लिद नो मेंमालाई सिङार्केर।
6 हाःत ज़ येसुए, “घदोज़्यावक, काराव उयुँ केःद जेएज़्याव? नोए ते ङाजूँनी बनै चाव य़ेन दोक्यो।
7 काता ज़ माल्योर ते जेस एकतार ज़ लिज़्यार। नोरालाई जो बेलाक जेराएदी ब ताए। ङा ते जेस एकतार लिन्या ङामाले।
8 आव मेंमाए उधुवा भरी दाद्याँक्यो। ङा ङामासिद ज़ गादैन्या छ्यामकावए जूँनी ङामोरोलाई ङ़ादा ज़ थीद ओयाँव मिताव ज़ ताके।
9 है जैद ङा जेलाई साचो है ङादाचिज़्या, संसार भरिल जोङ जोङ चाव था यारासथैज़्यार, होङ होङ आव मेंमाए ओदोव य़ेन थास्द उमिन ब रहिन्या ले।”
10 नकिन बाह्र जना उसिसरानी यहूदा इस्करियोतए येसुलाई मुख्या पुजारीराए याकुइत पारैन्याए जूँनी याल्योक बाके।
11 नोर नोए ओपाँ थैद बनै रेंद नोलाई पैसा यान्या ब जैकेर। हाःकिन इस्करियोतए ‘येसुलाई कै जैद ङासूँपिके?’ लिद मौका खिम्क्यो।
12 हाःत ज़ नो माँदा भरेस ज़्यान्या पर्ब सुरू ओतावत पाथा पल्न्या छ्याम येसुए उसिसर ओल्योक हुद, “नँ कै नलिज़्या, आव पर्ब मानिन्याए जूँनी ज़्यावर काङ्क जैनान्या?” है यादोक ते,
13 येसुए ऩेब्लो उसिसनिलाई, “जिन सहरल बाचिन्केदा, नल तोबो ऱी गप्द ओघागरी छींद बाज़्याव मिँ दैन्या जिन्ले। नोए उछीं उछीं बाद,
14 जोल पसिज़्या होल ज़ पसिद नो झ़िमए ओर्गेलाई, ‘नँलाई गेगुर्बाए है दींज़्याव, पाहुना लिन्या कुन्ती काङ्क उलिज़्याव? आव पर्ब उसिसरास नल मानिरिज़्याव दी,’ है दोचिन।
15 है जिन्दोव प़ाइँना नोए ओतर्ताव तालल तोबो घेप्पा कुन्ती चावस सजैसिउ जिनलाई सतैंद्यान्या ले। गेज़्याव भरी नल ज़ जैचिन,” है दाद निपरींक्यो।
16 है जैद नोनी ननी पुलुस्द सहरल बाद है उनिदोव मिताव ज़ दैद पर्बताव ज़्याव भरी जैकिनी।
17 हो छ्याम ऱिमक येसु बाह्र जना उसिसरास नो झ़िमल दुप्सिहुकेर।
18 नोर च़ुसिद ज़्यावर याज़्युज़्याक येसुए, “ङा जेलाई साचो है ङादाचिज़्या, जेनी तोबोए ङालाई धोका यान्या ले, आख ङास सिप ज़्युज़्याव मिँ ज़,” है ओरादोक ते,
19 उसिसर यायुँ माचाव दाद, “ङा ते माताखेहो सा,” है लिद पालास पालास है दोकेर।
20 हाःत ज़ येसुए, “बाह्र जना भरिनी जोए ङास भरेस चिपल छोइद ज़्युज़्याव, हो ज़।
21 ङा मिँ मिन्सिउए ते धर्मसास्त्रलाव सर्सिउ मिताव दुखर जुनी ब सयो·व ज़ परिए, खाली ङालाई धोका याज़्याव मिँलाई ते थैए माँतकन ज़ लिज़्या। निताव मिँ बुरू ओमाजर्मिकिन तान्या ओल्यो,” है यादोक्यो।
22 नकिन नो याज़्युज़्यावत ज़ येसुए उकुइत भरेस तोबो रैद, असिक ऩिद नो भरेसलाई केःद, “हाँ, आव ज़्युचिके। आव ङाक्याँ ज़,” है दाद भाःद याएक्यो।
23 हो मिताव ज़ फरी खुरी उकुइत रैद धन्याबाद चरैःद नोरालाई याएक्यो। प़ाइँए ननी याओवत,
24 येसुए, “आव जेओज़्याव कुधु मिँराए जूँनी ङासोभोरिज़्याव ङाझी ज़। आनी ज़ परमेस्वरए जेस साःरो बाचा नैद्याचिरिज़्याव।
25 ङा साचो ज़ है ङादाचिज़्या, परमेस्वरए ओराज्याल साःरोनी ङामाओवा पै ङा आव भत्यारलाव दाखमद्य आछिमकिन ओन्या ङामाले,” है यादोक्यो।
26 नकिन भजन तोबो गैद ननी पुलुस्द जैतून दाँदादा बाकेर। |src="LB00320B.TIF" size="span" ref="१४:१७-२६"
27 नकिन येसुए उसिसरालाई, “जे ङालाई प़ाइँए ऱास्न्या जेले। धर्मसास्त्रल इताव सर्सिउ लिज़्या,
28 हैदी ब सिउनी सैंसिद जेङ़ादा ज़ गालीलल ङाबारिज़्या,” है ओरादोक ते,
29 पत्रुसए, “प्रभु, उपुर्कावराए प़ाइँए याऱास्निदी ब ङा ते नँलाई ङामाऱास्नी,” है ओदोक ते,
30 येसुए, “ङा नँलाई साचो है ङादींज़्या, आछिम रील भाल्या ऩेकराँ ओमाकोद ज़ ङालाई स़ोंखेप, ‘ङामासरेसे,’ है दान्या नले,” है ओदोक ते,
31 पत्रुसए झन ज़, “माःक, ङा नँस सिन्या ओतादी ब ङा नँलाई ङामासरेसे है लिन्या ङामाले,” है दोक्यो। उपुर्कावराए मनी हैज़ लिकेर।
32 नकिन येसु उसिसरास गेतसमनी यादोज़्याव बगैचाल बाद उसिसरालाई, “ङा ङापोंखारिवा पै जे आक ज़ लिच्यो,” है दाद,
33 पत्रुस, याकूब स़ोनो यूहन्नारालाई ओलस यालाँक्यो। हाःत ज़ येसु उयुँर स्यासे सतेद धो थाइव तानाद,
34 नो स़ोम्लोरालाई, “ङायुँर स्यासे तेद सिवा सिवा ताद ङाले। जे आक ज़ लिद सैंसिद लिचिके,” है दाद,
35 नोराकिन छ्यावा होकसै बाद नामक फुलुप्सिद ओक्याँत हुरिज़्याव दुखर भर्सकी ताहुक लिद,
36 “अब्बा, बाबु, नँ नमादोधुव काता ज़ माले, आव ङाक्याँत हुरिज़्याव धो सहिउ दुखर वैंद्याँके। खाली ङा ङायुँ ते माःक, नँ नयुँ ओताकिन वाज़,” है लिद पोंखारिद,
37 नो स़ोम्लोराए ल्योक उहुवत नोर ङ़ल्द यालिज़्याव दैहुद पत्रुसलाई, “सिमोन, नँ ङ़ल्द नलिज़्याव रो? नँ कै जैद ङास तघन्ता पै ब नमालिधुज़्याव?
38 जे प़ाइँ ज़ सैंसिद पोंखारिचिके, म़ानी दुखराल जेमाथ॰रिधुया। जेयुँए ते दान्या ज़ पैंज़्याव, खाली पाखाताव जेक्याँए ते मासहिधुन्या ओछ्यास लिज़्या,” है यादोक्यो।
39 नकिन येसु फरी ब ङ़ादाङाव ओपोंखारिज़्याव पोक बाद हो मिताव ज़ पोंखारिद,
40 नो स़ोम्लोराए ल्योक उहुक फरी ब ङ़ल्द यालिज़्याव ज़ यादैहुक्यो। नोराए यामीर बनै पातिद यामासहिधुवए यालाजए येसुस काता ज़ मापाँधुकेर।
41 फरी तखेप छींनी ब नोरालाई ङ़ल्द यालिज़्याव ज़ दैहुद, “आःपै जेमीर मायो·ताए रो? ताया, अब बेला यो·के। ङा मिँ मिन्सिउ पापीराए कुइत ङासूँपिसिरिके।
42 च्याँःसिचिके, गेबा। ङालाई धोका याज़्याव मिँ नक ज़ हुद ले,” है यादोक्यो।
43 येसु ओपाँज़्याक ज़ नो बाह्र जना उसिसरानिकाव यहूदा इस्करियोत बनै माहोल्या मिँरास तरवालीर खोंतार रैद हुकेर। नोर मुख्या पुजारीर, सास्त्रीर स़ोनो यहूदीराए यास़ेरराए ल्योनी हुद यालिज़्याव।
44 नो इस्करियोतए ङ़ादा ज़ नो क्योःना हुज़्यावरालाई, “ङा जोलाई माइँ ङादोए, होलाई ज़ क्योःद लाँच्यो,” लिद सरेस याद ओरानैज़्याव।
45 है जैद बगैचाल याकेसो प़ाइँना इस्करियोत येसुए ल्योक बाद, “जेरो गुर्बा,” लिद माइँ दोक्यो।
46 हाःत ज़ नो माहोल्याराए येसुलाई ताप तप क्योःकेर।
47 नकाव च्याँःसिद लिज़्याव तोबोए ओतरवाली हाइद प्रधान पुजारीए ओनोकोरलाई तँनिकाव ओर्ना पल्द सतेदिक्यो।
48 नकिन येसुए नो क्योःना हुव माहोल्यारालाई, “काराव ङालाई दाँकालाई मिताव तरवालीर खोंतार दाद जेक्योःहुनाव?
49 जेलाई दिनकाव ज़ ध्यान झ़िमल परमेस्वरए ओपाँ ङासथैचिक जेमाक्योःनाके। खाली धर्मसास्त्रलाव सर्सिउ पाँ सयो·व ज़ परिके,” है ओरादोव प़ाइँना,
50 उसिस भरी येसुलाई ऱास्द चितराँ पुतराँ धोंःकेर।
51 हो बेलाक तोबो धापाज़ाकाव छोर्या नाङग्या ओक्याँत पालो क्वा वाज़ भिरिसिउ उलिज़्याव। होलाई मनी याक्योःव प़ाइँना,
52 ओक्वार ख्यानैद नाङग्या ज़ धोंःके।
53 नकिन नो क्योःना हुवराए येसुलाई प्रधान पुजारीए ल्योक लाँकेर। नक मुख्या पुजारीर, यहूदीराए यास़ेरर स़ोनो सास्त्रीर दुप्सिद यालिज़्याव।
54 हो बेलाक पत्रुस जाँ तादाङ याछीं याछीं हुद नो प्रधान पुजारीए ओचतराक ज़ हुद नलाव पाल्यारास च़ुसिद मेंः उमुइँसिज़्याव।
55 नो झ़िमल मुख्या पुजारीर स़ोनो घ्योःव कचरीलाव स़ेर भरिए सैःन्या कर याखिम्ज़्याव, कर ते कान्त ज़ मादैकेर।
56 धुत गोहाई पाँन्यार कुधु ज़ यातावए सु सु यापाँ ब माखैके।
57 बल्ल तोबो ऩेब्लो च्याँःसिद अऩाकलाव पाँर पले·द अइ लिकेर,
58 “आवए, ‘ङा आव कुइए जैसिउ ध्यान झ़िमलाई तैःद फरी स़ोंलात कुइए माजैसिउ ध्यान झ़िम ङाजैरिज़्या,’ है ओल्यो गे ज़ गेथैके,” है यादोक ब,
59 नोराए यापाँ ब माखैके।
60 हाःत ज़ नो प्रधान पुजारी याखार्ल च्याँःसिद येसुलाई, “नँ नपाँ काता ज़ ओमालिज़्याव रो? आवराए नङ़ैत झाःद याईंव पाँ किताव उलिज़्याव?” है ओदोक ते,
61 येसुए घाइ ज़ मादोक्यो। फरी नो प्रधान पुजारीए, “नँ माहान परमेस्वरए ओज़ा ख्रीस सैं माःक?” है ओदोक ते,
62 येसुए, “ङा साचो हो ज़। तछा ङा मिँ मिन्सिउलाई माहान परमेस्वरए ओवोर्दा च़ुसिद ङालिज़्याव ब रँःन्या जेले, स़ोनो स्वर्गतिन बादलरास ङाहुज़्याव ब रँःन्या जेले,” है ओदोव प़ाइँना ज़,
63 प्रधान पुजारीए उरिसए ओक्वार चीए चीए, “छुत गोहाई काता ओचाहिउ?
64 जे ज़ जेथैके, आवए परमेस्वरए उमिन ओबले·ज़्याव। जे कै जेलिज़्या?” है ओरादोक ते, प़ाइँए ज़ सैःन्या थ·रैद,
65 ख्वाराए येसुलाई त़िल्द, उमीर कप्द्याद मुत्काए प़ोकेर। नै जैज़्यावराए फरी, “नँलाई प़ोज़्याव सु,” है लिद बरे·केर। सिपाईंराए पाला येसुलाई प़ोए प़ोए लाँकेर।
66 पत्रुस मेल चतराक ज़ उलिज़्याव। नो बेलाक प्रधान पुजारीए ओय़ेन दाज़्याव तोबो मेंमा हुद,
67 पत्रुसलाई मेंः उमुइँसिज़्याव रँःद, नोलाई लँ लँ चिऊद, “नँ मनी नासरतलाव येसुस नल्यो सानी,” है ओदोक ते,
68 पत्रुस माभैंःद, “नँ काता नपाँज़्याव इताव, ङा ते काता ज़ ङामासैंए,” है दाद ननी पुलुस्द साँबिलाक बाके। हो प़ाइँना ज़ भाल्या कोके।
69 नकिन जाँ छ्यावाक नो मेंमाए फरी पत्रुसलाई रँःद नक लिज़्यावरालाई, “आव ते साचो होसकाव ज़ ओल्यो,” है ओरादोक ते,
70 पत्रुस फरी ब माभैंःके। फरी छ्यावाक नक लिज़्यावराए, “नँ ब साचो उसिसरासकाव ज़, नँ ते गालीललाव ज़ ची,” है यादोक ते,
71 पत्रुस बनै थल्सिद किर्या झाःद, “नो है जेलिज़्याव मिँलाई सरेस ज़ ङामासरेसे,” है ओरादोव प़ाइँना ज़,
72 भाल्या ऩेकराँ कोके। नाःत ज़ ङ़ादा येसुए पत्रुसलाई, “भाल्या ऩेकराँ ओमाकोद ज़ स़ोंखेप ङालाई, ‘ङामासरेसे’ है लिन्या नले,” है ओदोव पाँ ब चेतैक्यो। नो चेतैद पत्रुस बनै घर्के।