1 एन्तिओखियालाव मन्दलीए खार्ल अगमबक्तार स़ोनो परमेस्वरए ओपाँ पलास्ज़्यावर यालिज़्याव। नोराए यामिनर आवर ज़ — बारनाबास, काल्या यादोज़्याव सिमियोन, कुरेनीलाव लुकियस, साऊल, स़ोनो ज़िम्ज़ाकिन ज़ हेरोद राजास तोबो झ़िमल सिप हुर्किउ मनेन याल्यो।
2 नोर तछा दुप्सिद, उपासिद परमेस्वरलाई यापोंखारिज़्याव बेलाक छैंव पुरूसए, “ङा बारनाबास स़ोनो साऊलनिलाई ङाजूँनी ङानिउथैव य़ेनत जे ज़ नोनिलाई खतैद यारापरींच्यो,” है यादोक्यो।
3 है जैद नोर उपासिद पोंखारिद नोनी निक्याँत याकुइ नैद्याद हो य़ेनत यारापरींकेर।
4 है जैद बारनाबास स़ोनो साऊलनी छैंव पुरूसए उनिखतैव य़ेनत बाकिनी। सिलुकिया सहर पै झरिद, नकिन ऱी जहाजल पसिद साइप्रस तापुत बाकिनी।
5 नल सलामिस सहर निकेसोत यहूदीराए धर्मसास्त्र झ़िमल बाद परमेस्वरए ओपाँ यारासथैकिनी। नोनिलाई सघैन्या यूहन्ना ब उलिज़्याव।
6 नो तापु भरिल तछ्योनी ज़ दुलिद पाफोस सहर याकेसोत नल तोबो बार-येसु यादोज़्याव यहूदी धामीस दैसिकेर। नोए परमेस्वरए उमिन हाइद धुतनी ओरापैज़्याव।
7 नो धामी तापुताव हाकिम सर्गियस पौलुसए ओसेवात उलिज़्याव। नो हाकिम बनै ओगहक ल्यो मिँ ओल्यो। नोए परमेस्वरए ओपाँ थैन्याए जूँनी बारनाबास स़ोनो साऊलनिलाई ओल्योदा सथैना निखुल्क्यो।
8 खाली बार-येसु यादोज़्याव एलुमास धामीए (ग्रीक खामनी एलुमासए ओअर्थ ‘धामी’ ज़) नोनी निपाँलाई वैंद, हाकिमलाई नो पाँनी तँदा बले·व ओपैंज़्याव।
9 है जैद साऊल (छींनी उमिन पावल) छैंव पुरूसए ब्याल्द, नोलाई लँ लँ चिऊद,
10 “ए सैतानए ओज़ा, धुतैद ज़्याज़्याव, साचो पाँ भरी वैंज़्याव, नँ खा पै परमेस्वरए दाँव ओयेमलाई गाँत्या गुँती जैव नपैंज़्याव?
11 नँ इताव नदोवए आछिमकिन परमेस्वरए ओसजा नक्याँत हुद जाँवा पै नमी लाम लुम ताद निमीए ओज़लाँ ब रँःन्या नमाले,” है ओदोव प़ाइँना ज़ उमी मारैंःद छाम छाम ताद दोरैन्या मिँ खिम्क्यो।
12 नो हाकिमए निताव रँःद परमेस्वरए ओपाँत अचम्ब ताद उयुँ हुप्के।
13 नकिन पावल ओनैंनिस ऱी जहाजल पसिद पाफोसनी बाद पामफिलिया खन्दलाव पर्गा सहरल केस्केर। नकिन ज़ यूहन्ना नोनिस भाःसिद यरूसलेमदा ओल्द बाके।
14 पावल स़ोनो बारनाबासनी ते पिसिदिया खन्दलाव एन्तिओखियाल बाद ऩासिन्या छ्याम ओतावए धर्मसास्त्र झ़िमल बाद च़ुसिकिनी।
15 नो झ़िमलाव घेप्पाराए मोसाए ओकानुन स़ोनो अगमबक्ताराए यापाँर यारासथैवत बारनाबास स़ोनो पावलनिलाई, “अ भाइनी, जिनस युँ सझेंःन्या काता पाँर उलिकिन गेलाई सथैव ताके,” है यारादोकेर।
16 हाःत ज़ पावल याङ़ाक च्याँःसिद उकुइए सान दाद, “अ इस्राएली ङानैंर स़ोनो परमेस्वरए ओमान नैज़्याव छुत जातलाव मिँर, आदा थैचिके।
17 इस्राएली जातलावराए गेपरमेस्वरए गेसाखा पुर्खारालाई छाँतिद, इजिपल खासिद यालिज़्याव बेलाक नोरालाई बनै ज़ सबा·द, ओल उकुइनी ननी पले·द दोरैद यालाँक्यो।
18 माचाव यादिउदीलाई ब चालीस बर्स भरी सहिद बनल पाथस यानैक्यो।
19 नोरालाई लिन्या पो जैद्यान्याए जूँनी कनान देसलाव सात राज्यारालाई यामिन सम़ैद्याद नो पो यामीं ज़ जैद याएक्यो।
20 नो भरी चार सय पचास बर्सवा लागिके।
21 हाः बेलाक इस्राएलीराए, ‘गेलाई चलैन्या तोबो राजा जैद्यासिके,’ है यादोक ते, परमेस्वरए नोरालाई तोबो साऊललाई याराजा जैद याएक्यो। नो मिँ बेन्यामीन थरलाव कीसए ओज़ा ओल्यो। नो मिँए चालीस बर्स पै याराज्या चलैद याएक्यो।
22 छींनी परमेस्वरए नोलाई पले·द दाऊदलाई याराजा जैद याएक्यो। होए उजूँनी ओल परमेस्वर ज़ अइ लिद उलिज़्याव, ‘यिसैए ओज़ा दाऊदलाई ङायुँलाव मिँ ज़ थ·रैद ङानै। नोए ङाय़ेन भरी चावस ज़ दान्या ले।’
23 परमेस्वरए नो मिँए ओथोनी ज़ गे इस्राएलीरालाई ओय़ाकालाव पाँर सयो·द्याद गेलाई तोबो बाँचैज़्याव परींद्यासिक्यो। नोए उमिन येसु ज़।
24 खाली नो ओमाहुवा पै, ऱील सछैंज़्याव यूहन्नाए इस्राएलीरालाई, ‘जेपापलाई ऱास्द ऱील सछैंसिहुचिके,’ है लिद ओरासथैज़्याव।
25 नोए ओय़ेन ओखेम्नावत, ‘जे ख्वाराए ङालाई ख्रीस है जेदाँज़्याखेहो। ङा हो माःक, नो ङाकिन छींनी हुरिज़्या। ङा ते नोए ओपोलाए ओच़ें पला·न्या स्यासो ब ङामाले,’ है ओरादोज़्याव।
26 “जे ङादाज्यु भाइर, अब्राहामए ओथोर स़ोनो परमेस्वरए ओमान नैज़्याव छुत जातलाव मिँर, आव है ङादाचिज़्याव परमेस्वरनिकाव बाँचैन्या पाँर गे प़ाइँए गेजूँनी ज़ लिज़्या।
27 यरूसलेमलाव मिँर स़ोनो गेघेप्पाराए झन नो येसुलाई ज़ मासरेस्धुकेर। ऩासिन्या छ्याम साताकाव तखेप दुप्सिद अगमबक्ताराए यापाँर प़रिद ब नो पाँए ओअर्थ माप़ाल्धुकेर। है जैद झन येसुलाई सैःन्या थ·रैद, मासैंद ज़ नो पाँर सयो·केर।
28 नोलाई सैःन्या खत कान्त ज़ यामादैज़्यावत ब, ‘सैःन्या ज़’ लिद पिलातसलाई सूँपिकेर।
29 नोए उजूँनी धर्मसास्त्रलाव सर्सिउ पाँ भरी प़ाइँ ज़ यासयो·वत ओमोरोलाई क्रुसतिन हाइद खादरल झाःकेर।
30 खाली परमेस्वरए झन नोलाई सिउनी सोचोइक्यो।
31 सिउनी ओसोवत ओलस गालील खन्दनी यरूसलेमल हुव ओनैंराए ल्योक कुधु दिन पै सरैंःसिके। नोर ज़ आज्याल ओसाचीर लिज़्यार।
32 “है जैद गेसथैचिज़्याव चाव था आव ज़ — गेसाखा पुर्खारालाई ओरायो य़ाका भरी
33 येसुलाई सिउनी सोचोइद गे याथोराए गेक्याँत ज़ सयो·द्यासिक्यो। किताव भजन पोस्तोकोलाव दुईल सर्सिउ लिज़्या, हिताव ज़ यो·के। नलाव सर्सिउ आव ज़,
34 फरी धर्मसास्त्रल परमेस्वरए येसुलाई सिउनी सोचोइद फरी ब सिउ यान्या माले लिन्या ङ़ादाकिन ज़ ओरैंःज़्याव। तोथो आव ज़,
35 फरी तोथोल अइ लिद ब सर्सिउ लिज़्या,
36 “ओल दाऊद ते उप़िरील वाज़ लिद, परमेस्वरए ओय़ेनर सयो·द उजिज्यु बाज्युराए माँःती सिद खादरल बाद चिके।
37 खाली परमेस्वरए येसुलाई सिउनी ओसोचोइवए ओक्याँ माचिए।
38 है जैद ङादाज्यु भाइर, आव ब सैंच्यो — आव है ङादाचिज़्याव येसुनी, जेदोव पापए सजा क्याल्सिज़्या।
39 मोसाए ओकानुननी उस्किउ गेमादैवए जो मिँए येसुलाई उयुँ हुप्ज़्या, नो प़ाइँनी ज़ फुर्सुल ताद परमेस्वरस खैज़्या।
40 है जैद आव पाँत जोगोइसिच्यो, म़ानी अगमबक्ताराए यापाँ जे जेक्याँत ज़ तान्या ले। नो पाँ आव ज़,
41 ‘अ ङापाँलाई हसैद ल़॰ज़्यावर,
42 पावल स़ोनो बारनाबासनी धर्मसास्त्र झ़िमनी पुलुस्द निबाज़्याक नो थैवराए, “आव जिनपाँ फरिकाव साताक मनी गेलाई सथैव ताके,” है यारादोकेर।
43 भाःसिद निबावत मनी कुधु यहूदीर स़ोनो छुत जातलाव यहूदी धर्म मानिज़्यावर नीस ज़ बाकेर। है जैद पावल स़ोनो बारनाबासनी, “आव जेथैव पाँत थ॰रिद परमेस्वरए ओयाचिउ असिकलाई ताऱास्च्यो,” है लिद यारासथैकिनी।
44 नो हुव साताकाव ऩासिन्या छ्याम सहरलाव लिज़्याव जाँकोसै मिँर परमेस्वरए ओपाँ थैना हुकेर।
45 यहूदीराए, मिँर नाः कुधु याहुज़्याव रँःद यामी तूद पावलए ओपाँ पल्तैद्याव पैंद नोलाई थल्केर।
46 नाःत ज़ पावल स़ोनो बारनाबासनी, निपाँ छत्कैद है यारादोकिनी, “परमेस्वरए ओपाँ थैन्या मौका ङ़ादा ते जे यहूदीरालाई ज़ याव ताके है गिन्लिज़्याव। खाली जे नो पाँलाई भीःद अजम्बरी जुनी दैन्या मौका जेमाभैंःवए, गिन ते छुत जातलाव मिँरालाई गिन्रासथैनारिज़्या।
47 आवए उजूँनी परमेस्वरए धर्मसास्त्रल मनी अइ लिद ले,
48 नो परमेस्वरए ओपाँ थैद नकाव लिज़्याव छुत जातलाव मिँर बनै रेंद नो पाँए उजूँनी धन्या धन्या है लिकेर। है जैद परमेस्वरए अजम्बरी जुनील बान्या थ·रैद ओरानैज़्याव भरिए नो पाँत यायुँ हुप्के।
49 है जैद परमेस्वरए ओपाँ नो खन्द भरिल प़ाइँदा ज़ ओरा·सिनाज़्याव।
50 खाली नलाव यहूदीराए माभैंःद याधर्म मानिज़्याव धनी मेंमार स़ोनो सहरलाव घेप्पारालाई मचैद पावल स़ोनो बारनाबासनी निखिरी पसिउ परींद यापोनी याराखेपैकेर।
51 है जैद पावल स़ोनो बारनाबासनी, माभैंःज़्यावरालाई परमेस्वरए ज़ न्याय ओदोवक लिद निखँताव गालो धुइरो ब सीद ख्यानैद्याद आइकोनियन सहरदा बाकिनी।
52 परमेस्वरए ओपाँत हुव भरी ते छैंव पुरूसए ब्याल्द रेंव ज़ यालिज़्याव। |src="HG-K-Paul-1 BW Kham.pdf" size="span" ref="13:52"