1 फरी ङाभाल्सिक नमत तोबो बनै अचम्बलाव सरेस ङारँःके। याकुइत ऩुल्पा ऩुल्मा ल्यो सात जना चाकर्यार ङारारँःके। आवर ज़ प़ाइँरानी छींताव ऩुल्पा ऩुल्मार, परमेस्वरए उरिस नत ज़ खेम्न्या ले।
2 नकिन तोबो मेंःस बरे·सिउ धर्पन स्यासो बनै घ्योःव समुन्द्र मिताव ङारँःके। नोए ओतर्त परमेस्वरए नोरालाई ओरायो सारङ्गर याकुइत ल्योर कुधु ज़ च्याँःसिद यालिज़्याव ब ङारारँःके। नो च्याँःसिद लिज़्यावर नो ङ़ादाङाव राछ्यास स़ोनो नोए उसुरूप जैसिउ अङग्याए ओछाप मारैवर, ओलकिन झेंःस्या तावर ज़।
3 नोराए परमेस्वरए ओनोकोर मोसा स़ोनो परमेस्वरए ओपाथाए ओभजन अइ लिद यागैज़्याव,
4 है जैद अ प्रभु, नँलाई रँःद माछे·न्या सु ची उलिज़्याव?
5 आव भरी ओतावत फरी ब ङाभाल्सिक स्वर्गताव ध्यान झ़िम फैसिद परमेस्वर उलिज़्याव प़ाइँरानी चोखो पो ङारँःके।
6 हाःत ज़ नो ङ़ादाङाव याकुइत ऩुल्पा ऩुल्मा ल्यो सात जना चाकर्यार ध्यान झ़िमनी पुलुस्हुकेर। नोर बनै तक तकौ क्वा जासिउर, याछातीत सुने पाता पो·सिउर यालिज़्याव।
7 नकिन नो चारता जन्तु स्यासोरानी तोबोए नो सात जना चाकर्यारालाई एकतार जींदो ज़ लिज़्याव परमेस्वरए उरिस सब्याल्सिउ सात गोता सुने खुरी याएक्यो।
8 हाःत ज़ नो स्वर्गताव ध्यान झ़िम भरिल परमेस्वरए ओज़गै स़ोनो ओसक्तीनिकाव म़िकुइए सब्याल्क्यो। नो सात जना चाकर्याराए याकुइताव ऩुल्पा ऩुल्मा ओमाखेमा पै नो ध्यान झ़िमल सु ज़ मापसिधुकेर।