1 नकिन तोबो बनै ओर्सा ल्यो चाकर्या बादल क्वाइसिद स्वर्गतिन उहुज़्याव ङारँःके। नोए ओङ़ैत रिगाउँ जासिद उलिज़्याव, ओङाः निमी स्यासो उलिज़्याव, उखँर मेंःए मुल्का स्यासो उलिज़्याव।
2 नोए उकुइत तोबो ज़िम्ज़ा पोस्तोको फैसिउ उलिज़्याव। नोए वोर्फताव उखँ समुन्द्र तर्त ओनैज़्याव, दाबर्याफताव उखँ नाम तर्त ओनैज़्याव।
3 नोए लाए ओर्गा मिताव जैद बनै चोइस उक़िक सात गोता गर्जिन्याराए मनी यार्गा सथास्द पाँकेर।
4 नो गर्जिज़्यावराए यापाँ सर्न्यात ङाथूसिक, स्वर्गतिन फरी छुत तोबो गा अइ लिद हुके, “नो सात गोता गर्जिज़्यावराए यापाँ मासर्द छाप झाःद म़ोंके।”
5 हाःत ज़ नो तँफताव उखँ समुन्द्र तर्त, तँफताव उखँ नाम तर्त लिज़्याव चाकर्याए वोर्फताव उकुइ स्वर्गदा छींद,
6 नाम नम, समुन्द्र स़ोनो नलाव ताव भरी जैज़्याव एकम्न्या जिउँव ज़ लिज़्याव परमेस्वरए उमिन छुद अइ लिद पाँके, “अब ते धिलो तान्या माले।
7 प़ाइँरानी छींताव चाकर्याए ओभोंकर ओतबोत परमेस्वरए ओसेवा दोज़्याव अगमबक्तारालाई है ओरादोव म़ोंसिउ पाँर यो·न्या ले।”
8 हाःत ज़ नो ङ़ादा स्वर्गनी हुव गा फरी ब तखेप ङास अइ लिद पाँके, “नँ आनी बान्केदा, नो तोबो उखँ समुन्द्र तर्त, तोबो उखँ नाम तर्त लिज़्यावए उकुइताव पोस्तोको हाइद रैके,” है ओदाँक ते,
9 ङा नो चाकर्याए ल्योक बाद, “नो नकुइताव ज़िम्ज़ा पोस्तोको ङालाई याव ताके,” है ङादोक ते, “ताए, लाँकेदा, आव भरी ज़्युयो। आवए नफूलाई सकाद्यान्या ले, नयाःलाई ते राप मिताव सत़ाद्यान्या ले,” है ओदाँव प़ाइँना,
10 उकुइताव ज़िम्ज़ा पोस्तोको रैद ङाज़्युक ङायाःत राप मिताव त़ा त़ा ताके। ङागालो छींनी ङाफू बनै काके।
11 हाःत ज़ फरी तोबो गा अइ लिद ओपाँज़्याव ङाथैके, “नँ फरी ब प़ाइँ राज्यालावर, प़ाइँ जातलावर, प़ाइँ खामनी पाँज़्यावर स़ोनो राजाराए याक्याँत हुन्या पाँर पाँव परिरिज़्या।”