1 है जैद ख्रीसए मनी उजिउत दुखर उसहिउए जे मनी निताव य़ेनत झाःसिद लिचिके। जोए दुखर दैद सहिज़्याव, होए ज़ पाप दान्या ब ऱास्ज़्याव।
2 नोए ज़ आव मानुवात ओलेवा भरी युँ मानैधुन्या भरी ऱास्द परमेस्वरए उयुँलाव मितावदा वाज़ उयुँ थू जैज़्याव।
3 ङ़ादा जे मनी परमेस्वरलाई मासरेस्ज़्यावराए यादोज़्याव मिताव पातर्या पातर्नी जैसिन्या, जोत ब युँ मानैधुन्या, मँःए मँःए बाऱिन्या, तुबुरी दुलिन्या, मद छोकोरा वाज़ खेपैन्या स़ोनो युँ माजामो अङग्या पुजा दान्यात कुधु समय जेझाःके।
4 अबकिन ते नो ङ़ादाकिनकाव जेनैंरास जेजिउ च्यो च्यो जेझाःज़्याव माचाव य़ेनदा जेमाबाज़्यावए, नोर अचम्ब ताद जेलाई गिल्लैन्या लेर।
5 हैदी ब तछा सिउ मासिउराए यान्याय फाल्ज़्यावए ओङ़ाक च्याँःसिद नोर पाँव परिरिज़्या।
6 है जैद सिउरालाई मनी चाव था सथैसिउ लिज़्या। हो ताकिन ची नोर प़ाइँ मिँराए माँःती यासिदी ब परमेस्वरए उपुरूसनी एकम्न्याकावए जूँनी बाँचिन्या लेर।
7 खेम्न्या बेला नजिकक ज़ हुद ले। है जैद जेतहस लिद पोंखारिन्यात झाःसिद लिचिके।
8 प़ाइँरानी दान्या जे जेल युँ जींनी मया दासिन्या ज़। मयानी कुधु पापर कप्सिज़्या।
9 जेझ़िमक हुज़्यावरालाई मारूम्रूमैद चावस यारासुम्च्यो।
10 किताव प़ाइँए तोबो तोबो भाँती भाँतिलाव परमेस्वरए ओबरदानर दैद जेनै, हिताव ज़ नो बरदानर चावस चलैद जे जेल समारिसिच्यो।
11 पाँज़्यावए परमेस्वरए ओपाँनी ज़ ओपाँक। सघैज़्यावए परमेस्वरए ओसक्तीनी ज़ ओसघैवक। हो ताकिन ची जेदोव भरित येसु ख्रीसनी परमेस्वरए उमिन रैंःन्या ले। नोलाई खर्क ज़ माखेम्न्या ज़गै मगै स़ोनो सक्ती उकुइत ज़ ओताक। आमेन।
12 अ ङायुँलाव ङानैं ङामेंर, जेखार्ल हुद लिज़्याव दुखर रँःद ‘काता इताव’ लिद जेयुँर स्यासे तासतेच्यो।
13 बुरू नो दुखर जेदैक रेंद लिच्यो। काराव ल्यो ताकिन जे ख्रीसस सिप दुख जेदैज़्याव मिताव ज़ लिज़्या। तछा ज़गै मगैवस उहुक जेयुँर होलाँ ताद रेंन्या जेले।
14 ख्रीसए उमिनत हेला यारँःचिकिन धन्याकावर जेताज़्या। ननी ज़ परमेस्वरए ज़गै मगैव उपुरूस जेक्याँत च़ुसिहुज़्या।
15 खाली जेनी मिँ सैःन्या, कुन्या, छुतए ओय़ेनत कुइ झाःन्या, निताव माचाव य़ेनरानी सुलाई ज़ सजा ताताक।
16 ख्रीस्त्यान जेतावनी ते दुखर जेदैकिन जेलाज ताहुक। बुरू नो मिन जेदैवनी परमेस्वरलाई धन्याबाद चरैःच्यो।
17 परमेस्वरए जाँचिन्या बेला हुद ले। उस॰कत ओल उमींराए ल्योनी थूसिरिज़्या। गेनी उथूसिकिन चाव ओथा माभैंःज़्यावरालाई झन किताव ताके?
18 धर्मसास्त्रल मनी इताव सर्सिउ लिज़्या,
19 है जैद परमेस्वरए ओयाचिउ जेजुँ दुखर दैन्या ताकिन, नो चाव जेय़ेनलाई माऱास्द जेलाई जैज़्यावए ओक्याँत ख्यासिद लिच्यो। होए जेलाई खर्क ज़ ऱास्न्या माले।