1 Ulo tomota, kulagaisi ulo vituloki,
2 E yeigu ibodi babigitomoya
3 vavagi makwaisina bogwa talagaisi deli tanikolaisi,
4 Gala ibodi bitakatupwanaisi metoya olitudoiasi.
5 Matauna isisaiki karaiwaga makwaisina baisa mina Isireli,
6 mapaila baisa tubwa matubona igau bima ibodi bitakutaisi makwaisina,
7 E wa keda makadana wala matausina deli goli bidubumaisi baisa Yaubada,
8 E matausina gala bivagaisi makawala tubusia,
9 Mina Epereim ikapupaiyaisi si kaiyala
10 E gala sitana ivagaisi makawala si kabutu deli Yaubada,
11 Ilumwelavaisi avaka matauna bogwa leivagi,
12 Wa tuta makwaina tubusia eigigisaisi,
13 Ivigaki bolita bitabai e iluvipeili matausina oluwalela goli,
14 Wa yam ikugwai matausina metoya olowalowa,
15 Ikatuvi dukutotu oviloupakala
16 Ivigaki sopi sumokainia iviloubusi metoya odukutotu,
17 Mitaga isikileiwaisi wala mitugaga baisa Yaubada,
18 Matausina ininatalasi biwakolaisi Yaubada,
19 Ikavilakaisi Yaubada kawasi,
20 Baisa biga mokwita matauna iwaiya dukutotu,
21 Mapaila baisa Guyau igibuluwa avai tuta ilagi si biga,
22 paila uula gala idubumaisi matauna,
23 Mitaga iluki labuma walakaiwa,
24 E isaiki matausina kaula metoya wa labuma,
25 Mapaila baisa mwada anelosi kʹasi eikomasiga,
26 E tuvaila ivigaki yagila bomatu iuu,
27 E iwitali mauna baisa la tomota,
28 Ikapusisi olopola kabosikaiwa
29 Mapaila baisa tomota ikamsi e ikomatasi.
30 Mitaga gala wala iukuwokuva kasi vikeiya,
31 avai tuta Yaubada eigibuluwa baisa matausina
32 Mitaga tomota isikileiwaisi wala mitugaga,
33 Mapaila baisa ivigimkulovi si tuta makawala sivatala wala yagisa,
34 E avai tuta wala bikatumati mimilisi,
35 Bogwa eiluwaisi mwada Yaubada matauna kasi tokwala,
36 Kasi udokaiwa wala ililivalasi,
37 Komwaidosi wala gala ikatilavaisi titoulesi baisa matauna,
38 Mitaga Yaubada saina inokapisi la tomota,
39 Iluluwai paila matausina mina watanawa wala,
40 Sivabidubadu ikosomapwaisi Guyau oviloupakala,
41 Tuta tuta iwakolaisi wala Yaubada,
42 Matausina bogwa eilumwelavaisi la peuligaga,
43 e deli ivagi vavagi topilaveka deli la kabutuvatusi
44 Ikivili waya imili buyavi,
45 E iwitali nigunagu baisa matausina saina ikaiki uwosi,
46 E iwitali nipawa paila bikomasi si bagula,
47 Ikatumati matamsina si waini metoya kuna kwekulokula,
48 Ikatumati si bulumakau metoya kuna kwekulokula,
49 Ivigaki baisa matausina saina ninamwau kwaiveka,
50 Gala goli ikiyumali kala leiya
51 Ikatumati si kuluta tauwau
52 E oluvi ivakouli la tomota ivisunupuloi makawala taitala toyamata iiyamati la sipi,
53 Ivakouli matausina ilau mitilabi wala, e gala wala ikokolasi,
54 Iviloubusii matausina baisa ola valu kwebumaboma,
55 Ibokavili tomotala valu makwaina avai tuta la tomota eisuvaisi kulusi.
56 Mitaga matausina ikosomapwaisi wala Yaubada Topeuligaga,
57 mitaga saina tokosomapu deli tokowolova makawala tumisia,
58 Iyogibuluwaisi matauna metoya si kabotapwaroru baisa yaubada sasopa,
59 Yaubada igibuluwa avai tuta eigisi makawala,
60 Isilavi la buliyoyova mapilana Sailo,
61 E itagwala kada tilaulasi bilebwaisi Kabutu Didawogala,
62 Matauna igibuluwa baisa wala la tomota tatoula,
63 Uluulatila ikaligasi okabilia,
64 Tolula ikaligasi metoya oyowai,
65 E kala vigimkovila Yaubada imamata e kala gigisa makawala eitokaia metoya omasisi,
66 Ibokavili kala tilaula ikeiitasi
67 Mitaga ipaiki dalela Yosepa,
68 Kaimapula wala inagi dalela Yuda,
69 E mapilana valu ikaliai la Bwala Kwebumaboma,
70 E inagi la touwata Debida.
71 baisa goli matauna iiyamati mayuwosina la sipi,
72 Debida ivauli matausina metoya ola ninatotila,