1 Mwa Guyau! Kukoulovi matausina availa availa mwada bikoulovaigusi.
2 Kukwau m vayoula deli tabodala wowom
3 Kukwapupai m kwaiyala deli m kema
4 Ibodi matausina availa availa ivigikonaisi mwada bikatumataigusi
5 Ibodi matausina bisakaulasi makawala wawa tutala yagila iiyuvisau
6 E ibodi si keda bidudubila deli bidumokikina
7 Matausina eileiyamakavaisi agu sikula,
8 Mitaga matausina gala wala inikolaisi e kabosilagi saina nanakwa bilitaki matausina.
9 E mapaila bamwasawa paila uula Guyau.
10 Deli nanogu komwaidona balivala baisa Guyau kawagu,
11 Tomitugaga ikamitulaigusi oyakala
12 Yeigu avagi vavagi bwaina e matausina imapwaisi vavagi gaga.
13 Mitaga avai tuta matausina eikatoulasi,
14 makawala goli bavigaki banigada paila lubaigu kaina bodagu.
15 Mitaga avai tuta yeigu laboda mwau, komwaidosi matausina imwasawasi
16 Matausina ikapwinipwinaisi mitasi baisa yeigu deli kasi leiya,
17 Mwa Guyau! Ammakawalaga kala woloula bukugigisakaigu wala?
18 E banokagutoki baisa yoku osi sigugula m tomota.
19 Gala bukutagwala agu tilaula matausina tosisasopa
20 Matausina gala wala sitana iudakatuwotilasi.
21 Matausina itabinakaigusi deli si wakula,
22 Mwa Guyau! Yoku bogwa kugisi komwaidona baisa,
23 Mwa Guyau! Kuvigimamalu kutokaia kukwabwailigu.
24 Mwa Guyau! Yoku tomitukwaibwaila, mapaila kukwamitulaigu yeigu tobwaila wala.
25 Taga bukutagwala bininamsaisi titoulesi kawasi,
26 Ibodi availa availa matausina iyosokanaigusi paila agu mmayuyu
27 Availa availa matausina magisi bilagaisi matauna toyakala bikabwailigu,
28 E oluvi bakamituli paila m mitukwaibwaila,