1 Ka, kunakaigalaisi - kabitam idoudou.
2 Itotu wa koya e osiusiula keda,
3 Itotu okadumilagela valu,
4 “Yokomi tomota komwaidomi, kunakaigalaigusi!
5 Yokomi toninitaboda ibodi bitalapula ninami.
6 Kunakaigalaisi ulo biga saina bwainigaga.
7 Baisa avaka alivala biga mokwita wala.
8 Komwaidona avaka alivala baisa mokwitatoula,
9 Availaga toninitalapula, matauna bigisimlili vavagi komwaidona,
10 Ibodi bukukwauwaisi ulo vituloki kaimapula siliba.
11 “Yeigu goli Kabitam. Yeigu akalisuwoli veiguwa kala bwaina.
12 Yeigu goli Kabitam, isim ulo ninitalapula.
13 Kidamwa kutemmalaisi Guyau,
14 Aninamsi avaka bavagi, e oluvi avagi makawala.
15 Gweguya apilasi kidamwa bigiyoubwailasi,
16 Komwaidona guyousi mina watanawa ikaraiwogaisi si tomota metoya ogu pilasi,
17 Ayebwaili availa availa matausina iyebwailigusi.
18 Aiyosi guguwa deli kamaiaba,
19 Baisa avaka basakaimi ikalisuwoli goula kweminabwaita,
20 Yeigu aliloula okedala bubunela bwaina,
21 e matausina iyebwailigusi asaiki guguwa,
22 “Guyau ibubulibogwaigu oluviga vavagi komwaidona,
23 Okala vitouula vavagi komwaidona ibubulaigu,
24 Igau gala isim bolita, yeigu akaloubusibogwa,
25 Igau gala ikaloubusisi koya kwevakaveka,
26 E tutala Yaubada gala bibubuli valu watanawa deli bigulela,
27 Tutala isaili labuma okabala, yeigu asibogwa,
28 E tutala isaili lowalowa wa labuma,
29 e iluki sopila milaveta bimwaimwena
30 e yeigu lasisu otalila makawala topilasi,
31 Lammwasawa paila komwaidona valu watanawa,
32 “E tubovau, ka, kunakaigalaigusi.
33 Kulagaisi avaka bavitulokaimi, e bukukwabitamsi.
34 Availa binakaigalaigu, e matauna bogwa bimwasawa.
35 Availa bibanaigu, matauwena bogwa bibani momova,
36 Availa gala bibanaigu, matauna iyomiyuyu titoulela.