1 Mina Isireli, ka, Guyau matauna eibubulaimi eilivala kawala,
2 Kidamwa bukusalilisi bukulosi otilibwabwau, yeigu deli wala yokomi.
3 Paila ka, yeigu goli Guyau mi Yaubada.
4 Yeigu bakilavi boda komwaidona paila goli bakoli mi momova,
5 Gala bukukokolasi - yeigu deli yokomi.
6 Yeigu baluki tolesi opiliyavata kidamwa bikilavaimi bukumaisi,
7 E yokomi ulo tomota tatougu,
8 Yaubada eilivala kawala,
9 Kudouwaisi boda ituwoli ituwoli bimaisi paila yakala.
10 “Mina Isireli, yokomi ulo tosola.
11 “Ka, yeigu goli agumwaleta Guyau,
12 Yeigu avitoubobuta paila avaka bikaloubusi,
13 Ka, yeigu goli Yaubada e yeigu basivagasi Yaubada goli.
14 Ka, Guyau matauna mina Isireli mi Yaubada Tobumaboma, matauna goli eikolaimi ikaibiga kawala,
15 Ka, yeigu wala Guyau, yeigu goli mi Yaubada Tobumaboma.
16 Omitibogwa Guyau ivagi kadatala keda oluwalela bolita.
17 E matauna ilau budotala budoveka tokabilia e matausina isilagisi e
18 Mitaga Guyau eikaibiga kawala,
19 Mitaga kugigisaisi paila kwaitala kwaivau vavagi yeigu bavagi.
20 Avai tuta yeigu bavagi waya bititayelu oviloupakala,
21 E matausina lavigaki paila ulo tomota tatougu,
22 E mitaga Guyau ikaibiga kawala,
23 Yokomi gala kumiakaigusi mi lula kwegubugabu metoya sipi,
24 Yokomi gala kugimolaisi mi lula maiina simasimina paila yeigu,
25 Mitaga ka, yeigu wala Yaubada e yeigu goli baligaiwa mi sula,
26 “Mitaga ka, kumaisi bitalosi tayakalasi, e avaka mi tabinona kumaiyaisi wala.
27 Ka, matauna tubumi tomaibogwa imitugaga,
28 deli kami tokwaraiwaga iyogwalaisi ulo Bwala Kwebumaboma.