1 Tuta baisa Mosese deli mina Isireli iwosisi mapilana wosi baisa Guyau, kawasi.
2 Guyau matauna agu tokwala topeula wala.
3 Guyau matauna kumatoula.
4 “E mina Itipita si tokwabilia deli si waga kaibibiu eilavi ilosi olumoulela bolita.
5 Tulubwabwau ikuboli matausina,
6 “E Guyau, yamam kweyakakata saina kweyapapeula, e itutuvakau nanogu.
7 Kutomgwaga odubasi kam tilaula, e yoku goli giyouveka.
8 Kuyuvisau bolita e sopi ila walakaiwa.
9 Tilaula matausina ikaibigasi kawasi, ‘Babokavili ayosi matausina.
10 Mitaga ka, Guyau - sivatala wala kuyagisa, e mina Itipita ikanopulasi.
11 “Mwa, Guyau! Avai yaubada isisu makawala yoku?
12 Lokuyosali yamam kweyakakata
13 Lokukugwai matausina availa availa lokukoli,
14 Boda ituwoli ituwoli ilagaisi e itatatuvasi deli kasi kokola.
15 Tokugwala Edom tuvaila kasi kokola sainela.
16 Saina kasi kokola eimitaki uwosi,
17 E lokumai matausina e lokubudi si valu om koya.
18 Mwa, Guyau! Yoku m guyau gala kala vigimkovila, bikanuvagasi wala.”
19 E mina Isireli ililoulasi olumoulela bolita baisa oyabala. Mitaga tutala mina Itipita si waga kaibibiu deli si wosa deli tokwabikuliga bogwa leimaisi obolita, e Guyau ikaimilivau sopi ikuboli matausina.
20 E minana navitoubobuta, minawena Eroni luleta yagala Miriam, ikau la sasani, deli komwaidosi vivila ibokulaisi minana, ikatugoregorasi si sasani, deli kaiwosisi.
21 E minawena Miriam iusiwosi paila minasina, kawala.
22 E Mosese ikugwai mina Isireli bisilavaisi Bolita Pilabweyani e bilosiga oviloupakala Sura. Kwaitolu yam ililoulasi oviloupakala, mitaga gala sitana sopi ibanaisi.
23 Oluvi iviloubusisi kwaitala valu yagala Mara, mitaga sopi saina yayana gala gagabila bimomsi. Baisa uula idokaisi Mara.
24 E tomota ikavilavilasi ikatupoiyaisi Mosese, kawasi, “Avaka sitana bakamomsi?”
25 Mosese inigada peula baisa Guyau, e Guyau ivituloki matauna bubotala kai. E imai mabubona ilavi wa sopi, e sopi ikivili isumokainia.
26 Yaubada ikaibiga kawala, “Kidamwa bukukwabikuwolaigusi mokwita, e bukuvagaisi avaka duwosisia, deli bukukwabikaulasi ulo karaiwaga, e gala bamipukwaimi metoya wa lelia makwaisina avaka lamai baisa mina Itipita. Yeigu goli Guyau, kami tokatumova yeigu.”
27 Oluvi imaisi Elim, e baisa isisuaisi kweluwotala kwaiyu utuwotu deli kailuwolima kailuwoyu pulopola. E baisa ibudaisi si kabosikaiwa opapala sopi.